Thangthat Album Sungih “Ka Nun In A Lo Hal” Ka Uarnak San Cu!

Salai V Bawi Lian
Leitlun santhar mino pawl ih uar zet mi le zarhpi zingtin zumtu million 10 lenglo ih sak ringring mi Hill Song pawl hmanin hitluk hlathuk mawi le thuuk hi an ser hlei cuanglo!!

Ka thinlung mitthlam ah Pathian ih in Duhdawtnak, kan nunnak ngaingaiin “Ka Lo Duhbik Jesuh” tiin ka ti dahlonan nitin in kilkhawinak pawl a ra langcih. Caang khat, pre chorus, chorus tilawng in hla tawi te a si.

A ngantu pa, Ta Hniang Uk @ Ta HniangÙk ih hla ngan mi pawl hi a mak danglam zet. Kan Chin mi santhar hlaphuah thiam lakah a hla phuahmi pawl hi ka uar zet. Ziang ruangah tile Piano aw thawn a thluk hi a remaw zet ih, awnmawi dang pawl hrang khalih rak bet nuam dingin a hla pawl an um.

Chin Hill Resettlement Concert hrang ah zuun hla pakhat a ngan mi ka rak ngai dah. A thluk tin ah Awnmawi le Biazai ih a hnukhripi a simi Awtluk cem rual (Rhyme) a ret thluh. Rhyme a ret mi pawl cun a hlafang pawl thuukzet ah a canter.

“Ka Nun In A Lo Hal” ih hla hi, Piano awn fiang kiahko ten a thok. Cumi thluh ihsin awnmawi dangdang in mawi zetin an bet. Cutin Aw dam le no zet ten Mai Kimmy cun..

Nunnak tiang liam ih in runtu Bawi Jesuh
Ka nunnak in nang a lo ngai Bawipa
Ramcar ih Sakhi’n Cirhti a hal bangin
Ka nunnak in nang a lo hal Bawipa…

Mi zopoh khalih sak thei cih mai dingin a aw thluk nem riahro cun, a chorus sak ti nuamtu ding le a hla caang tifamkim ter dingin…

Ka lung diriamnak kimter theitu
Hngohsan dingdang ka nei lo..

Hi hla “Ka Nun In A Lo Hal” timi ahcun Rhyme lam cu a telhtuk ciamco lo nan, kan Chin hla Irawm suak, santhar thangthat hla ahcun ka duhbik mi pakhat lak ih tel cu a si rori. A Chorus hi ka uar hleice cuang. Awnmawi remkhawmtu le tumtu pawl thinlungah hi bang a rak um hi kan Chin mi kan van a va tha ce em!!!

A chorus ah ahcun… neem diahdo le lunghno aw ten…

Ka lo duhbik Jesuh, Ka lo duhbik Bawipa
Na Dawtnak tang sungah kumkhua in um ning
Jesuh….

Asinan a cangkhatnak ih a hlafang hmanmi a caangtin hi a thuuk in hmuar a nei zet. ‘Nunnak tiang liam ih in runtu Bawi Jesuh, Ka nunnak in nang a lo ngai Bawipa, Ramcar ih Sakhi’n Cirhti a hal bangin Ka nunnak in nang a lo hal Bawipa…’ himi caang ah mitin ih rak ngai dan cio le duhdan cio cu a dangthluh ko ding. Saam hlabu sungih David siangpahrang pa ih Bawipa a ngainak a nganmi hlafang a si. Zumtu nunnak ah in rundamtu Bawipa Jesu Khrih kan ngai zia a va phorhsuak mawi tak em! Hitawk ih ka duh zet mi Awfang cu, NGAI timen loin HAL timi te hi a si. Bawipa hi kan ngai theu, Asinan kan thlarua in Amah a rak HAL tihi a langfiangter zet.

‘Ka lung diriamnak kimter theitu, Hngohsan dingdang ka nei lo..’ kan laihla ih kan hmuh dah lomi Hlafang, “HNGOHSAN” timi a hmang leh sal. Hla phuahtu tamzet lak ihsi a danglamnak le mi cungcuang a sinak a si. Mi tinih hman mai lo mi a hmang theihi a ropi lawlaw. Mipa le nunau karlak ih nuamcennak hrang ih cafang lole Hmuh theihlo ih kan hawl mi “DIRIAMNAK” timi khal hi Caang ah a telh.

A Chorus sak daan hi ka uar hleice bet. Kan laihla tamsawn cu saktluang an siih, kan lan hluahhlo mai. Asinan hi hla ih Chorus ahcun “Ruahnak Hrang Cawlhnak” Tingtang Baar khat an cawl. “Ka lo duhbik Jesuh” ti thluhin hla a lan cih mai lo.. awnmawi in “na nunnak ah a si ngai maw?” timi suhnak si awm in camkhatte an cawl…

Thangthat timi ah hlafing 2 a ngan ih a hlafing hnihin ka duh veve. A hleicein himi “Ka Nun In A Lo Hal” timi hi ka duh hleice cuang ih ka nunnak I tham zettu a si.#

Comments

comments

Comments

%d bloggers like this: