Thomas ih Nun Cawngin

Kan dung Nipi ni ah Salai Hrang Than Luai cu Ipoh ih a hnatuannak lamzin ah mawtaw in a pah ih, mual in liam san ruangah tlawngkai nikhat ni (April 26, 2010) ah Sungai Blue thlanmual ah a ruak cu vui a si. Amah hi kum (16) lawng a si ih hlei-ah Malaysia ih a ra thlennak hi thla (2) khal a kim hrih lo. Laimi pawl hrangah Seramban thlanmual cu hman a theih nawn ruangah Sungai Blue thlanmual hi kan hman vivo a tul thlang.

Ruak vuinak ah Rev. No Bual Hrang cun Pathian thu a sim ih, thihnak parih kan ruahkhawm dingmi lakah hminsin tlakzet pakhat, dungthluntu Thomas ih thuanthu a rel. “Thomas cun Bawipa a thosaal timi cu Amah a tham thei lawngah a zum. Culawng a si lo, dungthluntu pawl an fehnak ding ram hrilnak ah ‘camcawh fung an zuk ih, India ram feh ding a si. Asinan a feh duh cuang lo. Zaan ahcun a mang ah Bawipa cu an kai lai a hmu. Sal si dingin zuar ding a rak si. Thomas cun, “Bawipa, kha tawkah ziang na tuah?” a ti. Bawipa cun, “India ram ah ka thuthangtha sim dingin zohman feh thei an um loih, keimah ka feh ding” tiah a ti.

A thaisun ahcun dungthluntu pawl cun camcawh fung zuk sal ding’ an ti aw na’n, Thomas cun, ‘Keimah ka feh ding’ ti’n zaan ih a mang cu a sim hai. Ticun Thomas cun sal zuarnak ahcun ‘kei hi nan duhduh zatin in zuar uh, India ram ah ka feh duh” tiah a ti. Cun, India ram ihsin ‘sal a ra leitu pawl’ hnenah tangka fang (2) in an zuar. Cucu  India ram in thuthangtha a thlen theinak cu a si. (Cover  ah Thomas ih zuk ret a si)

Dungthluntu Thomas hi dungthluntu dang hmuahhmuah hnakin a feh suksohnak ram a kaubik ti’n hminsin a si. Persia sanlai ih an rak uk dahmi hmuahhmuah ahcun Thomas ih hnatuannak thuanthu hi hminsinnak an rak nei. Sal si dingin amah le amah cu a zuar aw ih, India ram a thlen hlan ah Persia ram sungih khaw tampi ah thuthangtha a phuang. Cun, India ram tipi kap Muziris (1341 AD ah himi khua hi siatsuah a si ih, tuni tiang a um nawn lo) khua ah a thleng ih, cutawk ihsin Palayoor (tulai ih Guru vayoor khaw kiang) ah a thleng.

Hindu pawl a tih ruangah Palayoor ihsin Kerela state lam ah a thawn ih, cutawk ahcun  a thiam dandan in, hnatuan phah in thuthangtha a sim thok. Kerela ahcun kawhhran pasarih le a hrek a din ti a si. Thomas cu Siangpahrang pakhat in inn tumpi sak dingin sumpai tampi a pe. Asinan anih cun mi farah pawl hnenah a zem.

Curuangah siangpahrang cun damsung thawng thla dingin raalkap a fial. Asinan siangpahrang ih nau pakhat cu a thi ih, cupa cu vancungmi pawlin Thomas in a sakmi vanram ih inn sunglawizet pawl cu an zohter. Cupa cu a ra nung sal ih, a u siangpahrang hnenah Thomas suah dingin a dil sak. Kawhhran tampi din a si ruangah amah itsiktu pawlin Maylapore khua ah fei in an dawt that. Dungthluntu dang pawl ziangtin an cangvai ih, ziangtluk in Bawipai’ hrang pum an pe aw’ timi cu kan ngan cawk lo ding.

Ruah ding pakhat kan nei. Martar (Jesuh ruangih thihnak) kan timi hi ‘Latin’ tong ihsin a ra mi a si ih, a sullam cu ‘theihpi (witnessing)’ tinak a si. Thuthangtha ruangih nunnak liamtu pawl cu ‘theihpitu’ kan ti ahcun, kan thih hlan khalah ‘Jesuh ih thuthangtha theihpitu, nunpitu le thluntu’ kan si thei lo pei maw? Ticun, hih lei ih kan dam sung ah siseh, kan thih khalah siseh,.. nitin Bawipai’ hrang ‘martar’ kan si cio pei uh.

Tuni ah Evangelism & Mission Day kan hmang, Bawipai’ hrangah ziangtluk in kan siang aw ve ding? Kannih kan tuan lo ahcun lungte tal hi Pathian in a auter ding; lungte an au thei lo a si ahcun Amah kan Bawipa thotho maw kan fial dingih, Bawipa’n in hmuntin ah a thuthangtha cu amah rori in a ra phuang ding? Kan thuthangtha theihmi pawl hi mai’ hrang lawng duh tawk loin Bawipai’ hrangah “Kan puan inn kuahter uh si!”

By- Salai Biak Chhawna ( Hruaitu Thuthang Vei (277) nak)

(Visited 44 times, 1 visits today)

Comments

comments

Comments

%d bloggers like this: