Thluasuah Cotu Pa

THLUASUAH COTU PA

“I thluasuah lo ahcun ka lo thlah lo ding.” “… cuih hnu ah Jacob cu thluasuah a pek.” – (Seem. 32:26, 29)

Thuhmaihruai

“Pai’ Ni (Father’s Day)” ah thluasuah cotu le a fale pawl le a tule pawl thluasuah petu zumnak patling a si vemi (Seem. 49:28; Heb. 11:21) Jacob ih nun zoh in thazaang kan la tlang pei. Abraham, Isaac le Jacob pawl hi Thukam Hlun sungih Pathian mi hminthang pawl lakah mi cehlei an si. Jacob in a pu Abraham ih Pathian, a pa Isaac ih Pathian ti lawng si loin amah Jacob ih Pathian a si zia a langter thei. Jacob cu thluasuah dongtu pa, Israel miphunpi ih pa a hung si theinak dingah nasatak in zuamtu pa a si. Jacob ih thluasuah a duh zia, thluasuah ngah dingih a tumtah zia le thinsauzet ih Pathian a tlaihsan zia hi cawn tlak taktak a si. Miphun pakhat ih Pa a tling hrimhrim. Jacob ih nun thuanthu kan zirzoi asile karbak pali in kan hmu thei ih karbak pakhat cio ah Pathian thawn hmaiton ih an ton awknak hi hminsin tlak a si. Jacob cu:

1. A suahthlak in thluasuah duhtuktu a si

Abraham ih fapa Isaac in Laban ih farnu Rebekah a tthit. Rebekah in fa a nei thei lo ruangah Isaac in Bawipa hnenah thla a cam sak. Bawipa in a thlacam cu a thei ih Rebekah cu fa a vun. Rebekah cu a ni-thla a kim tikah faphir a hring. A suak hmaisa pa cu misen a si ih a pumpuluk in hmul a nei. Curuangah Esau tiah hmin an sak. A nauta pa a rung suah tikah a upa Esau ih kedil kaihnget tahrat in a suak. Curuangah a hmin ah Jacob an sak. Hih thuanthu kan zoh tikah thlaraulam in kan thlir asile a fiangzetmi thil pakhat a um. Cumi cu Jacob hi a suahthlak ihsin thluasuah duhzetmi a si ti a langfiang. Anmah Judah daan ah fatir sinak hi a sunglawituk, hringtu pa ih thluasuah conak a si. Curuangah a upa hlanah suak ding hi a rak duhzet cianak a si. Curuangah a hung suah tik khalah cuih thluasuah cotu si duhnak thinlung cu a reh thei cuang lo, a thinlung thupte ah a nung ringring ti a lang. Ziangahtile a upa Esau in a rilrawnzet lai ih a suncaw suanmi a dil tikah, “Na fatir covo i pe awla ka lo pe ding” (Seem. 25:31) a timi hin a langter. Jacob cu thluasuah co phu hrimhrim a si.

Warren W. Wiersbe in, “Jacob” timi hmin hi Hebrew ttong “yaaqob” timi ihsin rami a si ih a tican cu “Pathian in a kilhim ding (may God protect)” tican a si. Asinan a awsuah hi “aqeb” kedil (heel)” timi le “aqab” dunglam in zoh (watch from behind or overtake)” tican a si ih (nickname) ah “a kedil a kaihnget (he graps the heel),” asilole “a bum (he deceives)” timi ah a rung canglan ta, a ti [the Transformation Study Bible, 2009]. Curuangah Hebrew Cakuat ngantu in Jacob kha mibumtu ti’n a mawsiat loih fatir covo ziang siar loin veikhat rilrawnnak riamternak men ih a zuartu Esau sawn a mawhthluk thu kan hmu (Heb. 12:16). Tuni zumtu pawl tla Esau bangin veikhatte asilole caan tawite sung tisa duhnak diriamternak ding men ah thlaraulam ih kan roco dingmi sungral pang hlah uhsi! Cuhnakin veikhat sunsaw ei dingmi sungral siangin fatir covo a leitu Jacob bangin kannih tla kan leitisa duhnak taansan ngam in thlaraulam covo thluasuah a duhzettu le a thlenghtu sawn si zuam cio uhsi! Cuticun Jacob cu a hung pacan tikah Israel miphunpi ih pa dinhmun a hung thlen thei bangin kannih tla thluasuah duhzettu, thluasuah dongtu si in miphunpi ih pa kan si thei ve ding a si!

2. Thluasuah duh ah Pathian hnenah thukamnak nei ngamtu a si.

Isaac in Jacob cu a ko ih a thluasuah hnu ah, “Kanaan nunau cu na tthi lo pei. Na timtuah awla Mesopotamia ram na nu ih pa Betheul ih inn ah va feh aw. Na pu Laban ih fanu pakhatkhat va tthi aw. Ziangkimtithei Pathian in nan tthit awknak cu lo thluasuah hram sehla, faate tampi nei in miphun tampi ih pa ah lo canter seh. Pathian in Abraham a thluasuah zo vekin nangmah le na tefasin pawl cu lo thluasuah hram seh. Pathian in Abraham hnenih a pekmi na umnak ram hi co hram aw,” tiah a ti. Cule Isaac in Jacob cu Mesopotamia ram Aram mi Bethuel ih fapa Laban (Jacob le Esau ih nu Rebekah ih tapa) hnenah a thlah. Lamzin ah Jacob cu mang danglamzet a man: “Leilung in van a baanmi kailawn saupi a hmu. Pathian ih vancungmi pawl tla cu cuih kaililawn parah an ttum an kai. Bawipa in, “Keimah cu Abraham le Isaac ih Pathian ka si. Na ihnak hmun le ram hi nangmah le na tefasin pawl ka lo pe ding. Na tesinfa pawl cu leilung parih leivut zat an si ding. .. Na hnenah ka um ding; na fehnak kip ah ka lo humhim dingih hih ram ah ka lo kirter saal ding. Ka lo tiammi hmuahhmuah hi ka kimter thluh hlan lo ka lo taanta hrimhrim lo ding” a ti (Seem. 28:10-15).

Jacob cu a tho ih lukham ih a hmanmi lungto cu laak in hngilh lonak lungphun ah a phun. Cule hriak a toih ih Pathian hnenah a ap. Jacob in a cuih hmun cu “Bethel” tiah hmin a sak (Bethel ti cu Pathian ih inn tican a si). Cule Jacob in Bawipa Pathian hnenah, “Ka hnenah na um ih ka fehnak lamzin ah i humhim ih ei ding rawl le hnipuan i pek ih tlunah ka pa ih inn ah himdam tein i thlenter saal a si ahcun Bawipa, Nangmah cu ka Pathian ngaingai na si ding. Hih ka phunmi hngilh lonak lungphun hi Pathian, Nangmah ih inn a si dingih i pekmi hmuahhmuah sung ihsin tthenhra ih tthenkhat cu ka lo pe tengteng ding,” tiah thu a kam (Seem. 28:20-22). Thukham a um hlanah thluasuah a duhzettu Jacob cu Pathian hnenah umpi ding le kilhim ding a dilngen ih tthenhra tthenkhat pe dingin thukamnak a tuah. Curuangah miphunpi ih Pa sunglawi a hung tlinnak a si. Zumtu kannih tla Jacob bangin hringtu pa ih thluasuah cotu le Pathian ih thukamnak a ngahtu kan si ih Pathian hnenah thukamnak kan neih ngam asile thluasuah dongtu le miphun ih pa dinhmun ah khaisan kan si ve ding.

3. Thluasuah co dingah rin-umzet le nasatak in zuamzettu a si.

Jacob hi thluasuah duhzettu lawng si loin a pu Laban hnenah kum kul sung thinsauzet in rin-um le taimak suah ih hnattuantu a si ti kan hmu. Seem. 31:38-42 sungah, “Na hnenah kum kul sung rori ka um ih, cuhmuah ka um sungah na tuu le na me veikhat hman an fa an siat dah lo; na tuurual sung ihsin tuucang pakhat te hman ka ei hrih lo. Sahrang in na tuu a deh tikah keimai’ sualnak a si lo ti langter duh ah a sa na hnenah ka rak keng dah lo. A ai ah keimah te in ka rak rul mai ringring sawn. Sun ah siseh, zaan ah siseh, rukru pawl in an ru asile na kuan pei i ti. Vei tamzet sun ih niling ka tuar ih zaan ih khawsik khal ka tuar. Ka it thei dah lemlo. Kum kul khengte na hnenih ka um sung hmuahhmuah cuti’n ka rak tuar cuahco a si. Na fanu pahnih hrangah kum hleili na hna ka ttuan. Na tuurun pawl kum ruk sung ka khal. Cucing hmanin ka hlawhman vei sawmsahra na tthin. Abraham ih Pathian le Isaac ih biakmi ka Pathian ka hnenah um hlah sehla ka kut lawngin i dawi hlo zo ding. Asinan Pathian in ka hnattuanmi le ka zonzaihnak a hmuh ruangah mizaan ah a lo kawk a si kha!” tiah a ti.

Jacob cu a suahthlak ihsin thluasuah duhtu, kedil kai ih suaktu pa a si ih a mak ngaingai. A hung upat vingvo tik khal ah thluasuah co ding a duh ringring ih fatir covo leitu a si. Pathian hnen ihsin langnak a hmuh tikah thluasuah rori dil in thukamnak tiah a tuah. Thluasuah a duhtuk ruangah a pupa Laban ih hna thinsauzet le dingfelzet in hna a ttuan. A hmin Jacob: (jaqoob: may God protect) vekin Pathian in a kilhim ih a thluasuah a si. Zumtu kannih tla Jacob bangin nitin thlusuah duhtu, a diltu, le rin-umzet le taimazet in hnattuantu kan sile Pathian ih kilhimnak le thluasuah kan co ve ding a si.

4. Thluasuah a ngah hlan lo Pathian kaifek ringringtu a si.

Jacob cu a mang ah Pathian ih langtermi thutiamkam (promise) parah fekzet in zumtu a si. Kan Pathian hi thutiamkam hmangzetmi Pathian a si: Moses hnenah ka lo umpi dingih daihnak ka lo pe ding a ti (Suah. 33:14); Joshua hnenah, na fehnak kip ah ka lo umpi ding a ti (Joshua 1:5, 9); ih Isaiah hnenah ka lo umpi ding, ka lo humhim ding a ti (Isa. 41:10). Jacob in Pathian cu thukam pelh dah lo Pathian ti a zum hnget ruangah a tiamkam vekin a pa Isaac ih ram ah ngamzet in a tlungkir tum. Mesopotamia ram ihsin a tlunnak lamzin ah veikhat cu a innsang mi pawl tiva ral ih a hruai thluh hnu ah a neihmi dang hmuahhmuah khal tiva ral ah a hei tthawn thluh ih amah lawng a rung taang ta. Cuih zaan ah mi pakhat in Jacob cu zing khuavang zik tiang a rung buam ciamco. Jacob a neh thei lo ti kha a buantu pa in a theih tikah, Jacob ih khel kha a sawh in a sawh ih an buan awk rerolai ahcun Jacob ih khel hlikhlok a pelh. Cutikah mipa in, “I thlah aw, khua a vang zik thlang hi!” tiah a ti. Sikhalsehla Jacob cun, “I thluasuah lo ahcun ka lo thlah lo ding,” tiah a ti. Cule mipa in, “Na hmin zoso a si?” tiah a sut ih, Jacob in, “Jacob ka si” a ti. Cutikah mipa in, “Atu thok ihsin Jacob a si nawn lo pei. Milai thawn siseh, Pathian thawn siseh, nan tawng aw ih na neh ruangah na hmin cu, “Israel” ti a si pei, tiah a ti. Cuih hnu ah Jacob cu thluasuah a pek (Seem. 32:22-29).

Jacob ih nunnak a netabik karbak a dot linak a thlen tikah, a pa ih umnak ram ih a tlun thu kan hmu. Pathian ih thukammi a thinlung sungah re in a kaihnget ti kan hmu. Jacob in thluasuah a donnak thuhrampi cu a zummi fekte in a kaihhnget ruangah a si ti a fiang. Zumtu nang le kei tla Jacob bangin, “I thluasuah lo ahcun ka lo thlah lo ding,” ti’n zumfeknak thawn Bawipa cu thlacamnak thawn thlah loin kaihnget uhsi!

Thunetnak

Jacob cu thluasuah dongtu sunloih tlak pa a si. A suahthlak ihsin fatir sinak covo duhzettu a si. A hung tlangval ih a upa Esau hnenah fatir sinak covo kha suncaw ih thlengh a ngiarnak ihsin ziangtlukin a hmuitinmi parah a thinlung a pek ti a langter. Bethel hmun ih mang a man tikah Pathian hnenih thutiamkam a neihmi khalin thluasuah co a duh zia kan hmu thei. Apu Laban hnenah kum kul sung rori dinfelzet, fimkhurzet le taimak in thluasuah a hawl ti kan hmu thei. Jabok tiva kap ah zaanvarte Pathian a buannak ih a dilmi ihsin thluasuah co lo ttha a si lo zia kan hmu fiang thei. Zumtu kannih tla innsang, kawhhran le miphun ih pa kan si theinak dingah thluasuah cotu pa kan si hmaisa a ttul. Curuangah Jacob bangin thluasuah a duhzettu, thluasuah ngah ding rori in a hmuitin ih thinsauzet ih a zuamtu si kan zuam cio pei!

rcamang@gmail.com. 17.06.2012

(Visited 33 times, 1 visits today)

Comments

comments

One Comment

  1. si rori, mah ih thlawhsuah don hnu lawngah mi bawm thei zoh tlak in kan um thei dingih hruai tu tha kan si thei lai ding. mah in ziangkim tuar hmaisat le hmu hmaisa a tul. lungawi saya pa

Comments

%d bloggers like this: