Thazaang Tlung Saal Caan

December 2

Tlawngkai Nili

Thazaang Tlung Saal Caan

Siar:

Tirhthlah 3:17-26

Sir aw uhla Pathian hnenah kir saal uh. Cuti asile nan sualnak a lo ngaithiam ding.   – Tirhthlah 3:19

Kumkhat Sung Baibal:

Ezekiel 42-44

1 Johan 1

Nikhua saazet caan ih adai in maw, sunhnu ih caan tawite sung itthat maw, Pathian thangtthatnak hla ngai maw, ziangmi in na thazaang a tlungter saalbik?

Bible ih simmi thazaang tlung saalnak cu taksalam le thlaraulam khal a huap cih. Bible ah Sabbath ni ih cawlh (Suah. 23:12), tidai in (Thutthen. 15:18-19), awnmawi ngai (1 Sam. 16:23), le pawlkom awknak (2 Tim. 1:16) in thazaang a tlunter saal thu kan hmu.

Pentikos ni ah Peter in thlaraulam thazaang tlung saal caan thuthangttha a sim. A thusimmi a ngaitu mipi pawl kha, “Sir aw uhla Pathian hnenah kir saal uh. Cuti asile nan sualnak a lo ngaithiam ding,” (Tirh. 3:19) tiah a forhfial. A thusimmi cu Messiah ih uknak a hngaktu Judah mi pawl hrangah tican a neizet vekin Gentile pawl hrang khal ah thlarau nunnak thuthangttha a si ve (Tirh. 10).

Atu khal ah zumtu kan si vekin thinlung daite le hlimphir te ih thlacamnak le Bible siarnak in kan thlarau thazaang tlunter saal theih a si. Bawipa thawn lawng tikcu caan kan hman tlang tikah kan thlarau tharthawh in Amah ih daihnak le lungawi thinnomnak kan co thei. Nitin thlaraulam thazaang tlun saalnak caan hrangah Pathian hnenah na lung a awi lo maw?      – Dennis Fisher

Thlacam

Bawipa, ka thlarau tharthawhnak le thazaang tlung saalnak tuni ah ka ttul.

Na Ttongkam in i biak awla Na thinlung ka thei ding.

Thlacamnak in ka thinlung sung thu lo sim dingah i bawm aw.  Amen

Pathian kan naih tikah kan thinlung thazaang a tlungter saal ih             kan thlarau thazaang a tharthawh saal.

(Visited 25 times, 1 visits today)

Comments

comments

Comments

%d bloggers like this: