Tho in Din Uhsi!

August 22
Tlawngkai Nithum

Tho In Din Uhsi!

Bible Siar Ding: Nehemiah 2:11-18

Jerusalem khuapi kulhnak phardawl pawl cu din saal uhsi la
kan thangsiatnak hi rehter uhsi!
Nehemiah 2:17

Na nunak buaizet ih a um caan ah le ziangtinkim na kiangkap ah siatral le tlu sawn ih a um celcel tikah ziangtivek in na lehrul?

Nehemiah cu Pathian in Jerusalem khuapi kulhnak phardawl pawl cim le siatbal thluh ih a ummi dinsuah saalnak ah hotu dingih Pathian ih ttuanvo a peklai ahkhan ramdang mi siangpahrang ih sabiti in ding petu (cupbearer) timi acozah hnattuan dinhmun saang neitu bawi upazet a si. Anih in ziangti’n a ttuanvo tumpi cu hram a thok?

A hmaisabik ah, ni thum sung rawl ul thlacamnak nei in thil ttulmi pawl a ngaituah. Cun ruahnak bang awmi, thilti le ttong ih ralringzetmi pawl hril in thil umtu daan a zingzoi, ih thilcangmi vek cekci in tluangzet le supmi nei lo ih ttong thei pawl hril in a hnattuan dingmi zohfel cianak a nei. A netabik ah, Pathian ih hnattuan tumpi ttuan dingih a pekmi ah mipi pawl lungthozet ih tel ve dingin a sawm hngai. Mipi in ziangti’n an let? “Tho uhsi la din saal uhsi,” an ti (Neh. 2:18).

Pathian cu A Kawhhran le kan nunnak dintu Innsak thiamzet Bawipa a si. Sihmansehla, a caancaan ah kanmai’ hril sualnak asilole kan kiangkap thil umtu daan pawl ruangah kan nunnak cu dungtolh in a siatbal ttheu ih rem tthat kan ttul. Nehemiah ih thilti daan karbak pawl hi mi bulpak nunnak, mibur pawlkom hnattuannak ah le thlaraulam cangvaihnak khal ah hman theih dingmi hlir an si.

Harsat buainak pawl cu nunnak sungih telmi an si. An karhzai vingvo tikah, mah le mah zaangfak aw in kan taalbuai ciamco thei, asilole kan nunnak innsak thiambiktu Bawipa ih hruainak thlun in, “ka tho dingih ka din saal ding!” kan ti thei.

Vancung ih um kan Pa, Na lamhruainak thlun loin keimahte riahsia in ka um ttheu, Ka nunnak siatbalmi pawl dinsuah saal thei dingin i cakter hram aw.

Ka nunnak ziang zawn ahso zoh mawi lo ih a um? Ziangti’n si tuni ah Bawipa ih kawhnak ngai in nun dinsuah ka thok thei ding?

@ Ava Pennington

(Visited 23 times, 1 visits today)

Comments

comments

Comments

%d bloggers like this: