Thil Mankhung Hawl

January 1, 2010

Tlawngkai Ninga                                    

 

Thil Mankhung Hawl

 

Siar:

Thufim 2:1-9

           

Ngun bangin ngah na duh ih, Hlawnthil thuhmi bangin na hawl ahcun…. awipa ttihzah cu ziang a si ti na thei dingih, Pathian theihnak cu na hmu suak ding a si.   – Thufim 2:4-5

 

Kumkhat Sung Baibal:

–   Seemtirnak 1-3

–   Matthai 1

 

January 1, 2008 ah Keith Severin le a fapa kum 7 mi Adrien cun ni khat ah a malbik minute 15 sung thil hawl tlang dingin an lung a kim. Carlos Alcala ih cahram nganmi Sacramento Bee in hiti’n a sim: Nikhua ziangvek a si khal ah nitin tein thil hawl an feh. Kumkhat a rei tikah paisa pia nawi, kohti bawlung, a thar ah tuah saal theimi plastic le canphio ih tuahmi palang, kheng, thawl tivek thil phunphun paisa $1000 lenglo man an khawl ngah.

     

Nikhat ah minit 15 sung Bible sungih hlawnthil hawl dingah kan relcat aw a si ahcun ziang kan tong pei? Solomon in, “Fimnak cu ngun bangin ngah na duh ih hlawnthil thuhmi bangin na hawl ahcun… Bawipa ttihzah cu ziang a si, ti na thei dingih Pathian theihnak cu na hmu suak ding a si…a dikmi, a tthami le ka tuah dingmi ziang a si, ti kha na thei thei ding” (Thuf. 2:4-5, 9) a ti. 

     

Tthanlennak cu hmakhatte ah a ra cang lo ding. Pathian Ttongkam kan siarnak le A Thu kan ngainak ihsin nikhat hnu nikhat nuam teten kan thlengh aw vingvo ding. Van ih kan Pa thawn tikcu caan hman tlang cu ziangtluk a tthahnemmi covo le nomnak so a si ti ruat aw.

     

Cumi cu pumpek duhnak thinlung in hram a thok ih hmuhtonmi pawl ruangah thinlung thathawhnak in fimnak le kumkhua nunnak hlawnthil lam ah pehzom in a hruai vingvo.

 

Thil mankhung retnak Ca Thianghlim ah hawl aw,

Hlawnthil hawltu ih leilung a laih bangin;

Hawl awla na tong ngah tengteng ding,

Na thinlung liantertu hlawnthil pawl an si.

 

Pathian ih thudik hlawnthil pawl cun

tong suak dingin in hngak ringring aw.

(Visited 24 times, 1 visits today)

Comments

comments

Comments

%d bloggers like this: