Thinlung hrang Arsa Hang

Thinlung hrang Arsa Hang

Mi Relsiat Hmang

Lettu:   JC Kip Ling

Nupinu pakhat hin midang thusim sawng theiin a innhnennui’ siatnak thu a a rel ciamco. Karlote ah cui thu cu khawpum in a thang hiaihiai. An relmi nu cun rak thei ve khaw, a thin a na tuk lawmmam. Lehhnu khawraang ah a relsuaktu nu cun thu hman lo a si thu a theisuak sal. A thin nuam lo tuk cu, mifim pakhat hnenah, ziangti’ ti tha saw ti a va sutron.

Cui mifim cun, “Bazar ah va fehin arpi va lei awla, thah cia in run tlun kei ci. Cun, na ra tlun zin ah a hmul rak bawi phah vivo awla, lamzin tluanah run darh vivo aw,” tiah a rak sim. Mangbang zet cingin mifimpai’fial vek cun a tuah.

A thaizing khawvan ah mifimpa cun a hnenah, “Va feh awla, mizansun ih na arhmul dah mi hmuahhmuah kha va sam thluh sal aw,” tiah a ti.

Nupinu cun mifimpai’ thulung vivo in, a arhmulpawl cu va samsal a tum. Thliin arhmul cu a rak fen thluh relrel ih a hawlbuai ciamco. Heh le mang a hawl hratin arhmul phang thum te vial a rak tlun thei. Cuisin, mifimpa cun, “E mawi, arhmul kha a phawt cu a ol zet, sinan samthluh sal cu a theih lo a si. Mirelsiat khal hi cuvek thotho a si. Thusia hlasia simih mi relsiat cu a ol zet nan mi’ thinlung na natter zo mi cu a thawidam sal theih lo a si,” tiah a sim.

Ca Thianghlim

Duhmi Abby,

Mi neinung sungkhaw pakhat ihsin tlangval suakthuan pakhat hi phunhra a hun ong ve. An khua ih mi neinungpawl cun fate phunhra ong an neih tinte’n car thar leihawk hi an lomsak dan a si tlangpi. Bill tei’ pafa khalin an duh-er khen rori voi ziangmawzat an rak hawl theu.

A phunhra on lom zanih Bill ih lunglai tlak lo ding zia hi vun ruahpi ve hnik. A pa cun ‘Car’ si loin ‘Bible’ a pek riangri cu teh! Bill cu a thinheng tukah ziangsimaw a bang. Bible cu leilungah a hlon hlukhli ih ngoltau in a tlansuak vurvo. Cui’ ri in, a pa thawn voikhatte hman an tongaw nawn lo. A pai’ thih thu theiin Bill cu a ra tlung sal.

Zan khat cu a pai’ thilri le sekrek a senghoi laiah a pai’ Bible rak pekmi kha Bill cun a  sar hlulhli. Lei-pawl miammiam cu a  hnulfai ngahin, a vun kau. Bible sungah cun paisa cheque (bank ih sum retmi suahnak lethmat), an pafa ih an lungthlitum car leinak ding daih le phunhra on ni ngannak cu tha iam-i te’n a rak ther-aw.

Thu laknak : Chicken Soup for the Teenage Soul

Sermon Feh Thei

1953 kum siim khat cu Chicago tlangleng cawlhhmun pakhat ah thuthanglatu le khawpi sung hotu lu-ban pawl cu an suakkhawm luihlo. An mi hmuahmi cu 1952 Nobel Peace Prize(Leitlun ih sunlawihnak laksawng sangbik) dongtu  a si. Tlangleng a ra thlen hnu tibur hmawm-thul hrangah, pacang tum liailiai – feet ruk le inches li- sambuk le khabe hmul bembem pi, hi tlangleng sung ihsin a rung suak. Camera cu nimthlakau vekin an tleu zukzo. Khawnu-khawpapawl cun a kut kaiin an rak hmuak celcel. Amah an ton ngah thei ruangah, mipipawl cun, lungawithu sim an cuhaw hluahhlo.

Mithmaipan te le hawihhawm takin lungawithu a sim hai. Mipi lu tlun ihsin a pawnlam cu a cuan ringringih, mipipawl cu reilote rak ngaithiam duak dingah a dil hai. Cun zamrang fahranin mipi ruul lakah a fehih, midum nutar pakhat a puantom fun hnih rak thiar buai rero cu a va pan. Hni siamsi te’n cunui’ puantom cu a cawi lokih, bus hmun tiang a va thlah. A bom ngahin, lamtluang dingih a duhsak thu a sim ta. Amah rak hmuaktu mipi hnen a va thlensal tikah, “In rak hngah a tul cu poi ka ti zet,” tiah ngaithiam a dil hai.

(Visited 110 times, 1 visits today)

Comments

comments

2 Comments

  1. Francis Lal says:

    Chicken Soup For The Soul sungih thuhla hrekkhat pawl lawrkhawm in kan t’ong ih leh rero lai a si.

    Cabu in a suak cing ding…

  2. CT ih tlawmngai ih ca ngantu pawl hi ka lo uar zet hngai.Fakselnak ih ka rel ve duhmi micu,kan lai tawng ih a um micu laica ten ngan thei tum sehla ti’n .Cule,kan Lai tawng kilkhawi in ka ti thangso vivo thei ding.tahthimnak ah aparih ngan mi “. Lehhnu khawraang ah a relsuaktu nu cun thu hman lo a si thu a theisuak sal.”
    Thu hman tinak zawnah Thudik ti in ngan sawn sehla……

    Lungawi.

    Salai Thangte.

Comments

%d bloggers like this: