Thil Tha Sawn Na Tuah Thei

Zinglam ih zung feh ding in Mr. Khanna a tim a tuah thluh rual ah a nu pi cun cumi ni ih sawp ttul mi hnipuan mallai cu hnipuan sawpnak ih ret phah ding in a sim. Mr. Khanna in, “Ziangah?” ti ih a sut tikah, a nupi cun, “Kan hnenum hi tuini cu a tunu hnenah a feh tum. Bus khelh ding in zingte’n a feh a ttul ih, ni hnih sung a va cam ding,” tiah a sim. Mr. Khanna in, “Ni hnih sung khuiah a feh ding?” tiah a sut sal. Cutikah a nupi cun, “Thaisun khi a tunu ih suahcam a si. Curuangah va lompi ding le can va hmanpi ding in a feh zik,” tiah a sim. Mr. Khanna cun, “Awle, ngah ko,” a ti ve.

Asinan a nupi cun a ttong a peh ih, “A dang pakhat a um lai. Laksawng ah Rs. 500 pe sehla a ttha pei maw?” tiah a sut. Mr. Khanna cun, “Tu ahcun ziangruangah? Christmas can ah kan pe ding si,” tiah a sawn. A nupi cun, “A si ko nan, a hlawh hi a daihcang aw lo zet ih, tui ttum hi a tunu va tlawng ding a si fawn. Thilri man a kai vivo fawn ruangah sumpai a nei daihcang lo tla a si thei. Laksawng kan pek belh ahcun a daih aw deuh ding ka zum,” tiah a sawn.

Cutikah Mr. Khanna cun, “Duat, na thinlung a no tuk ih, donhar mi na ngah tuk a si kha,” a ti. Asinan a nupi cun, “Phang hlah aw, pizza ei ding ih kan vahsuah ding kha ka tthulh mai ding. Cuti’n laksawng ah Rs. 500 cu kan pe thei ding,” a ti. Mr. Khanna cun hni siamsi phah in, “Ka kaa sungih lut zo mi pizza phorhsuah na man zo a si cu….A ttha ko, pizza phek ruk sungral ding khop ih tuah na duh mi cu tuah ko aw, a ttha si ko,” tiah a sawn.

Ni hnih a rei hnu ah an hnenum cu a ra kir ih, zial a thenfai rero. Mr. Khanna cun tohkham ih to phah in, “Na tunu thawn can nan va hmang nuam maw?” tiah a sut. Hnenum cun, “Aw, ka pu, hmang nuam tuk lawlaw. Ni hnih sungah Rs. 500 kha ka hmang thluh!” tiah a sim. Mr. Khanna cun, “Taktak maw! Ziangtin Rs. 500 rori na hmang cem lohli?” tiah a sut sal.

Hnenum cun lungawi zet ih hni siamsi phah in, “Rs. 150 thawn ka tunu hrangah hnipuan zun khat ka lei. Rs. 50 thawn mutthai ka lei ih, Rs. 100 cu bus ticket hrangah ka hmang. Rs. 50 thawn ka fanu hrangah faute ka lei ih, Rs. 50 thotho in ka makpa hrangah taikhap ka lei. A tang lai mi Rs. 100 cu tlawnginn ih ttul mi khedan le cahnah pawl leinak ding ah ka tunu ka pe,” tiah a sim.

Mr. Khanna cu a mang a bang. Pizza phek ruk thuhla a vun ruat sal. Pizza phek khat cio cun a ruahnak an run luahkhat vivo. An hnenum ih paisa a hmannak le vei khat ih an ei cem ding mi pizza ih tthathnemnak pawl a vun khaikhin. An hnenum in an innsang ih minung hmuahhmuah hrangah thil a lei ih a tunu ih suahcam a hmanpi thotho dan vun ruat in mak a ti tuk. Cumi hmuahhmuah cu pizza leinak man fang a si fawn. Cumi ni ahcun thil thar pakhat a hmusuak rori.

Kan hlawhsuah mi sumpai hi kanmai’ lungawinak ding hrangih hman theinak kan nei thluh ko. Harsa zet ih na hlawhsuah mi sumpai na hman dan thu ah midang in iksik theinak an lo nei lo. Asinan sumpai na hman dan kha tthahnem deuh, sunglawi deuh le man nei deuh ding ih tuah na duh a si ahcun a tlun ih na siar mi thuanthu hi vun mang suak ttheu aw. Na tuah tengteng ttul mi cu a si hran lo nan, tthatnak na tuah mi fatakte in mi pakhat ih nun kha kalhmang tampi in a danglamter thei a si ti cu va hngilh hlah.

Sirhsan: Ngantu theih lo mi ” Your Chance of a Greater Good.”

Singlianuk Kianghrol

Comments

comments

Comments

%d bloggers like this: