Thlarau Huham Ziangti’n Kan Ngah Ding

March 5
Tlawngkai Nikhat

Thlarau Huham Ziangti’n Kan Ngah Ding?

Pakhat le pakhat hnen ihsin porh le lomnak ngah nan duhzet, asinain amah lawng Pathian a simi hnen ihsin cun thangthatnak ngah nan tum lo; cuti a si ahcun ziangtinso kei cu in zum thei ding?
– Johan 5;44

Bible Siar Ding: Matthai 16:13-19, 21-23

Peter ih nunnak ah thlarau huham a ngahmi langhngan in kan hmu thei, asinan leitlun daan in amahte cangmi huham ih hnattuannak khal hmuh theih in a um thotho. Jesuh in Pa Pathian ih fialmi a famkimter ding tikah harsatnak a ton dingmi a hmu cia. Curuangah Jesuh in Peter hnenah, “Nang Satan, ka hnen ihsin tlan aw! Ka fehnak lamzin khamtu na si, ziangahtile hi bangtuk na ruahnak hi Pathian hnen ihsin a rami a si lo, milai hnen ihsin a rami a si,” tiah a ti (Matt. 16:23). Mah le mah runhim awk na tum asile Pathian na dokalh a si. Ziangtik caan khal ah leitlun milai mit-hmai le huham na hawl asile Pathian mit-hmai ttha na sung dingih zumnak hnget na nei thei lo ding.

Pathian ih thinlung le duhnak kan theih theinak ding hmun pakhat lawng a um, cumi cu Pathian thawn lawng umtlang hi a si. Minung kan zoh asile himnak kan ngah thei lo ding. Kanmahte luatnak kan hawl asile kan hlawhtling lo ding. Midang zohman ih an lo theih sak lomi cu Jesuh thawih pawlkom awknak sungah a um, nitin Amah hrilnak in.

Duhdawtmi, na sungah sualnak a um asile kham theinak le thlah theinak huham na nei thei lo ding. Mi zokhal amah ah zalennak a neih lo ahcun zohman a ruun thei lo ding. Cuti ih a ttong hnu ah an parah a thaw a thawt ih, “Thlarau Thianghlim rak co uh! Mi an sualnak nan ngaidam ahcun ngaidam an si ding; nan ngaidam lo a si ahcun ngaidam lo an si ding,” (John 20:22) tiah a ti.

Jesuh in leitlun a caan netabik ih a ttongtami cu A dungthluntu pawl hnenih Thupek Maksak (Great Commission) a neihmi hi a si (Mark 16:15-18). Dungthluntu si ttulnak cu cem ni a nei lo ding. Tuni kawhhran hrekkhat pawl an derdainak san cu Lungpi a simi Khrih ih a umpi lo ruangah a si. Jesuh hmin in mi na ngaidam thei, na ngaidam lo thei. Na sungah Khrih a nun ahcun A huham cahnak na nun ihsin a lang thei ding.

Duhdawtmi zumtu, atu ah kannih hi Jesuh cu Lungpi a si timi tontehnak sungah kan um. Ka lungawizet, ziangahtile Jesuh Lungpi ruangah mangbangza tuah theitu ka si ve. Jesuh Khrih kan beunak Lungpi cu hnin theih le tthawn theih a si lo timi parah zum ngamnak thawn hngetzet in ding aw!

Lamzin olte thlun na duh asile Jesuh ih dungthluntu na si thei lo ding.

@ Smith Wigglesworth

(Visited 32 times, 1 visits today)

Comments

comments

Comments

%d bloggers like this: