Thailand Prime Minister Thar

Surbung Tlang Thuthang

December 16, 2008

Thailand Prime Minister Thar
Thailand ram Prime Minister thar dingah Opposition pary raksi ttheu People Alliance for Democracy (PAD) Party hotu Abhisit Vejjajiva cu hriltlin asi, a mahin tui kandungih an bantermi PM hlun Somchai Wangasawat ih ai a awh thlangdingih PM thar hrilnak Parliament Special Session neih nakah Speaker Chai Chidchob cun Abhisit Vejjajiva in vote 235 a hmuih a mahcuhtu Thailand police lalhlun Pracha Promnok cun vote 198 a hmuih Abhisit Vejjajive cu Thailand ram Prime Minister tharah hriltlin asi tiah a puang, Abhisit Vejjajive hi kumhnih sungih Thailand PM 5 Panga nak asi.

PM hlun Somchai Wangasawat kha Peaple Power Party hotu a raksiih nikumih hrilawk ttumah khan an party cun thildiklo nasazet an raktuah tiah hmuhfianglehsal asi tikah Court in bangdingin thu a rakpe ih a bang mi asi, Tui Thailand PM thar hrilmi hi tuihlanih PM rakttuanzo Eiruk thubuaiih ralkap bawipawlin an hlawnmi PM hlun Thaksin Shinawatra tui ramdangih relhlai cun anram court cu ralkap duhdan ih rorelah puhin a sawsel nasa ih Opposition lammi PM ih hrilbet asi betbet tikah Thaksin Shinawatra ih dungthlun pawlcun nasazetin sawiselin buainak tuah an tum ve.

Peaple Power Party (PPP) pawlin Peaple Alliance for Democracy (PAD) annnehlo naksan cu (PPP) MP sungah Cabinet Minister dingih rakthlem thupmi an umih MP uire an umruangah asi tiah (PPP) party thupuangtu cun asim, PM hlun Somchai wangasawat a banhlante ah khan Peaple Alliance for Democracy (PAD) pawlkhan Bangkok Airport an tibuai ruangah vanzam zuangsuak leh ttumthiamlo in karkhat tthalai a rak umzoih khualtlawng veivak mining 300,000 lenglo an raktar tahak zo..

US President George W Bush
** Kumthar January ih term cemding US president George W Bush cu theihcia nak umlo in Afghanistan ah a zuanglut dukdi, Baram ih US ralkap pawlhmaiih thu asim thluh hnuah Afghanistan President Hamid Karzai a kawmcih, President Bush hin Afghanistan President hnenah NATO ralkap pawlin Taleban pawl an dawisuak nak kumriat ihsin Afghanistan cu a tthazawngin a thlengaw danglam zetih leitlun mipi khalin beisei nak sangzet thawn an thlir asi tiah asim.

President Bush hin Iraq ihsin Afghanistan hi a panih Iraq a umsungih thuthangca lakhawmtu pawlthawi an kawmawk laiah TV Journalist pakhatcun a kedam bunlaimi phelhin Bush cu vawihnih a dengnan a dengfuhlo hipa hin Bush cu ttongkam mawilo zet in a auh ciamcota, President Bush leh Iraq Prime Minister Nouri Maliki cun ram humhim naklamih ttuantlang dingah thuthlung Security Agreement an tuahtlangta ih himi’n Iraq ih US ralkap pawl 2011 ihsin hnuhkirsal naklamzin a umding tiah zum asi..

*** Tuithla December ni 6 ih Greek ram khawpi Athens Police pawlin tlawngta kum 15 mi ankahthat ruangih buainak naszet suakmi cun zia umlam a pan vivo tiah ansim, Hi buainak ahhin Tthangthar tlawngta pawlin hibuainak suaktertu ih an puhmi Police Officer Alexandros Grigoropoulos ih umnak Police station cu tui colhni zanah khan an kulhih Petrol bomb leh thildang hmangin an siimih Ethnos Newspaper in mipi ruahnak a lakkhawm nakah mipi zaa ah 83 cun hibuainak rehtheilo naksan cu cozah santlaihlo ruangah asi tin ansim, hibuainak thuthawi pehparawin minung 400 lenglo an kaizoih minung 70 lenglo in hriamhma an tuar, Greek Prime Minister Karamaulis cun hibuainak ruangih bangdingih an nawrnak cu a pawmloih Greek ramhi cozah hngetkhoh a ttul tiah a ttangve..

** US lllinois Governor Rod Blagojevich cun a maithuih ban a tumlo thu a puangfelzo, relzo vekin hi Governor hi US President thar Barack Obama ih suahsan mi Senate Seat awllakih mithar retnak dingah nawhthuh la ih puh asiih Obama khalin Governor hi bangdingin a rak simzonan ban a tumlo ruangah dandiktak ih banter asi theinak dingah State rorel nakin lamzin dangin ngaihtuah nak a neih zum asi, himi thuah lllinois House of Representative leh Senate pawlkhal tokhawm nak anneizo..

*** British Prime Minister Gordon Brown cun Mumbai buainak tuahtu misual pawlcu Lashkar-e-Toiba an si ti British in a theifiangzoih, Cu ruangah Pakistan a cozahcu a ramsungih misual umpawl parah khohkhah zetih thilti dingin a nawrbetsal, British Prime Minister hin New Delhi ihsin Islamabad a panih Pakistan hi misualpawlih tanhmun khuarnak hmunpi si nawnlodingah ttongkam men siloin a taktak ih thilti dingin Pakistan cu a ngen,British Prime Minister Gordon Brown cun misual pawl dodingah Bristh cun India cu a bawm vivo ding tiah asimbet.

*** Pakistan Cozahin India Ralkap vanzam in Pakistan ramsung Lahore leh Kashmir tlun boruak sung lutih a puhnak cu External Affairs Minister Pranab Mukherjee cun hithilhi felfai tei zoh a tumthu leh, India Air force lamcun pakistan puhnak hi thudiklo asi tiih an simthu a simve,Minister Mukherjee cun India Air force in Pakistan ramsung a lut taktak asiah cun ziangruangah timi thu India cun a thupru velo dingih, Cuti siloih puhawk nakmen leh misual pawlih thlavang hauhnak men asiah cun Pakistan khalin a tongkan thlahmihi a hnuhkirsal a ttulding ati,

Cumi laiah Pakistan Foreign Minister Shah mahmoud Qureshi cun ram iin hnen India thawi hmuhsual awkleh do awkhi pakistan cuna duhlozetih, asinan himi hi Pakistan ram cahlo nak ruangih ruahding asi ahcun an ruatsual zetding ati..

Comments

comments

Comments

%d bloggers like this: