Thinsau Cu Hlawhtlinnak

Thinsau Cu Hlawhtlinnak

Zanlamnazi pathum hrawng a si ih Parte cu innlam pan in rualpi pawl thawn an feh. A rualpi pawl in an pialsan vivo ih a mah lawng a tang. A feh laiah a thinlung ih a ruahmi cu ‘thaisun tlawnginn ah tlawngkhuan 500 ken a tul. Culawng hman a si hrih lo, thlacemni le a sisi tuition man tla thawngkhat pek a tul ding’ Cu ti ih a nu hnen ih paisa dilding a ruahah a thin a har. A nu dilding cu a hreh ngaingai. Nidang ai ih simdeuh ah inn a thleng ih a nau le pahnih Lalte le Mawite cu inn an rak thleng zo. Inn a thlen vete’n a nu cun ‘Parte ziang ruangah na tlung sim’ ti’n awka hro nawn cun a rak ti. Cule Parte cun awka nemte cun ‘ka nu, rualpi innah malte ka pial phah ta ih curuangah sokhaw’ ti’n awka nemte cun a vun sawn. A nu cun ‘ phunkua na thleng thlang ; inn hman thleng ta lo ih rualpi inn ih lenmen tivek, inn lamah hnatuan ding kan nei tamtuk ti na theilo maw si’ ti’n a vun kawk bet.

Cule thaizing tlawngkai a hung cut thlang cun Parte cun tlawnginn ih a ken tul zat paisa cu a nu a dil. Cutikah a nu cun ‘paisa le nan hlawh thei si lo, tlawngkhuan ti ringring khal ka ning tuk/ ti/n a rak hro lala. A nui’ tong a cem zawngah a nau Mawite cun ‘ ka nu, kei tla sayamah in 500 ken a tul in ti’ ti’n a vun sim bet. Cui’ a tong a cem vete’n Lalte cun “ka nu, ka cabu a cem ih cangannak ding ka nei nawnlo, in leisak aw” a hon ti bet. Cutikah a nu cun “unau thum tlawng lo rek khal paisa nan heh tuk, ca le nan thiam si lo, paisa cemnak lawnglawng ka ning tuk”  tiphah cun an tulzat ciar cu a pek.

Parte pa,U Hrang Uk cu zung hnatuan a si ih mi neinung zet a si. Parte nu, Daw Sung Cin khak mi zirsangzet a si ve. Asina’n harhdamnak lamah tlaksamnak neimi a si.Mi tawntai zet a si nan hmuihmel lam ahcun zoh co tak a si. Milian fafu a si vekin a vanglai ahcun  mikip in duhthu an rak hlan theu. Cuti’n milian fa veve an rak co aw ngah in an nuam aw zet. Asina/n Parte nu cu tu khalah hna a tuan thei lemlo. Inn lamah a ummen theu. Zingkhat cu an nupa in bazar an kai. U    Hrang Uk cun Iangte rinlo pi’n a tong ngah. cule Iangte cun “U Hrang na dam maw? himi cu na nupi maw?’ ti’n a vun sut. Hrang Uk cun ” si ee, himi hi ka nupi si fate pathum kan nei zo. kan zate’n kan tunghmun lai takfang a si” ti’n a vun sim. Hrang Uk cun ‘ Iangte pasal teh na nei zo maw? ” tin a vun sut bet. ”ka nei zo na’n vansiat ah in tansan zo” ti’n mithmai nuam lozet in a sawn. U hrang uk khal    cun ”fa teh nan nei zo maw/ ziangtikah saw a lo tansan” ti’n a vun sutsal. ”fa khal kan nei hrih lo. Kan pa cun kan neihawk hnu thlahnih hrawngah in tansan” ti’n thate’n a sim. Iangte cun a hlan ahcun U hrang uk hi ”pa Hrang”ti’n a rak ko theu. an zoh aw cuahco ih an fehsan aw muarmo.

Pa Hrang le iangte hi rak duhaw zetmi an si dah na’n Pa hrang ih nulepa hi’n ”mi zonzai le retheifa Iangte cu na thi hrimhrim loding” ti’n an rak kham. Cule an mah vek ih mi neinung cinte thawn nei aw dingcun an tawlrel sak. Iangte cu mi farah fa a si ruangah ramdangah paisa hawl in a feh. Ramdang a um ih kumkhat hrawngah Pa hrang ih nupi neih thu cu a thei. A thin a na zet na’n ” U Pa Hrang ih nupi ding ahcun ka tlak lopi ” ti’n a hnem aw.

Cinte cu cathian a sina/n a fale pawl cu a sim huamlo. Ca an suh khal le ”tlawnginn ah ziangah saw thate’n nan ngailo, nan tlawngkai man teh ziangsaw thahnem ”ti’n sim khal sim cuang lo/n a kawk bet theu. Cinte cu mi kawk le miphun lawnglawng a thiam ih a fa le pawl in an ning thei ngaingai. kum a liam vivo ih Parte cu phunhra a si thlang. Zingkhat cu phunhra result a suak  ih vansiatah Parte ih hmin cu a tello ngelcel. A nu cun thinheng zet cun ”hivek cathiamlo fa lo neih khal hi, nulepa mualphotertu men, mi nulepa hmuah an lungawi an vak rero. Kan nih cu innleng hman kan suak ngamlo. Na border umnak man pawl khal hlawhthluh sal aw” ti’n a kawk bet ciamco. Parte cu a sung ih a ninghan bet ih hleiah a nu ih a kawkbet ih a thin a na sinsin a tap rero. A nu cun ”na tap ngam bet lai” a vun ti lala.

Pa Hrang cun ”Cinte kawk nawn hlah. Tuikum a kaisal kei hmai kumah hmattha in a ong ding sisi” ti/n a vun ti. Cinte cun ”na fa le na tan tuk ruangah ziang thusim hman an theih lo hi na thei lo mawsi?” ti’n mithmai se zet cun a vun kawk hluaihlo. A pa cun Parte phunhra phi sal ding cun a lem rero. Asina’n Parte cun ”ka pa, ka kai nawnlo ding .Paisa khuan ding le cabu lei ding tinte’n ka nui’ mithmai zoh a har tuk. Ka nu paisa dil ka ngam nawnlo. Border um man le a khung si” a ti ih tlawngkai nawnlo in a cawl lan. A nau le pahnih khal tlawng an kainak ah ca thiamlo lamah am tang thei ringring ih a nu cu an cazoh a kil theu. A kil phah cun a kawk phah rero. Camibuai an tuah ih an thiam deuh cuanglo.

A pa cun,”Lalte le Mawite teh na nu in cazoh a lo kil ringring fawn ziangahsaw nan hmat a va tha cuanglo ve?” ti’n a ti. Cun an nih in ,”ka pa, ka nu cu in kawk rero ih ca khal kan zoh theilo. Cahmai ah kan to ve maimai si”an ti. A pa cun ”si ngai ding, na nui’ mi kawk ringring rori cu” ti’n a ti ve. Lalte le Mawite cu ca an thiamlo deuhdeuh ih tlawnginn khalah saya pawl ih kawk an tuar deuh ringring. Inn an thlen le kawk ding le hro ding rori hawltu a nu an tih si, thinnau hniaphni te’n an um cuahco men.

Zingkhat cu Cinte mi harhdam lozet a si vek in a bese hruak. Sizungah a zamrang theibik in an fehpi naq’n sizung an thlen hlanah lung lo dairial ah a cang ta riai. A fa le cu nu nei lo in ninghang zet in an tap rero. Cinte ih thihsan hnu thlathum hrawngah an Pa bik U Hrang cun Iangte cu a thisal. A fa le pawl cun an lungkimpi lo nasa. ”mi kawk hmang tuk tla a si pang ahcun” an ti aw rero. Iangte le Pa Hrang cu an rak duhaw cia. Sente cai sihmamsehla khucu nuin le dinhmum sang le niam cu neihawk rem a tilo abang. Iangte cu fa a neih lo ruangah Pa Hrang ih fa le pawl cu a duak ngaingai. Cule Iangte cu mi thinsau le mi tangdawr zet a si ih lalte le Mawite tla cu tlawngkai duh dingin a forh rero.

Lalte le Mawite hnenah, “Tlawng nan kainak ih a tul mi hmuahhmuah in sim uh, hmaisong khal a tul lo. Fimthaimnak  ahcun paisa kan ten lo ding.” ti’n Iangte cun a sim theu. An unau hrangah cun tlawng khaun dilding khal hreh a um lo.

Iangte cu phunhra ong lawng a si nan Mawite le Lalte ih cazoh cu a kil theu ih an thiam lo mi pawl a theih tawk in a zirh theu. Cule Parte khal tlawng kai sal ding in a lem ih Parte cu tlawngkai sal a tum. Parte cu vanthatnak ah hmattha zet in a ong ngaingai. A nau le pahnih khal an khan sungah ca thiam bikah an cang. Saya pawl in,”Hi tei’h unau cu an va danglam thlangve! Ca thiam lo bik in cathiam bik ah an cang.” ti’n an lawm ringring. A hlanih an kawk nak pawl cu an hngih thluh. Pa Hrang cu a fa le ca anthiam thlang ih mithmai tha a co. Saya pawl khal in Iangte cu an uar nasa. Fimthaimnak a uar ih a thupitter zia an hmu ih an upat zet. Parte tei’ unau thum cun, “A hlan kanu in hi vek in ca in rak zuam pi in ca kan suh tik khal ah thinsau zet in in rak sim theu sehla, Saya pawl ih kawk khal kan tuar lo ding nan.” an ti aw rero theu.

Pa Hrang tei’ innsang cu nikhat hnu nikhat an nuam vivo. a fa le pawl le hmin an nei vivo. An unau thum in an thalngso vivo ih Saya pawl ih nan ngah thei dah lo ding an ti theumi degree cu  an nu bik Iangte ih zarah an ngah thluh. A hlanih kawkaw ringring innsang cu innsang nuam tiih miih rel celcel miah an cangta.

Hmimsin. 2009 Lailun Mekazin ih suahzomi a si.

Mai Zilthli Lal Nei Thluai

(Visited 155 times, 1 visits today)

Comments

comments

Comments

%d bloggers like this: