THLACAM PHI KAN NGAH THEI LONAK SAN (8)

THLACAM PHI KAN NAGH THEI LONAK SAN (8)

By: Evan Tha Nei Fai

1.Pathian thusung ih kan nun lo ruangah

Jesuh in, “Keimai sungih nan nun ih ka thu nan sungih a nun ahcun nan duh mi pohpoh dil uh la peek nan si ding” a ti. ( Jn.15 :7 ). A thusungih nung timi cu a Thlarau fial daan poh ih nun,a si lo le Bawipai thuthu ih nun tinak a si.Minung khalin kan thu ngaiih in
tihzah derhdo tu pawl cu an hrangah uimi kan nei ve lo.Pathian khalin a fapa neihsun hman ui lo in in pe ih thil dang ziang kim in pe siang theh ko nan a thu sungih kan nun lo ruangah in pe theu lo.

2. Thinlung thukthunnak thawn thla kan cam ruangah ( Jeim 1: 6-8 )

Bible Cathianghlim sungih kan hmuh mi cu mizo khalin thla a cam tikah Bawipa in in pe tengteng ding a si timi zumnak hngethngai thawn cam hai seh.Thinlung thukthun cingih thlacam cu thlipi in ti finriatti a hranih a awn rero vek men fang a si a ti.Nu le pa khalin
kan fa le pawlih thil in dil tikah in peek lo khal le a poi lo ti veek thinlung thawi in dil ahcun peek kan hiar leem lo.Thinlung hngethngai thawn Bawipa in ka thlacam in pe tengteng ding ti ih kan thlacam mi cu Bawipa’n in let theu.Zumtu tampi cu kan thlacam mi Pathian ih in leh le leh lo hman kan thei cuang lo. Ziangah ti le Bawipan i pe ding timi
zumnak thawi thla kan cam theu lo ruangah a si.

3. Sualnak kan poisa lo ( Saam 66 : 18 )

David Siangpahrang cun, ” Ka thinlungih sual ka ruah ih sualnak ka poisa lo a si ahcun Pathian in ka thlacam i let lo ding ” a ti.Midang thinna nguahngo ko ih tuah cingih thlacam,Leiba rul duh lo cingih thlacam, nupi pasal thawi to aw theh pekih ngol phah cingih thlacam,huatmi nei tengteng phah cingih thlacam pawl hi cu van thleng tlak an um lo tiah BIble cun in zirh.Sualnak na neih mi pawl ruat tha awla Pathian hnenah ngaih thiam dil hmaisa aw,cule na thlacam mi van a
thleng ding.

4. Daan kan thluun lo ( Thufim 28:9 )

Bawipai daan poisa lo ih thlacam cu fihnungza a si tiah Cathianghlim in in zirh.Kan thusim ziang siar lo emem kan fapa in hnipuan man khungzet lei ding in dil sehla kan thinai athok mai ding.Asinan kan daan thlunih in tihzahtu cu in dil lomi hman peek kan
siang ding.Pathian cu a daan upattu a si.A daan na ngai poimawh le na thlacam a lo ngai poimawh ve ding.

5. Sualnak kan zeep (Jeim 5:16 ;Thufim 28 :13 )

A dam ih fapa Kaina in a naupa a thah tumah khan Pathian in, ” Kaina,na naupa khuiah a um? “tiah a suut.Kaina cun, ” Ka nau khaaltu ka si ual lo ” tiah a sual a zeep.Curuangah Pathian ih ngaidamnak a co thei lo.Bawipa ka Pathian na hmaika ah hin misual ka si,thiltha lo cu veek,kha veek ka tuah in ngai dam hram aw titu pawl ih thlacam cu
Pathian in zamrang zetin a let mai theu.

6. Zumtu pakhat le pakhat kan duhdawt aw lo (1 Jn.3:22-23 )

Zumtu pakhat le pakhat relse aw rero,dodaal aw tiatia cingih thla kan cam mi hi Satan ih thakthak khawih saktu men kan si. A hnih a suak men ding.Zumtu pakhat le pakhat duhdawt aw derhdo te ih kan um khi Satan in a hua ngaingai.Kan ram Khrihtian pawlin kan tlaksam emem mi cu pakhat le pakhat duhdawtawknak hi a si.

7. Pathian duhdaan thawn mil-aw in kan dil lo ( I Jn.5 : 14 )

Pathian cun a mah tihzah cingtei tuan le hawl ih nuamtete ih neih nun ter in duh.Kan nih in vei le katih lian le neihnun kan duh ih Pathian kan ngen.Khritian nun ah PHIAT- LAAN a um lo.Bawipai duh zawng ih thlacam ti hi a va thupi em.Jesuh cun, ” Ka pa, rem na ti ahcun hi khuathai hi in thawn sak aw,a sinan keimai thu si lo in nangmai thu sawn si seh ” tiah a ti. Pathian duhdaan thawn kaih aw ih thlacam hi zir a tul.Bawipa ,ka duh daan lawnglawng in na hnenah thla ka cam theu ih tu cu nangmai duhdaan sawnih thlacam in zirh aw ti a tul.

8. Kan mai hlawknak ding lawng ruatin thla kan cam ( Jeim 4:3 )

Kan mai hlawknak le lennak ding a si ahcun midang ih tlaksiat kan poisa lo.Hihi KHUavaang hrangih catanii a si.Elijah in thla a cam tikah a mai hlawknak le miatnak ding tel riai lo in kum 3 1/2 van ruahti suur lo dingin thla a cam.A duh san cu ziang maw?
Israel pawlin Pathian nung an theih ih an tihzah theinak dingah sa si.A mah ci tidai in ding hman nei lo in a um.Kan Pathian ih hlawknak le sunlawinak ding a si ahcun kan caan ngam a tul. Curuangah zumtu cun kan mai hlawknak si loin midang hlawknak
le kan Bawipai ram karhzainak ding hrang ruah sanin thlacam cio uh si.

A thu kan ngaimi Pathian in thlawsuah in peek sak hram seh law….a men

(Visited 43 times, 1 visits today)

Comments

comments

One Comment

  1. Hi sermon chu a tha tuk lom mam, siar anuam law lawa si. Chulailakah, keicun, kan thlachamnak hi Pathin nih in letthluh tih hi ka pawm dan a si. Nan, inleh dan sawn chu a bangrep lo. Eg. 1. Na hrangah a tha lo, 2. Nghaktento hrih aw, tiin leh 3. Na hrang a tha a si, ti. Zumtu pawlin kan thlachamnak hi Pathian nih in let thluh a si, nan in lehdan a bangrep lo, ti’n thla kan cam tikah mang theu se la, kan hna a ngambik lo ding sawm?

Comments

%d bloggers like this: