Tawlrelnak Sersuak

November 5

Tlawngkai Nikhat

 

Tawlrelnak Sersuak

                                                           

Bible Siar Ding: Jeremiah 18:1-12

 

“Beel tuahtu in tlak in a duhduh a tuah vekin Israelmi nan parah tuah theinak ka nei ve lo maw si?

Tlak cu beel tuahtu kut sungih a um vekin nannih khal ka kut sungah nan um.

Jeremiah 18:6

 

Thil-hraw (raw material) pakhat ihsin thil ttha pakhatkhat va tuahsuak thei cu mi thinlung nehzettu tontehnak pakhat a si. Hmun pakhatkhat kha rong neimi sii pakhatkhat kan hnih tikah siseh, ttongfang pawl in thuanthu kan danglamter tikah siseh, tlak in beel pakhatkhat kan sersuak tikah siseh, a netabik kan suahpimi thilri in a hmaisabik ih kan rak hmuh taami thilri kha kan thinlung mitthlam ah a taangta a si.

Pathian in Amah le a minung pawl a simi zumtu kanmah pawl thawn kan pawlkom awknak thuhla ih thutak kan theih fiang theinak dingah beel tuahtu le tlak tahtthimnak thawn a sim. Tlak leilung cu an kom aw ringring lo. A caarzet caan a um thei ih a beekzet caan tla a um thei. Cutikah kan tuah duhmi beel pianhmang (shape) cu kanmai’ duh vekin sersuah theih a si lo. Beel tuahtu in tidai malte maw, asilole tlak leilung malte maw a bet thei, asilole a tuah lo mai thei.

Sersiamtu Pathian, beeltuahtu in Amah ih tumtahmi hrangah tawlrelnak a sersiam ih a duhmi beelkheng (vessels) pawl kha amai’ duh vekin a seemsuah a si. Kan nunnak sung ihsin a duh lomi pawl kha la suak tahrat in a hlonhlo thei ih a dang pawl tla laak in a kom thei. Asinan A minung pawl cu ziangtik hmanah a thlauthla dah lo. Pathian cu Amah sunloih thangtthattu le Amah riantu kan si theinak dingah zumtu a fahniang pawl kan nunnak sungah sersiamnak hna cat baang loin a ttuan ringring a si.

Sersiamtu Cungnungbik Pathian in kan nunnak sungah ziangmi kha ziangruangah a sersiam timi hi kan thei ttheh thei lo men ding. Sihmansehla ziangmi so kan ruahsan ding? Nang le kei cu Beeltuahtu kan si lo.

Bawipa Pathian, ka hrangah a famkimmi beeltuahtu na si ruangah ka lungawi. Na tumtahmi tlinsuahtu dingih sersiammi ka si zia in theihter awla in sersiam duhsannak lo rinsan thei ringring dingin in bawm hram aw.

Beel tuahtu in ka nunnak sungah ziangmibik so a sersuak? Tuni ah Amah ka rinsan zia teh ziangti’n so ka langter thei pei?

 

@Pennington

(Visited 29 times, 1 visits today)

Comments

comments

Comments

%d bloggers like this: