Thlaraulam Phuanlangnak

April 17
Tlawngkai Nihnih

Thlaraulam Phuanlangnak

Bawipa Jesuh in Amah an zuar zaan ah sanghlom pakhat a laak ih Pathian hnenih lungawithu a sim hnu ah, “Himi hi nan hrangih ka pekmi ka taksa a si. In theih ringringnak dingah ei uh,” tiah a ti.
1 Korin 11:24

Bible Siar Ding: Matthai 26:20-56

Jesuh thiisen sunglawi sungih beunak kan ngah hi zumnak sungih mangbangza ro sunglawi kan comi a si. Jesuh in sang a laak ih lungawithu a sim; sabit khuat a laak ih lungawithu a sim. A pemkuaimi a taksa hrangah le a thletmi a thiisen hrangah Pa hnenih lungawithu a simmi in kan thinlungput ah thu tampi in sim ih in neh a si. Ka Bawipa in Amai’ khekkhuaimi taksa hrangah lungawithu a sim thei ih, Amai’ thletmi thiisen hrangah lungawithu a sim thei timi hi ka ruat nasa. Vanlam fimnak lawngin hih a nasatukmi cangvaihnak thutak hi kan thinlung sungah a phuanglang thei ding.

Minung lei tisa sinak in hih thlarau thuthuk hi theih ban a si lo, thlarau mi lawng in Khrih zumnak sungih sersiam tharnak thawng lawngin theih theimi a si. Pathian zumtu cu kumkhua thutak thlaici ih hrinmi an si. Zumnak kan neih le ve te’n sersiam thar kan si. Tisa nun a cem in thlarau nun a thok. Pathian hmai ih kan um hlanah pakhat cu hlon a si dingih pakhat cu laakluh a si ding. Bawipa in a fahniang pawl cu cawlhhahdamnak le vanram ih Amah thawn to tlang dingin in hruai ding ti ka zum (Efesa 2:6).

Sanghlom in a kekkuaimi Khrih taksa a ai-awh ti na hmu thei maw? Bawipa in, “Himi hi ka pemkuaimi ka taksa a si,” a ti (Luka 22:19). Jesuh in, “Laak uhla, ei uh, himi hi nan hrangih ka pekmi ka taksa a si,” a ti (Matt. 26:26). Himi ihsin Khrih theihthuknak taktak ka nei thei. Bawipa Zaanriah cabuai ihsin A thukamnak sunglawi kan co thei. Vancungram ih lennak cu kan hmaika ah a um. Ttih hlah: zum mai aw. Ziangahtile Pathian in A Ttongkam Thianghlim in a hlawnthil mankhung in on sak zo a si.

Dungthluntu pawl lakah zosi mi thupibik timi thinlung sungin zuam awk duhnak a um ti a theih ruangah Jesuh in, “Nanmah lakih upabik cu nautabik bangtuk in a um dingih hotubik cu hnen-um bangin a um ding,” a ti (Luka 22:26). Cun hiti’n tla a simbet hngai: “Kei cu nan lakah a lo riantu vekin ka um a si” (c. 27). Amah cu a cungnungbik le a nasabik asinan mi hmuahhmuah ih sal ah a tuah aw. Kan thinlung takin pawlkomnak, dingfelnak, pakhat le pakhat duhdawtnak, le pakhat le pakhat sunsak awk daan kan zir hrimhrim a ttul. Kawhhran sungah atak in ka hman le kan nunpi thiam a ttul.

Pathian in nun thianghlimnak kan neih ding le pakhat le pakhat soisel aw loin kan tuah tthat awk ding in duhsak a si ti ka zum hnget.

@ Smith Wigglesworth

(Visited 21 times, 1 visits today)

Comments

comments

Comments

%d bloggers like this: