Thlarau in Thazaang Cakter

March 12
Tlawngkai Nikhat

Thlarau in Thazaang Cakter

Thla an cam ttheh vete’n cutawk ih an tonkhawmnak inn cu a hnin thluh. Thlarau Thianghlim in an khat ih Pathian Thu cu raaltthazet in an sim. – Tirh. 4:32

Bible Siar Ding: Efesa 3:14-21

Mi hmuahhmuah in Pathian ih Thlarau thawn khat dingah lo theih loin kan ttul. Thinlung duhhiarnak ih veikhatte tonghthamnak men in a tawk hrimhrim lo. Minung ih ttulnak famkimter theitu umsun pakhatte cu Pathian ih nunnak sungih kan nun pumhlum hnimpil awk ding hi a si. Himi in a sim duhmi cu Pathian in Amah thawn rualremzet ih kan um theilai hlan lo A Thlarau thawn in khatter rero tinak a si. Curuangah si, “Nan ei ah siseh, nan in ah siseh, ziangkim nan tuah tikah Pathian sunlawinak hrangah tuah uh,” in tinak san (1 Korin 10:31).

Hi tawk zawn ahhin na hmuh thiam dingmi thupizet cu na cahnak zate, na ruahnak zate le na thinlung zate thawn Pathian na duhdawt dingih biakkhawmnak lawng si loin thuthangtha phuansuahnak khal ah thathawhnak na neih a ttul. Hih phuansuahnak hi Pathian ih huham thawn tthen theih loin a fehtlangmi a si ih leilungpi a hnaihnoktu satan ih huham le hnattuannak pawl a tthawnter theitu ding a si.

Tuni ah leilungpi in Jesuh an hmuh le an theih thei lonak asan cu Khristian mi pawl in kan nunnak ah Jesuh thawn kan khat lo ruangbik ah a si. Khristian tampi cu Nipi Ni biakkhawmnak hmun ah zarh khat veikhat khawmnak, Bible siarnak, le a caancaan thlacamnak timi dinhmun ah an duhtawk aw in an diriam men. Duhdawtmi, Pathian in A Thlarau thawn a lo tonghtham ih a lo hruai taktak a si ahcun ziangkim ah na minung sinak a cem thluh dingih Pathian sungih nun hramthawhnak a si ding. Na taksa ruangpum zate vanlam nunnak ih thuam a si dingih Pathian bangnak na nei ding. Pathian in a hmin sunlawinak hrangih a lo hman lawng si loin a lo kilhim dingih nangmah cu “ni sunglawi ih hmanmi bungbel thianghlim na si ding” (2 Tim 2:21).

Kannih hi kanmai’ hrangih nungtu ding kan si lo, ziangahtile kanmah hrangah kan nung asile kan thi ding (Rom 8:3); asinan “Thlarau thawngin taksa duhnak a thi asile kan nung ding” (Rom 8:13). Thlarau sungih a nungtu cu Pathian huham in an khat dingih asinan amah hrangih a nungtu cu an thi ding. Thlarau sungih nungtu cu zalennak, lungawinak, thluasuah, le hnattuannak – midang hrangah thluasuah kuairuttu ah an cang ding. Pahthian in kan zate in Thlarau sungih nung dingah in duhsak.

Jesuh leitlun a ratsan cu Eden Duum ih tluksiatnak sung ihsin vanlam nun ih kan nun saal theinak dingih hruailut dingah a si.

@ Smith Wigglesworth

(Visited 35 times, 1 visits today)

Comments

comments

Comments

%d bloggers like this: