Thein Sein Le Aung San Suu Kyi In Kan Ram Lungrualnak Taktak A Thlenpi Thei Pei Maw?

Ahlan ih Ex-General le atufang ih kan ram President, Thein Sein in tukum Sep thla, New York ih UN General Assembly meeting a kai ṭum, ahkhan BBC thawn interviewnak ah, “Kannih cun kan duh vekin  remsalnak kan tuah lo, ziangahtile kan duhmi cu mipi

ih remsal duhmi tuahsak ding kan duh ruangah a si. Curuangah ka hmailam thu khal cu mipi pawl le an duhmi parah a ṭhum-aw a si,” ti’n a sim. President Thein Sein in Aung San Suu Kyi cu tuni ahcun kan ram Parliament ah to in Constitution daan hrampi pawl remṭhat dingin a siang. Hihi British sal ihsin 1948 January ih zalennak ngah hnu rampi ih zanthim caan pawl liam in nithar suah caan cu a si.

Tukum October 12, 2012 ni ah President Thein Sein cu Union Solidarity and Development Party in an Chairman dingah hriltlinsal. Himi in rampi daan hrampi (Constitution of Burma, 2008) ih khammi rampi President le Vice-President a ṭuan lai rerotu cun party pakhat ih Chairman a ṭuan phah thei lo ding timi daan cu a pahbal. Ralkap acozah ih ciahnehnak lang cingin Thein Sein cun ralkap acozah hnakin a lungkim um zetmi thilṭha deuh cu a tuah ngaingai. Thein Sein in March 30, 2011 ah president a ṭuan ih, reilote October ah thawngtla tampi cu a suah. Amnesty International, ngaidam ih thlah zalennak a si ko nan, zateek 10 lawng (ni 100 thawngtlak ding sehla ni 10 ngaidam) ngaidam a si. Cun 1962  ihsin a um dahlomi ramthukhel ruangih thawngtla 200 lenglo cu a suah zalen. Daan tampi khal thlah zalen zetin a rem hrih ih ramthuhla ah khal a hmaisabiknak cangvai theinak khuan pawl a pek.

Cun kum 50 sung acozah dodal rerotu group tampi thawn remdaihnak a tuah thei. Thein Sein in 1997 ihsin ASEAN (Association of Southeast Asian Nations) sungtel si zomi cu a hngetter. Thein Sein in president a tuan sung ah economic remṭhatnak tha a pek ih, ramdang sumpai thlengnak hmunternak le pursumleilawnnak phunphun sersuah vivonak pawl cu ramsung ah a tuah. Cun dolettu party ih hruaitu Aung San Suu Kyi ih anka khal a ngai ih Kachin Ramṭhen ah China Power Investments Company in $3.6 billion cem in, khaw 60 hlo dingmi le, electric tha 6,000 mw a suah thei dingmi Myitsone hydroelectric tidai khamnak (dam) khal cu mipi ih duhlonak le dilnak ruangah a cawlsal. Ziangahtile mipi in an duh lo ruangah a si. Ramdang ihsin sumpai phumlutnak cu 2011 sung ah $10 billion sungah $7 billion cu Tuluk ram ihsin a lut! Hitluk ih a lutmi hi kan ram ah Tuluk pawl cun canvo a ngah mal vivo tiih thuthang a um cingin a si.

Cun 19 August 2011 ni ah President innpi ah Thein Sein le Aung San Suu Kyi an tong-aw mi in leitlunpi ih theihpimi le pompi tlakmi thiltum zet cu Thein Sein in a tuahngah ti cu zohman ih el theihmi a si lo. Than Shwe san a cem cuahco zawng 2010 Nov ah Suu Kyi cu innsung khuahkhirh a sinak ihsin zalennak a ngah. Culai ahcun Thein Sein cu Prime Minister a rak si. Cun  Suu Kyi ih hnaṭuan ṭhatdan cu 27 September 2012 ni ah UN General Assembly pi ah Thein Sein cun a sim ve. Suu Kyi ih thleng danglamnak a tuahdan ding programme pawl hi a thil cangtheimi a siih a ṭhami a si tiin a porh. Suu Kyi US a tlawng ṭum khalah Thein Sein cun US in Suu Kyi a zohṭhat ruangah a lungawithu a sim hrih.

Atu lala ah Monywa ih copper khur ah buainak a suak ih ralkap le Tuluk pawlin mipi pawl tlunih an thiltidan  hi ruahngam ding ci a si lo. Dec 1 ah President Thein Sein cun buainak suaknak hmun ah Suu Kyi ih hohami, Suu Kyi le dungthlun 30 pawl cu thubuai ah vehvai ih cingfel dingah a thlah.

Kan ram in hivek ih ṭhaten hmunkhat te-ih hnaṭuan tlang ding a hngak hnu kum 64 lai  a rei zo. Atu tikcu ah teh Thein Sein le Suu Kyi kom-aw ih ṭuantlangnak in kan ram lungrualnak taktak a suahpi thei pei maw?

Comments

comments

Comments

%d bloggers like this: