Thansonak Hrangah Ziang A Tul

Thansonak Hrangah Ziang A Tul

Thuhmaihruai

Minung tampi in kan tumtah mi cu thanso ding hi a
si. Ziangvek thil kan tuah ah siseh, kan zir ah siseh netabik in kan
tumtah mi cu a thanso mi le a hlawhtling mi si ding hi a si. Cuvekin
kan bulpak innsang ah siseh, kan khawtlang kawhhran ah siseh a silole
pawlkom pakhatkhat sung khal ah hmailam hrang kan ruahsanmi cu thanso
ding hi a si thotho. Asinan a thangso mi si dingin ruahsannak kan nei
cio ko nan thansonak hrangah ziangtin kan um a tul ih ziangtin kan
tuah kan tuan asile kan thanso ding tihi mi tampi in kan rak thei
fiang ngah lo theu. Thansonak hrangah kan theih tul mi le kan tuah tul
mi tampi lak sung ihsin malte lai ruatkhawm dingah saduhthahnak ka
nei.

Lungrualnak

A thangso mi ram le miphun, a thangso mi kawhhran, a
thangso mi pawlkomnak si thei ding ahcun a pakhatnak ah lungrualnak hi
a tul a si. Pakhat le pakhat kan lungrual lo ahcun hna kan tuantlang
mi a fatebik ihsin a tumbik tiang thansonak lam ah in suahpi  thei lo
ding. Curuangah thil ziangkim kan tuahnak ah siseh, kan tawlrelnak ah
siseh lungrualnak hi a tul ngaingai a si. Hmailam hrang khawkhan
lairelnak khal ah lungrualnak a tul. Lungrualnak cun a thekdarh aw mi
pawl hmunkhat ah mi a finkhawm ih thansonak ah mi a hruai lut theu.
Asinan lungruallonak cun hmunkhat ih rak um khawm mi pawl khal a then
aw ter ih thansonak tawlrel thei lo in harsatnak tampi a um ter hlei
ah tlaksiatnak  a suahpi. Kan lai thufim pakhat ah ” Tanrual cu
Cahnak” ti a si. A lungrual mi pawl lawng in an tangrual theu. Kan ram
le kan miphun thansonak hrangah lungrualten tuantlang uhsi.
Lungrualnak phen ah thansonak a um. Lungrualten kan um khawm ih kan
tuankhawm a si ahcun ziangvek dinhmun kan thlen a si khal le thansonak
in in hngak ringring. Zokhal thansonak a duhtu cun thinlung thiangzet
le lungrualnak thawn a tuahtuan mi parah lungawi in um seh. Culawngah
thansonak ih a rah par tha a hmu thei ding.

Minung kulh

Zuamnak

A thansomi le a hlawhtlingmi si thei ding cun kan tuah mi
hmuahhmuah le kan zir mi zaten teimak suah ih zuamnak thawn hmai kan
norpi a tul. Zuamnak kan neih lo ahcun hmailam thansonak hrangah sammi
nei bangin a famkim thei dah lo. Hnatuan pakhat kan tuan ih harsatnak
kan ton can ah siseh, fimthiamnak kan zir ih thinlung beidong
awloksong ih kan um can ah siseh, kan hmuitinmi thleng thei lo ding ih
in rak khamtu khawruahharnak laksung khal in teimak suah in zuamnak
thawn kan fehpi thei lawngah thansonak in kan hmai in in rak hmuak
ding. Curuangah a thangsomi si thei ding cun teimak suah ih zuam rori
a tul. Mi hrekkhat cun a thangso mi si ding cu kan duh ko nan nitin
kan nunnak ah zuamnak thawn kutkai ih feh tlang ding kan duh lo. Kawl
thufim pakhat ah ” Na zuam a si ahcun Pathian na cang thei” ti a si.
Kan bulpak ihsin thok ih kan ram le kan miphun tiang thansonak ding cu
kan tuahnak, kan zirnak ah zuamnak kan neih rori a tul. Culawngah
zohthimtlak le upattlak ram le miphun kan si dingih kan thangso thei
ding. Kawl thufim bangin kan zuam a si ahcun hlawhtlingnak khal kan
hmu ding. Mi herkkhat cun thansonak cu hla bangin kan sak nan a tak ih
paltlang ding cun zuamnak nei thei loin kan zang a zel lala. Cucu kan
tlaksamnak bik pakhat a si. Curuangah kan thangso thei lo. Chin mino
tampi ziangtin caan kan hmang. Thansonak dawi in ziangtluk kan zuam ih
kan tlan zo. Muvanlai bangin kan ram le kan miphun thansonak ding sang
sinsin ah zuamnak thawn tlan uhsi. Culawngah kan lungthlitum kan co
ngah dingih kan thangso ding.

Thlenghawknak

Leilungtlun mifim tampi in a sim theu mi cu
thlengawknak a um lo ahcun thansonak taktak a um thei lo an ti. Mi
thangso kan si theinak dingah ” Thlengh” ti mi tongfang hi thupi ah kan
ruah a tul ngaingai. Mai dinhmun kel ih tlangleng le um men ding kan
si lo. Kan dinhmun kel ah to men lo in tharthawh aw sal ih hmailam
hrangah kan sinak, kan dinhmun thleng a tul mi pawl kha thlengawk ding
hi a si. Cucu kan miphun in thansonak ih kan kekar dan ding pakhat a
si. A thangsomi ram le miphun, innsang si thei ding cun thlengawknak
kan neih tengteng a tul. Cule kan thansonak mi dangin in hmu thei
ding. Hmuhtham lo thlengawknak cu thansonak taktak a si thei lo.
Herman E. Daly khal in a rak sim dah mi cu thansonak timi cu “Hlan ih
thil a rak um mi hnak ih tha deuh in famkim ter ding, thangter ding” a
si a rak ti. Curuangah kan miphun khal in kan dinhmun kel ih nung ding
le to men ding kan si lo ti a fiang. Thleng a tulmi pawl thleng tahrat
in famkim ter ding, thangter sawn ding hi kan si. Hlon a tulmi kan
dinhmun pawl khal hlon tahrat ih a thangso mi dinhmun si thei dingin
thlengawknak taktak kan neih a tul. Tuisan laimi ziang dinhmun ah kan
um. Kan dinhmun in thangsonak a pek lo a si ahcun thlengawknak kan
neih a tul. Tuisun ih kan dinhmun le kan sinak hi thangter ding kan
si. Culawngah thansonak dinhmun kan thleng thei ding. Curuangah
zohthimtlak le rinsantlak ih kan thanso theinak dingah thlengawknak
timi hi a poimawh ngaingai. Thansonak ah kan dinhmun le kan sinak
hmuhtheih in thlengawknak thawn hmailam ah kan nundan zohfel aw ding
kan si.

Thansonak zuk

Thunetnak

Kan ram le miphun, kan kawhhran le khawtlang ah
thansonak par kan co ngah theinak dingah lungrualten le thatho zetin
kan tumtahmi parah kan tuantlang khawm a tul. kan tumtah hmuitin mi cu
kan tuankhawm tikah zangzelnak um lo ih zuamnak thawn tuankhawm ding
kan si. Fimthiamnak lam khal ah kan miphun hrangah hmantlak le
rinsantlak si dingin zuamnak thawn hmai kan nor a tul. Thansonak
hmuitin in lungrualten kan tuantlangkhawmnak ah le kan zuamnak parah
kan dinhmun a famkim lo mi pawl famkim ter ih thlengawknak nei in kan
dinhmun a rak niam lai mi pawl kha sangsin ah thangter ding kan si.
Cutin hmailam kan feh thei asile thansonak co ngahtu kan si ding. Kan
ram le kan miphun in hlawhtlinnak a hmu dingih thansonak rah tha a rah
suak thei ding.

 By/May Myo Moon
(Visited 319 times, 1 visits today)

Comments

comments

Comments

%d bloggers like this: