Theih Lomi Thil Ttih

January 9

Zarhte Ni

Theih Lomi Thil Ttih

 

Siar:

Hebru 11:8-12

 

Abraham cu Pathian in ka lo pe ding tiih a tiammi ram feh dingih kawh a si tikah Pathian duhnak a thlun theinak cu a zumnak ruangah a si. Khuitawk ram ah ka feh ding ti hman thei loin a khua le ram a fehsan.          -Hebru 11:8

 

Kumkhat Sung Baibal:

–   Seemtirnak 23-24

–   Matthai 7

A si thei lo ding ti ih na ruahmi tuah dingin Pathian in a lo fial dah maw? Reipi na hngah reromi hnattuan kainak le na duhzet mi thawn pehtlaihnak el dingin a lo fial dah maw? Lamhlapi ah feh dingin, asilole lamhlapi ah a hna ttuan dingin na faate thlah dingah a lo fial dah maw?

Theih dah lomi thil cu “ziang a cang pei?” timi ttihphannak thawn a khat. Asinan Pathian in theih dah lonak hmun khal ah Amah thlun vingvo dingah in ko. A thupek thlun in mi ngaidam, kan sumpai thilri midang tthen, kan kilven awknak le nunnomnak pawl kan baansan tikah a cang dingmi theih lo thil pawl kan ttih ttheu. 

An fehnak ding hmun sim loin an sungte’n pok dingah Pathian in a fial tikah Abraham ih thinlung kha ruat hnik aw (Seem.12:1-3) . Ur ram ih an nunnomnak in dunglam kir saal dingah a thlem hngai thei men nain theih lomi ram ah taimak te’n um dingah Pathian in Abraham a fial.   

Kum Thar sungih luh hi feh dah lonak hmun ih luh thawn a bang. Theih lomi thil ttihnak in Pathian hruainak thlun ding kan tha a zawngter thei men. Ziangkim theitu kan kaihhnget ahcun khuitawk ih in hruai khal le a tthami kut sungah kan um ding.

 

Thai sun ih cang dingmi thil tampi,

Zianghman ka thei lo a bang;

Hmanseh kut sungih thaisun kaitu ka thei,

Ka kut i kaitu khal ka thei.

Ziangkim theitu Pathian kut ah

na theih lomi hmailam thu hlan dingin ziangtik hmanah ttih hlah.

(Visited 26 times, 1 visits today)

Comments

comments

Comments

%d bloggers like this: