Thlarau Thianghlim ih Huham

January 25
Tlawngkai Nithum

Thlarau Thianghlim ih Huham

An zate in Thlarau Thianghlim in an khat ih Thlarau in ttong theinak a pek vekin ttong dangdang in an ttong ciamco. – Tirh. 2:4

Bible Siar Ding: Tirh. 2;1-21

Zaan khat cu miseepi tonkhawmnak hmun ah rinsanzet in ra pantu ka nei ih Pathian hmai ah ka dinhmun cu kilhim a si. Bawipa ih umpimi le nemhnget mi si ka ttul. Pathian in Thlarau Thianghlim thawn a khatmi le vanlam thiltitheinak thawn a khatmi, Nunnak thawn a khatmi, le meia-alh ih a hliomi a hnattuantu ding mi a a ttul ti ka thei. Miseenpi tonkhawmnak ah tlangval note pakhat cu a ding. Amah cu zaangfahzazet in riahsiazet mit-hmai pu in a um. “Tlangval pa, ziangso a cang?” tiah ka sut.

Cu mipa in a simmi cu “Hna ka ttuan thei lo, ziangahtile ttha te’n ka feh thei lo ruangah. Bawmtu zohman ka nei lo. TB natnak ka nei ih ka thin hi ttha te’n hna a ttuan lo tikah ka thawthawt a har. Ka derthawm ih ka taksa khal a naa thluh” ti a si. Cutikah kei in, “Thla ka lo cam sak ding” ka ti. Cule mipi pawl hnenah, “Himi pa hi atu rori ih thla ka cam dingih a mit men a danglam vingvo ti nan hmu ding,” ka ti. Pathian rinnak thawn thla ka cam ih, a mit-hmai um daan a thlengh aw. A hnenah hiti’n ka sim: Suak aw, peng khat hrawng tlan awla rak ra saal zo,” ka ti. Ka sim vek cun a tuah ih a ra kir saal tikah, “Atu ahcun ka thawthawt a nuamzet zo,” a ti.

Pumkhawm cu pehzom rero a si. Ni tawkfang a rei hnu ah cupa cu ka hmu saal ih, “Tlangval pa, mipi hnenah na parih Pathian ih tthatnak miseenpi hmai ah sim aw,” ka ti. Cutikah, “Aw, atu cu ka damcakzet zo ih hnattuan in paisa ka hlawh thei zo,” a ti.

Pathian hmin cu sunloih thangtthat in umsin ko seh! Hih rundamnak tiva cu ziangtik hmanah a kaang dah lo ding. Hih tidamnak tidai cu na in thei ve, na kiangnaite ah a um. Cuih tiva cu thukzet in a luang, mizapi hrangah daihcang dingin a tam.

Stefen cu rinnak le huham thawn a khat ih a maksakzetmi khuaruahhar thil tampi mipi lakah a tuah. Hih Thlarau Thianghlim thotho cun nangmah khal a lo luahkhat thei ve, ih thil ttha tampi tuahsuak thei na si ve. Pathian in a lo pe ding. Pathian cu nangmah lo tonghtham dingah a mancia ringring ih atu rori khal ah na nun lamdangter a duh.

Pathian ih Thlarau Thianghlim cun Bawipa Jesuh Khrih a phuanglang ringring. Amah rian aw, duhdaw aw; cule Amah thawn khat aw. “Kan hnenah Khrih a phuang aw duh timi thu hi duh a nung. Amah cu mani, tusun le thaisun a danglam dah lo (Heb. 13:8).

Mi zaraan men kan si ko ding, asinan Pathian in mi maksak ah in tuah thei.

@ Smith Wigglesworth

(Visited 32 times, 1 visits today)

Comments

comments

Comments

%d bloggers like this: