Theihkauhnak le ruah ding tam

Theihkauhnak le ruah ding tam

– Compiled by Salai Biak Chawn

1. King Tut: Egypt siangparhang Tutankhamun (King Tut) cu Malaria natnak in a thi tiah ‘Journal of American Medical Association’ cun a ngan. Tutankhamun hi kum 19 tiang a dam ih, kum (10) sung Egypt ram a uk. A ruak cu 1977 ah archaeologist Howard Carter in a hmusuak ih, leitlun scientist tampi cun a thihnak thu thawn pehpar in zumhmang tampi an rel. A taksa (ruak) ihsin DNA sample vei (15) an lak suah hnu ah Computerised Axial Tomology (CAT) in scanning an tuah ih, Malaria natnak ruangah a thi tiah an nemhnget.

2. Malaria hrangah si thar: Kumtin milai 3,000,000 in an thihpi ringringmi Malaria cu ‘artemissin’ timi ‘chemical compound’ lawngin a damter thei ih, cucu ‘sweet wormwood’ timi thingkung kawr le a hnah ihsin tuahmi a si. Asinan wormwood thingkung hi a pitling hartuk (slow-growing) ruangah ‘si  thazet le cakzet’ ih tuahnak dingah thilri a daih aw loih, mi tampi nunnak cu runsuah thei loin an um ti a si. University of California ih scientist pakhat Jay Keasling cun bateria pawlih cell (genome) ihsin ‘artemissin’ tuah dan a hmusuak. Scientist dangdang in an zingzawi tikah zumtlakzet a si thu an hmu. Genome ihsin artemissin tuah thei vivo a si ahcun Malaria damternak dingah sumpai liamkuan theu cu 10% ihsin 25% tiang a malter thei ding ti a si.

3. Bomb hawlnak: Leitlun ah ram sung do awknak tampi a thleng ih, do awknak can a liam hnu khlah ‘leihnuai ih an phum theu mi ‘land mines’ pawl cu mit ih hmuh a theih lo ruangah mi tampi in an thihpi rero lai. Cun, landmines pawl cu ‘metal detector’ timi ‘leihnuai ih thir’ a um le um lo theihnak thawn an hawl hmuh thei ruangah tulai san ih ‘landmaines’ tam sawn cu ‘plastic’ ih tuahmi an si lala theu ih, hawl hmuh a harsazet ti a si. Asinan, Denmark ram ih Aresa company cun cuih plastic landmines pawl umnak cu olsamzet ih theihtheinak dingah ‘thingkung phunkhat ‘weed’ timi cu ‘a ci’ (seed) an vawr ih, cucun leihnuai ih bomb phummi ihsin a rak suakmi ‘nitrogen dioxide’ pawl cu hmakhat te’n a thei ti a si. Leihnuai ah bomb a um ahcun ‘weed’ thinghnah cu ‘an sen thluh’ ti a si.

4.Cancer natnak: Cancer natnak cu tulai fiamthiamnak cun ‘chemotheraphy’ (electric power thawn urnak) in damter an tum tlangpi. Cucu boruak ih thothe pakhat ‘meithal’ ih kap ding bangtukih ‘tihnung’ a si. A hnatuan a cakzet na’n vansiat pang a olzet. Asinan Germany ih University of Heidelberg ihsin Roland Elis ih hoha mi scientist pawl cun ‘bateria hrekkhat’ ihsin Cancer natnak tuahtu pawl hawlsuaktu le nat hrik khal that theitu an hmu suak. Cuih thil thar cu, lamzin lawng hmuhsuah a si ih, tangkaizet ih hmannak ding lamzin hawl vivo a si.

5.Nelrawn kharbok: Nelrawn ram ih kharbok pakhat vial in nikhat ah amai’ taksa rih zat (weight) rawl a ei thei. 5 cm (2 inches) lawng a si na’n a rualin 50 million hrawng an um khawm ih, cu pawl cun ni khat ah milai 500 ih kum khat ei khop cu an ei thluh thei.

6.Internet: Sweden ram ih Sigbritt Lothbeerg cun leitlun ih internet connection cakbik a hmang ti a si. Cuih internet cu 40 Gbps (giga-bytes-per-second) a si. Ziangvek zuknung khal second (2) sungah a download thluh thei ti a si. 1982 kum kha, leitlun ah internet hmangtu hmuahhmuah in ‘elk cloner’ timi computer virus an buaipi thok. Hihi computer virus hmaisabik a si.

7.Thlisia: Na ruat dah maw? Leitlun history ah thlipi hrang cakbik cu 1999 kum ih Oklahoma nuaitu tornado kha a si ih, nazi pakhat sungah peng 318 (miles per hour) lai a si. Cun, Oklahoma timi kha ziang so a sullam, Butlak khua tinak sokhaw!

8. iPhone mankhung: Leitlun ih iphone mankhungbik kha Peter Aloisson ih tuahmi a si ih, US$ 176,400 a man.

9.Thlalang sungih thlarau: Mi tampi cun an thei lo men thei. US scientist Thomas Edison cun a thih hlan ih a thaw thawtmi netabik (last breath) cu thlalang (test tube) sungah a ret ti a si. Edison ih rualpi Henry Ford cun Edison ih fapa Charles Edison hnenah a pai’ thaw thawtmi netabik (1931 kum ah) cu test tube sungih ret dingin a forh ih, cucu Henry Ford cun, Thomas ih thlarau tiah a rak zum. Detroit khawpi ah ret a si ih, can reipi a hlo na’n 1978 ah an hmusuak sal ih, Michigan ih museum ah an ret sal.

(Visited 81 times, 1 visits today)

Comments

comments

Comments

%d bloggers like this: