Thuanthu Sim Thiam Pa

images10February 4

Tlawngkai Nithum

 

Thuanthu Sim Thiam Pa

 

Siar:

Luka 15:11-24

 

Jesuh in hibangtuk thu pawl hi miseenpi hnenih a sim tikah tahtthimnak a hmang ttheu. Tahtthimnak hmang loin an hnenah zianghman a sim dah lo. –Matt 13:34

 

Kumkhat sung Baibal:

          Suahlannak 29-30

          Matthai 21:23-46

 

Pulitzer laksawng a ngahtu cabu “Teacher Man sungah Frank McCourt in New York City High School pawl ah kum 30 sung saya a ttuannak thu a ngan. Mirang ca le cangan daan zirh daan phun dangdang hmangin a zirh. Cumi sungah a tthabik zirhnak cu a zirtu pawl ih thinlung laaktu le thapeknak a simi mi thinlung khoihmi thuanthu simnak thawn thuzirh hi a si a ti.

 

Himi thuzirh daan cu zirhtu tumbik Bawipa Jesuh Khrih ih rak hmanmi a si. Thiamnak saang le biaknak hruaitu Nicodemas in Jesuh hnenah, “Nang cu Pathian ih run thlahmi saya na si ti kan lo thei” (John 3:2) tiah a ti. Asinain Jesuh in a thluntu mipi hnenah thu a sim tikah Talmud thudik pawl a hmang lo. Thuanthu simtu pakhat vekin thu a zirh.

 

Jesuh Khrih ih tahtthimnak pawl cu mi thinlung sungah reipi a taang. Farasi le siahkhong pa thuanthu ihsin (Luke 18) Pathian ih zaangfahnak le ngaithiamnak thu kan thei. Fapa tlanhlo thuanthu (Luke 15) ihsin Pathian in sualsirtu pawl a duh thu a sim.

 

Jesuh ih simmi tahtthimnak pawl in Amai’ thu in zirh ih in duhsakmi nun daan in khihhmuh. Kannih khal kan zumnak thuanthu hmangin midang pawl Jesuh Khrih hnenah kan hruai thei ve.

 

Ka ttong i uk aw tusun ah,

Na duhdawtnak thu sim ning;

Na zaangfahnak thuanthu in,

Mi thinlung na lam van ah hoiter seh.

 

Pathian thudik zir daan tthabik cu cuih thudik midang zirh sin a si.

Comments

comments

Comments

%d bloggers like this: