Theihpitu pawl

May 28  | Tlawngkai Nili

Theihpitu pawl

Siar:    Tirhthlah 1:1-11

Sikhalsehla nan hnenih Thlarau Thianghlim a thlen tikah cahnak huham thawn nan khat dingih Jerusalem le Judea ram le Samaria ram hmuahhmuah le leilung tlun a deng tiang Keimah ih theihpitu (tetti) nan si ding, tiah a ti.    – Tirhthlah 1:8

Kumkhat Sung Baibal:

2Sansiarnak 4-6

–   Johan 10:24-423

Theihpitu (witness) timi cu sualpuhmi thu thawn pehpar in thudik an theihmi hmuahhmuah thutthennak zungah simtu an si.

Cutivek in Jesuh in a Thuthangttha karhzainak le a Kawhhran dinh dingin raalttha le rintlak theihpitu pawl a hmang.

Jesuh van a kai hlan ah a dungthluntu pawl kha miphun hmuahhmuah hnenah  Amah theihpitu si dingin thu a pek hngai. Thlarau Thianghlim an hnenah a ra dingih cahnak huham thawn an khat tikah leitlun hmuahhmuah ah Amah theihpitu an si ding thu a sim (Tirh. 1:8).

Jesuh in a dungthluntu pawl hi leitlun khuazakip ah feh in Amah thei hrih lotu pawl hnenah an hmuhmi, an theihmi le an tonmi tettikhan dingin a ko hngai (Tirh. 4:19-20).  A nunlai thu, a thu zirhmi, a tuarnak, a thihnak, an vuinak, le a thawhsaalnak theihpitu an si vekin leitlun hmuahhmuah ah feh in tettikhan ih simtu ding an si (Luke 24:48, Tirh. 1-5).

Kannih cu Khrih ih thudik le kan nunnak in thlengh sak daan sim dingin kawh mi kan si. “An theih lo ahcun ziangti’n an zum thei ding,” (Rom 10:14). Midang hnenih sim dingah ziang na tuah?

Kan Bawipa le in Ruuntu Khrih,

Kan thinlung in uk hram aw;

Theihpitu kan si camcin theinak dingah,

Kumkhua Bawipa na hrang lawng.

Pathian in leilung riantu dingah leitlun ah in ret.

(Visited 24 times, 1 visits today)

Comments

comments

Comments

%d bloggers like this: