Thlawhtlinnak Ti Mi Cu

Thlawhtlinnak Ti Mi Cu

                                                 Timothy Sui Lian Mang 

” Cule a pu in a hnenah, ‘Na titha riai! Nang cu siahhlawh tha le siahhlawh rinum na si. Nang cu thil malte parah na rinum a si, thil tampi uktu ah ka lo tuah ding. Na pu?ih lungawinak sungah va lut aw,’ ” (Mtt.25:21) tiah a ti. 

Kawhhran hruaitu pakhat in an kawhhran thu hi tiin i ruah dah. Kum thum sungah Kawlram ah kawhhhran khua (200) ih an din thu a si. A ropi ko. Ka thinlung taktak in an rawngbawltupawl khal ka lawm zet. Asinan, ka thinlung ih thil pakhat ra suak mi cu hi hi rawngbawltupawl ih hlawhtlinnak tahnak fung a si maw? tih hi a si.

Khristian tampi cun leitlun dan i tuatdan hlawhtlinnak lawng an thei. Leitlun dan i hlawhtlinnak tahnakfung hi khristian nun ih hlawhtlinnak tahnak khalah an hmang. Neihnunnak, hminthannak, thuneih theinak, thlarau hlo tam kaihngahnak, member tam ngahnak pawltla hi hlawhtlinnak ah an ruat. Cuih tahnak hi Pathian thu Bible ih in zirh dan diktak a si maw? Cu ti a si ah cun kawhhhran thuanthu kan zoh tikah si seh, tulaisan khalah si seh missionary tampi le rawngbawltu tampi pumhlum ih peaw le hnatuan rero si ih hlawhsam an tam zet.

Pathian in khristian nun ih hlawhtlinak tahnakfung danglam zet a hmang, a nei ti hi hngetzet in ka zum. Pathian in hlawhtlinnak a tah veknak fung cu Bible sungah kan hmu “THULUNNAK- RINUMNAK”  hi a si (I Kor. 7:21; Rom.6:16). Bible in hlawhtling a ti mi diktak cu kan Bawipai hmai ih kan din tikah kan thei leh ding, ” Sal tha le rinum, na ti tha e,” Mtt 25:21 tiin, THULUNNAK LE RINUMNAK a si. Curuangah tuih zan kan mitsing i kan ithah hlanah kan mah le mah thusutaw hnik uhsi. Kei hi tui sunah Bawipai sal thulung le sal rinum ka si maw?” tiin! Cu cu zumtu hmuahhmuah hrangih Pathian duhzawng a si. Pathian duhzawng cu a thu Bible sungah Thiang Thlarau kaihhruainakin kan hmu thei, kan thei thei a si tih kha hngilh hrimhrim hlah.

Asile kawhhran khua tampi ih din thei, crusade tuahnakih ngaitu tampi neih le mi an piangthar, an tap thluahthlo hi hlawhtlinak a si maw? Kawhhran din le mi an pianthar tam hi cu Pathian tuanvo a si. Rawngbawltuih hlawhtlinak sawn cu Jesui THU A LUNNAK LE A RINUMNAK lam kha a si sawn. Rinum zetih thlacamtu, petu, programme tawlreltu, thusimtu, zirhtu le maiti theitawkteih rinum zetih tuan tentotu hi mihlawhtling an si.

Ring zetin, taima zetin au rero khal nung la Thiang Thlarau hnatuannak lo cun mi nun a danglam thei cuanglo. Amah Pathian lam tuanvo a si. Asinan,  A THU LUNG IN RINUM TEN kan tuan thei. Cucu HLAWHTLING ti mi si. Khrih i ralkap ka tuanpipawl tha lo pe ve hnik ning. BAWIPAI THU NA LUNNAK LE NA RINUMNAK khan mi hlawhtling ah a lo tuah a si. Arah suah lam khan tahhlah aw. Tuihni ah kan thelh pang asile siraw in Pathian thangthat uhsi. Ziangahtile thaisun cu ni thar a si. “Ngaihnik thulunak cu raithawinak hnakin ka duh sawn” (ISam. 15:22), tin kan hmu. Paul in, Curuangah, kannih cun hi rawngbawlnak hi zahngainak kan co vekin kan co ruangah
kan bei a dawng lo.” (II Cor. 4:1).

Rawngbawlnak hlawhtling zet i a langhnakah mi pakhat ih tuansuah mi lawng a si lo. Zate ih kan tel khawmnak ruang i Pathian Thlarau cangveihnak a si. Kan zatein lungawi tlang uhsi. Cuihruangah mah le mah ka tling ve lo ti in ninghang-riahsia le iksikawknak ding hmun le ram a um thei lo. Pathian hnenah bangrepten lungawitlang uhsi.

“Ziangkim Pathian parih thumaw vekin thla cam aw; ziangkim na parih thumaw vekin hnatuan aw,” tiah John Wesley in a rak ti dah.

(Visited 18 times, 1 visits today)

Comments

comments

Comments

%d bloggers like this: