Thlarau Mit Vangter Saalnak

May 20

Tlawngkai Nithum

Thlarau Mit  Vangter Saalnak

Siar: Johan 9:1-11

Na thuzirh fiangtermi in tleunak a pek.

Mi lungmol hnenah fimnak a pek a si.      – Saam 119:130

Kumkhat Sung Baibal:

–   1Sansiarnak 10-12

–   Johan 6:45-71

Nepal miphun Dr. Ruit in siibawi naamte le micro-scope hmang in a liamcia kum 23 sungah mit-mal minung 70,000 zikte khua a hmuter hngai. A farahbik pawl khal an lungawinak langternak fang pe in Katmandu ih amiat laak lonak amai’ mit siizung ah an ra.

Jesuh in taksa mit-caw tampi a damter. Asinan a helhkam deuhmi cu thlarau mit-caw pawl an si. Jesuh ih mit-caw pa a damternak thu a zingzoitu biaknaklam thuneitu pawl in Jesuh cu misual a si lo ti’n an zum cuang lo (John 9:13-34). Curuangah Jesuh in, “Hih leilung ahhin thutthen dingah ka ra, cumi cu mit-caw in khua an hmu ih khua a hmu mi pawl in an mit a cawtnak dingah a si,” (c. 39) tiah a ti.

Paul in thlarau mit cawtnak thu a ngan. “Cuti a si ruangah Thuthangttha kan phuanmi hi thuh a si ahcun a hloral rero mi hrang lawngah thuh in a um. Cupawl cun an zum duh lo, ziangahtile hih khawvel ih khawzing in an thinlung cu thim lakah a ret ringring ruangah a si. Thuthangttha ih tleunak, Khrih sunlawinak ihsin a rami tleunak cu khawvel khawzing cun a phen ringring” (2Kor 4:3-4).

Saam cangantu in, “Na thuzirh fiangtermi in tleunak a pek (Saam 119:130)” a ti. Pathian Thu cu kan mit vangtertu le thlarau mit-cawtnak damtertu a si.

Tleunak ah ra aw, na hrangah a tleu,

Tleunak cu ka parah a tlaang;

Mit-caw ka si dah na’n, atu cu khua ka hmu thei zo,

Leitlun tleunak cu Jesuh a si.

Khawthim sungih leilung in Jesuh ih tleunak a ttul.

(Visited 28 times, 1 visits today)

Comments

comments

Comments

%d bloggers like this: