Thuanthu Ttha

June 14

Tlawngkai Nikhat

Thuanthu Ttha

Siar:

Luka 23:44-24:3

­­­­­­­­­

Thlankhar lung pheng pi a rak tthawn aw zo kha an hmu; curuangah an vung lut, asinan Bawipa Jesuh ih ruak cu an hmu lo. -Luka 24: 2-3

Kumkhat Sung Baibal:

Ezra 9-10

Tirhthlah 1

Chicago Phunsang Tlawng in zoihnitnak (research) an tuah ih an hmuh suakmi vek a si ahcun minung in thil ttha hnakin thil ttha lo hi an ciingmang thei sawn. Thuthangca ih an suahmi riahsiat ninghannak, natfahnak, sumpailam tlaksiatnak thuhla sia ihsin mi tampi an relh duh na’n thil cangmi pawl in an thinlung  a laak hngai tiah cuih zoihnitnak cun a sim.

Katherine Hankey (1834-1911) cu thu ttha lam ah a lung a lut deuh. Numi kum no tete pawl in Jesuh Khrih an theih ih rundamnak an ngah ding a duhsakzet. 1866 ah besiazet in a naa ih ihkhun ih a um tikah Jesuh ih rundamnak thu a simmi pawl ih thu a ruat saal ih pakhatkhat ra leeng in cuih thuanthu hlun thawn thazaang ra petu um hngai sehla ti a duhzet. Cumi thu biazai ih a nganmi cu, “Thuanthu Hlun Kha I Sim Aw,” timi hla hminthang ah a rung cang.

Neem te’n thuanthu i sim aw, Ka theih fiangnak dingin.

Mangbangza in tlennak thu, Kan sual damternak thu.

Thuanthu i sim camcin aw, Ka ciinkennak dingin.

Pathian in leilung hi a duhdawtzet ruangah a Fapa neihsun a run thlahnak (John 3:16) thuanthu simmi ngai hi ziangtik hmanah kan ning dah lo. Amah cu mi famkim asinan kan sualman cawhkuan tuar in thinglamtah parah thihnak a tuar ih nithumnak ah thawhter saal a si (Luka 23:44-24:3). Rundamtu ih kan cohlan tikah kumkhua nunnak pek kan si ih, Pathian faate ah kan cang (John 1:12).

Jesuh ih thuanthu hlun le a duhdawtnak kha mi pakhatkhat hnenah sim aw. Thuthangttha theih ttultu an um. – Anne Cetas

Jesuh Khrih ih rundamnak thuthangttha cu

Leitlun ih thuthang maksakbik a si.

(Visited 27 times, 1 visits today)

Comments

comments

Comments

%d bloggers like this: