Thlaici Le Zumnak

November 4

Tlawngkai Nithum

 

Thlaici Le Zumnak

 

Siar:

Galati 6:7-10

 

Milai cun an tuhmi vek cekci in an khawm ding.      -Galati 6:7

 

Kumkhat Sung Baibal:

–   Jeremiah 32-33

–   Hebru 1

 

Sapolh thuanthu cabu ka siarmi sungah, mi pakhat cu store tumpi ah thil lei ding a zoh rerolai ah thil zuartu tonak counter dunglam ah Pathian a hmu ih a lauzet. Cu pa cu a va feh ih “Ziang na zuar?” tiah a sut. Pathian in, “Na thinlung in ziangso a duh?” tiah a sut kir saal. Mipa cun, “lungawinak, hnangam daihnak, zianghman ttih lonak… keimah hrang le leitlun pumpi zate hrangah,” tiah a ti. Pathian cu a hni ih, “A rah cu ka zuar lo, a ci lawng ka zuar,” tiah a ti.

       

Galati 6 sungah Paul in Pathian ttihzah upat ih nun thlaici tuh ding a thupit zia a sim, ziangahtile “milai cun thlaici an tuhmi vek cekci in an khawm ding” (c. 7) a ti. Kanmah lam ih kan tuah dingmi a thupit zia kan theihthiam lo ahcun Pathian hnen ihsin thluasuah rah ngah ding cu ruahsan ngam ding kan si lo.

     

Thlaici ttha a vorhtu pawl ih nun daan zohtthim ih thlunnak in tthathnemnak in pek in in bawm thei a si. Cangantu Samuel Shoemaker in hiti’n a sim, “A si, anih nu (pa) cu khivek a si. Anih cu thinhennak, donharnak le thintawinak pawl in keimah vekin an hnaihnok thei lo; anih hmuah a lungawi thei ringring.” Shoemaker in a simbetmi cu, “Cumi hrangah a do rerolai cu kan hmu lo nain a ttuan nasa thei men. Kannih khal amah vekin kan zuam ve asile kan ngah ve ko ding” kan ti thei.

 

Na thin a baang maw? Pathian hnenah bomnak dil awla cangvaihnak thar thlaici tuihsun in vorh thok aw. A caan a kim tikah Thlarau in a karhzaiter ding.

 

Nitin thlaici vorh in kan nung,

Kan ttuan le kan ttongnak ihsin;

A rah ttot ngah tengteng ding cun,

Nitin thil ttha kan tuahmi parin a ra ding.

 

Tuih sun ih kan tuhmi thlaici in

thaisun ih kan lawh dingmi thlairah a relcat.

(Visited 33 times, 1 visits today)

Comments

comments

Comments

%d bloggers like this: