Thlangamnak ih Hrampi

July 22
Zarhpi Ni

Thlangamnak ih Hrampi

Bible Siar Ding: Thuthentu 6:1-24

Atu cu zumnak thawngin thiamcotermi kan si zo ih kan Bawipa Jesuh Khrih thawngin Pathian thawn kan rualrem aw zo.
– Rom 5:1

Gideon in a ttulbikmi cu thlangam daihnak a si. Israel mi pawl a do rerotu Midian ralkap pawl ruangah ttih le khur in a um ih sangvut rialnak lungpuk sungah a relh. Pathian in a minung pawl a taansan zo ti’n a ruat ruangah a thin a phangzet ih Bawipa cu anmah humhimtu dingah rinsan thei a si saal thei ding cu a mang a bang nasa. Cuti’n, Pathian ih vancungmi thawn hmaiton rori in an biak awk ruangah Gideon cu Yahweh Pathian ka hmuh ruangah ka thi ding a si ti’n a ttihzet.

Pathian cu hih mi ttihhrut pa hnenah a phuanglang aw. Gideon ih ttihphannak cu a daiter ih A mi Israel pawl kha Midian raal pawl ih kut sung ihsin ruunsuaktu dingah hnattuan a pek. Gideon cun thazaang thar a la saal, biakttheng a don ih a hmin ah Yahweh Shalom “Bawipa cu Remdaihnak a si” ti’n a ko (Thutthentu 6:24). Gideon cun Pathian thawn an rualrem aw saal zo a si ti a theihnak parah tthum aw in thlangam daihnak a ngah ih Pathian ih pekmi ttuanvo tuahsuak dingin zalenzet in a um thei.

Kum thawngkhat lenglo a rung rei tikah, Pathian in ttihphannak ih a khatmi leitlun minung pawl hnenah thlangamnak thu a sim saal. Jesuh in, “Nan hnenah thlangamnak ka lo tanta. Keimah ih thlangamnak ka lo pek a si. Leilung mi ih pek vekin ka lo pe a si lo. Donhar le vansang in um hlah uh; nan thin khal phang hlah uh,” a ti (John 14:27).

Jesuh lawng hi thlangam daihnak diktak (real peace) famkimzet in mi pe theitu umsun a si, ziangahtile Amah hrimhrim hi thlangamnak a si (Isai. 9:6). Thlangamnak diktak cu ttihphan ding um lo timi hnakin a cuangce deuh. Thlangamnak taktak cu Patian ih laksawng in pekmi a si ih Daihnak Siangpahrang (Prince of Peace) a simi Jesuh Khrih thawn remdaihnak in tuahsak saalmi a si.

Yahweh Shalom, Nangmah si lo a dang ihsin rami thlangamnak cu thlangamnak taktak an si lo ti thei ringirng dingin in bawm hram aw.

Tuni ah Pathian ih thlangamnak taktak hi zo hnenah ka hlawm thei pei?

@ Ava Pennington

(Visited 16 times, 1 visits today)

Comments

comments

Comments

%d bloggers like this: