The Beauty of Unity

Lungrualnak ih Mawinak
(The Beauty of Unity)
[Saam 133:1-3]

Pathian minung pawl unau bangin hmunkhat ih um tlang hi a ttha in a va nuam so! Aaron ih lu ihsin a khahmul le a korfual hngawng tiang a luangmi olif hriak sunglawi bangtuk a si. Hermon tlang ih daitla, Zion tlang parih a rung tlami daitla bangtuk a si. Cutawk ah Bawipa in thu in tiam ih thluasuah in pek. Cuih a thluasuah cu kumkhua nunnak a si. – Saam 133:1-3

Thuhmaihruai

Lungrualnak (unity) cu cahnak, nehnak le thluasuah donnak thuhrampi a si. Kawhhran le khuatlang nun ah lungruanak a um asile Khrih le miphun hrangah tumtahnak tumpi kan nei thei dingih kan sunmang (vision) tla atak in a cangsuak thei ding. Lungrualnak cu a ttha ih thiltitheinak huham a nei. Duhdawtnak le lungrualnak a umnak hmun ah Pathian huham a cangvai. Pathian fahniang pawl lungrual tein Amah thangtthatnak, biaknak le hnattuan tlangnak kan neih asile Pathian lung kan tong ding. Cuti’n Pathian kan hnenah a um dingih thluasuah: kumkhua nunnak, lungawinak, thlangamnak, lennak le damnak kan co ding. Lungrualnak ih mawinak pawl Bible sirhsan in kan zirzoi tlang pei!

A. Lungrual cu Thluasuah Donnak:

Saam Cangantu in, “Pathian minung pawl unau bangin hmunkhat ih um tlang hi a ttha in a va nuam so” a ti. “A ttha in a va nuam so” timi in lungrualnak ih mawinak a langter. Zumtu cu thil ttha tuahtu dingih rundam kan si. “Aaron ih lu ihsin a khahmul le a korfual hngawng tiang a luangmi olif hriak sunglawi bangtuk a si.” Olif hriak in “thianghlimnak” a sim duh. Aaron cu hmun thianghlimbik ih a lut zik tinte’n a taksa ruangpum le a korfual thianghlimter in a lu ihsin olif hriak a burh awk ta a ttul. Culawngah Pathian ih cosaanmi raithawinak a tuah thei ih Israel miphun in sualngaidamnak an co thei. “Hermon tlangih daitla le Zion tlangih daitla bangtuk a si.” Hermon tlang cu pi 9200 a saang ih kumtluan in tlangzim ah vur a tla. Cuih vur a zup ih a luang tikah Jordan tiva hna le Galilee tili ih dawhhna ah a cang. Israel ram mipi pumcawmnak ah lo theih lo ih ttulmi a si. Zion tlang cu Judah mi hrangah tlang thianghlim, thlaraulam thluasuah khihhmuhtu a si. “Cutawk ah Bawipa in thu in tiam ih kumkhua nunnak thluasuah in pek.” Lungrual cu thluasuah donnak a si (Saam 133:1-3).

Tuni kawhhran sungih lungrualnak a um lawngah thlaraulam thluasuah: kumkhua nunnak, lungawinak le thlangam daihnak siseh, lei tisalam thluasuah: pumcawm awk theinak, lennak le tthansonak ti’n thluasuah famkim kan co thei ve ding a si.

B. Lungrual cu Miphun Dinsuahnak:

Pathian ih hrilmi Israel miphun thuanthu ah veikhat cu Jerusalem khua kulhnak hauhruang a cimmi Nehemiah ho in an dawl saalnak thu kan hmu. Pathian zumfektu le rawl ul thlacam nun neitu hruaitu ttha Nehemiah cu acozah hnattuan dinhmun saangpi nei asinan, a miphun le a khua le a ram a duhdawt ruangah a sinak taansan ngam in Jerusalem khuakulhnak dinh saal dingin a pok. Harsatnak le dokalhnak tampi a tong. Sihmansehla, dungsiip loin thinlung hngetkhoh nei in a hnattuan cu taimazet in a ttuan pehzom. Pathian rinsan in hmai a nor. Nehemiah in mipi hnenah, “Khuapi kulhnak phardawl cu din saal uhsila kan thangsiatnak hi rehter uhsi!” a ti tikah mipi an lung a rual ih, “Tho uhsila dinsaal uhsi,” an ti. A tim an tuah ih hnattuan cu an thok lohli (Neh. 2:17-18). A zate ah ni 52 lawng an rei (Neh. 6:15).

Tuni kan Lai miphun sungah lungrualnak kan ttulzet. Hruaitu le mipi karlak ah siseh, miseenpi sungah siseh, lungrualnak a um kan miphun a kilkip ih a tthanso theinak dingah kut ong zom aw in kan ttuan thei dingih kan ram le kan miphun kan dinsuah thei ve ding.

C. Lungrual cu Raal Nehnak:

Zumtu pumpak kan nitin nun ah siseh, mibur le miphun huap dinhmun in siseh, dokalhnak le buainak kan tong ttheu. Cuvek caan ah lungrualnak hi a thupizet. Israel pawl Canaan ram pan ih an fehlai ah veikhat cu Amalek raal pawl thawn an tong aw. Cutikah, an hruaitu Moses in Joshua hnenah, ‘Kanmah lakih mi hrekkhat hril awla, Amalek pawl do dingah va feh uh. Kei cu tlang parah ka ding pei ih Pathian ih pekmi kianghrol hi ka thlir ding” a ti. Moses ih fial bangin Joshua cu Amalek pawl do dingah a feh. Cule Moses, Aaron le Hur cu tlang parah an kai. Moses in a baan a thlir sung cu Israel mi pawl in raal an neh. Asinan Moses a baangtuk ih a kianghrol a thlir thei nawn lo tikah Amalek pawl in Joshua le raalkap pawl cu an rak neh vingvo. Moses ih baan a zawngtuk ruangah Aaron le Hur in lungto an laak ih an toter hnu ah an pahnih in Moses ih baan cu an thlir bawm. Cuti’n zaanlam nitlak tiang a baan cu an thlir sak ringring ruangah Joshua in raal a neh thei a si (Suah. 17:8-16).

Tuni ah zumtu pawl kan lung a rual ih, pakhat le pakhat bom awkton kan thiam le mai’ ttuanvo ciar dikfelzet le taimazet ih kan ttuan cio asile nehnak kan co ve ding a si. Satan le a ho pawl ih dokalhnak cu kan neh thei dingih nehnak thantar kan zaar thei ve ding a si.

D. Lungrual cu Harhdamnak

Thuthangtha Luka 5:17-24 sungah lungrualnak a um ruangih tidamnak a duhzettu mizengpa in damnak a ngah thu kan hmu. Nikhat ah Jesuh Capernaum khua ih thu a zirh rero ih, Jerusalem, Judea ram le Galilee ram khuakip ihsin a rami Farasi, Daan thiam pawl le mipi tamzet in an ngai. Minaa damter theinak Bawipa ih huham cu Jesuh parah a um. Culai ah mizengpa pakhat cu a ihphah thawn laang in mi pali in an rak zawn ih Jesuh hnenah thlenpi an tum. Sikhalsehla mipi an tamtuk ruangah an fehpi theinak lamzin a um lo. Curuangah inn parah an kaipi, inn tlunkhuh an boh ih mizengpa cu Jesuh ih hmai rori ah an vun tthum. Jesuh in an zumnak a hmuh tikah a lungkimzet ih mizengpa cu a damter. Mi pali pawl ih minaa zawnruahnak le lungrualnak ruangah siseh, mizengpa le a zawntu pawl ih lungrualnak ruangah siseh, Jesuh in minaa damternak maksak a tuah ih Pathian hmin a sunglawi.

Tuni zumtu pawl tla lungrual te’n hmunkhat ah kan khawm, Pathian kan thangtthat, hla kan sak ih thla kan cam tlang asile Pathian in thluasuah in pe ding. Pakhat le pakhat aanciing aw te’n le kut ong zom aw in A hna kan ttuan tlang vialvo asile Pathian thluasuah kan co ding. Kan lakih taksa, thinlung le thlarau dam lo pawl in tidamnak an co ve ding a si.

Thunetnak:

Pathian fahniang pawl lakih lungrualnak um ding cu Pathian ih duhbikmi a si (Saam 133:1). Zumtu pawl kan lung a rual ih pumkhat kan si ding cu Jesuh ih thlacamnak a si (John 17:21). Lungrualnak cu rundamnak, Lungrualnak a umnak hmun ah Pathian thluasuah a um. Kan kawhhran sung le kan miphun sungah lungrualnak a um ahcun thlaraulam siseh, thinlunglam siseh, tisalam siseh a kilkip in tthansonak a si. Kan miphun sungah lungrualnak a um asile Pathian uknak ram kauhternak le kan miphun tthansonak hrangah hmunkhat te’n kut kai aw in kan ttuan tlang thei ding. Kan zate’n Pathian thluasuah famkim kan don cio theinak dingah pakhat le pakhat duhdaw aw le lungrual te’n um tlang thei zuam cio uhsi!

Hminsin: March 18, 2012 MCCU [Malaysia Chin Christian Union] Sunday pulpit exchange ah Zophei Christian Fellowship biakinn ih thuthangtha simmi a si.

(Visited 25 times, 1 visits today)

Comments

comments

One Comment

  1. Sazapa na thusim mi tha zang ka ngah nasa

Comments

%d bloggers like this: