Thlengawknak A Thleng Rero Mi Kan Hmu Thei Lo A Va Bang Ve!

-Uk Lian

Kan innsang, khawhran le khawtlang pawl hi kum tinte in a thleng aw ringring. A thlengaw dahlo mi pawlkom, kawhhran, innsang le khawtlang pakhat khal a um dahlo. Asinan, an thlengawk daan a bangaw dahlo. Pawlkom, innsang le biaknak kawhhran tivek pawl thlengawknak cu tanta in, minung pakhat, a bulpak nun hi nitin te in a thlengaw ringring a si.

Minit pakhat hnu pakhat, nazi sekan a her zatin minung thinlung cu a thlengaw ringring. Cuvek rualrual in kan tuahmi tla a rak thlengaw ve ringring. Cuvek ih a thlengawk ruangah punkhawmnak ih kan tuahmi thil pawl tla, danglam zetin a rak thleng aw ve theu. Asinan mimal te lawng in, a thlengaw mi malte cu an hmu thei. Ziangahtile, a thlengaw mi malte hi mikip ih hmuh theih mi a si dahlo.

Kawhhran, innnsang, pawlkom le khawtlang ih thlengawknak malte hmuh fiang tum lo in, vei leh khat ah nasa zetih thlengawknak hmuh kan tum theu. A malte kan hmuh hmaisak lo ahcun tampi hmuh a theih lo. A tam zia kan theih nak dingah a malzia tla kan theih a tul. A um zia cu, thlengawknak kan timi hi kanmah in thlengter duh daan kan rak nei ringring. Kan duhdan ih a thlengawk lo sung poh cu thlengawknak ti ah kan pom dah lo mi a si.

Obama ih thlengawknak a tuahmi khi thlengawknak a sinan, a thlengawknak tuah mi khi na duh zawng thlengawknak cu a si lo men ding. Asinan, thlengawknak pakhat cu a si. Trump in a tuah ve cih, a thlengawknak tuahmi khi thlengawknak te le tum ti siloin, na duh zawng thlengawknak a si maw timi parah thlengawknak ngaingai le ngaingai lo na timi tla nangmah te in thuthluknak na tuah bet lai ding. Cuvek in nang khalin thlengawknak na tuah ih midang khalin an tuah ve. Asinan ziangvek thlengawknak a si kan hawl ih kan duh timi theih a har zet. A tha zawng ih thlengawknak kan duh kan ti hman ah tha kan timi le a bang aw ta lo.#

Comments

comments

Comments

%d bloggers like this: