Tho Aw

February 6

Tlawngkai Ninga

 

Tho Aw

 

Siar:

Johan 20:1-8; 19-20

 

Hlanlai ah nan sualnak ruangah le Daan lengih a ummi Gentile mi nan si ruangah thlaraulam ahcun mithi nan rak si. Sikhalsehla atu ahcun Khrih thawn hmunkhat ah Pathian in a lo nungter zo. Pathian in kan sualmawhnak hmuahhmuah cu in ngaidam zo.  –Kolose 2:13

 

Kumkhat sung Baibal:

          Suahlannak 39-40

          Matthai 23:23-39

 

February 6, 1958 ah England ram ih Manchester United bawhlung club member pawl tomi vanzam cu Germany ram Munich khua ihsin a zam zawngah a tlak. Cumi vanzam totu bawhlung thiam tampi an thi ih mi tampi in bawhlung Club teh an din thei nawn pei maw tiah an riahsiatpi. Asinain tuni ah leilung tlunih mi ih theihbikmi Club a si. Himi Club a din saaltu cu vanzam tlami sung ihsin a rak luattu Matt Busby a si.

 

Kan dung kum 2000 zikte laiah Jesuh an kai ih an thah tikah a dungthluntu pawl an bei a dong, ruahsan ding an nei nawn lo. Asinain hmaisabik thosaal ni zingah a thlankhar lungpheng cu thawn cia in a um (John 20:1) tikah an beidongnak cu a hlo ttheh. Jesuh cu a tho zo!

 

A rei hlan ah Jesuh cu Mary Magdalen hnenah a lang (cc. 11-16) ih sangka khar tahrat in a tongkhawm awmi a dungthluntu pawl hnenah a lang (c.19). Amah ih langnak in thlengawknak makzet a suak. An lungawituk (c. 20 NIV).

 

Na leilung nunram ah bulpak sunnak, innsaang sungih thih hlohnak, harsatnak dang khal tampi na tong thei men. Jesuh thawhsaalnak cu a dokalhtu tumbik hnakin a tum sawn ti a lang. A dungthluntu pawl a tharthawhter saal bangin na nunnak khal tuni ihsin thokin a lo tharthawhter saal thei.

 

A tho saal zo, Amah thawn ruahsannak, nunnak le tleunak,

Khrih a thi lo, thihnak sawn mizaan ah a thi tiah mi in an ti;

Lungawinak thudik le thil ttha hmuahhmuah,

Amah thawn an tho saal.

 

Pathian in ziangvek harsatnak khal thil ttha ngahnak dingah

caan remcaang ah a canter.

Comments

comments

Comments

%d bloggers like this: