Thuamhnaw Thar

July 26
Tlawngkai Nili

Thuamhnaw Thar

Bible Siar Ding: Matthai 23:25-33

Fiang tein ka lo sim: Pathian duhmi tuahnak ah Daanthiam pawl le Farasi pawl hnakih nan fel sawn lo ahcun Vancung Uknak ah nan lut thei lo ding. – Matthai 5:20

Hans Christian Andersen ih thuanthu cabu “Siangpahrang ih Thuamhnaw Thar pawl” timi sungah, mi ih sim tapoh a zum thei le ol teih bum theimi uktu siangpahrang bawipa cun zianghman a hruk lomi hmu aw suak dingin an tuahmi kha thei loin hnipuan mankhungzet ka hruk hmang ti’n a ruat aw.

Jesuh in A dungthluntu pawl kha cutivek bumnak zum lo dingin raalrinnak a pek hngai. Farasi pawl cun biaknaklam daamthlunnak le raithawinak thuamhnaw pawl kha an hruh, an dingfelnak dinhmun a saan zia Pathian ih cosaanmi si ding an tumtah.

Sihmansehla, profet Isaiah in, “Kan zate in mi borhhlawh kan si ttheh. Kan hnattuan tthabik khal cu fihnungzet puansia borhhlawh vek a si ko,” ti’n a ngan (Isa. 64:6). Jesuh in Farasi pawl cu “Mi titer aw pawl” ti’n a ko hngai a si (Matt. 23:25). Jesuh in vancungram kan luh theinak dingah kan dingfelnak cun anmah kan hleih a ttul a ti. Hih ttongkam hin a thusimmi a ngaitu pawl ih thinlung a lauter thluh. Farasi pawl cu biaknaklam daan thu thiamzet an si ih annih hman in vanram an kai ngah lo ding ahcun mizaraan vualvo pawl hrangah ruahsannak a um pei maw?

Biaknaklam daan pawl thlun le tuah cu minung thinlung thlengh awknak taktak a um lo ahcun zianghman lo men a si. Farasi pawl ih dingfelnak kan hleih theinak ding ahcun Yahweh Tsidkenu in Jesuh Khrih thawngih in pekmi dingfelnak (righteousness) thawn nunhram kan thawh lawngah a si thei ding. Cutik lawngah kan sunglam nun ah atak ih thianghlimnak a um thei ding.

Ziang a va si hmanah minunglam tisa daan ih dingfelnak cu puansia borhhlawh hnakin a fai deuh cuang lo. Jesuh in Amai’ dingfelnak in pek tikah kanmai’ thuamhnaw borhhlawh cu Amai’ thuamhnaw thar thawn kan thlengh aw a si.

Yahweh Tsidkenu, Nangmai’ dingfelnak lawng hiarhaal dingin i bawm aw.

Tuih kar sungah keimai’ dingfelnak thawn Pathian lungkimnak ngah thei dingin ziangti’n si ka pan?

@ Ava Pennington

(Visited 33 times, 1 visits today)

Comments

comments

Comments

%d bloggers like this: