Thazaang Cakzet Mi Neh Theinak

May 18

Tlawngkai Nihnih

Thazaang Cakzet Mi Neh Theinak

Siar:

1 Samuel 17:33-50

“Kiosa le savom pawl hnen ihsin i humtu Bawipa cun hih Filistin pa ih kut sung khal in i hum ko ding,” tiah a ti.     – 1 Samuel 17:37

Kumkhat Sung Baibal:

–   1 Sansiarnak 4-6

–   Johan 6:1-21

1935 kum ah Texas ramtthen Wiley College timi midum pawl kainak Phunsang Tlawng fate ih thu-el awknak mibur (debate team) in California thlanglam ramtthen ih Mirang lawnglawng kainak Phunsang Tlawng (University of South California) ih a nasazetmi debate team kha ruah lo pi’n an neh tariai. Himi hi rauh ban lo ih thilcangmi ram sungih mi nasabik pawl nehnak thuanthu a si.

Hlanlai Israel pawl cu Philistin pawl ttih thlohthloh ih an umlai ah David timi nauhak pa in mi tumpi pakhat a rak neh (1Samuel17). Israel le Philistin raalkap pawl cu Elah Phairawn ih khatlam kap veve ah do aw dingin an ding. An ttih awk veve ruangah mi cakbik veve tthuat awknak ihsin a sung le a neh thutthen dingin an lung a kim tlaang.

Philistin lam ihsin pi kua le khap khat a saangmi Goliat a ra suak ih Israel lam ihsin a do ngamtu ding zohman an um lo. David in cuih thu a theih tikah Saul siangpahrang hnenah do dingin a dil (cc.32-37). A thokpek ahcun a siang lo nain nehhnu ahcun a siang saal. David ih Philistin micak pa a neh theinak hriamnaam cu lungto hlum fate panga (c.40) le Cungnungbik Pathian rinnak in a si (c.45).

Kan nunnak ah donharnak, rinhlelhnak, ttihphaannak, sualnak le mawhnak tivek thil maksak pawl kan tong ttheu ding. Sihmansehla kannih khal ruah ban lomi thazaang cahnak le huham thawn a khatmi Pathian rinsannak thawn cumi pawl hmuahmuah cu kan neh thei ve ding.  –Marvin Williams

Bawipa, ra awla raaltthatnak i pe aw,

Na nehnak Thiang Thlarau in;

Kei hi nehtu ah i tuah hram aw,

Ka sungih a nungmi huham thawn. – Anon

Nunnak ih harsatnak tumpi pawl sawmngiar ngam dingin

Pathain in huham le raaltthatnak in pe.

(Visited 19 times, 1 visits today)

Comments

comments

Comments

%d bloggers like this: