Tarsawn Asilole Tthasawn

August 26

Tlawngkai Nili 

Tarsawn Asilole Tthasawn 

Siar:

2 Korin. 4:16-18 

Hiti a si ruangah beidong ih kan um dah lonak cu a si. A lenglam kan taksa ruangpi hi ttumsuk vingvo hmansehla kan sunglam nun cu nitinte tharsuah ringring in a um a si.     2 Korin. 4:6 

Kumkhat Sung Baibal:

–   Saam 119:89-176

–   1 Korin. 8 

Baseball lektu pawl cu ziangtluk in an no? tiih kan sut awk tikah kan kum a upa vingvo, kan tar vingvo ti kan thei aw. “Na dam maw?” ti si loin kan ton awk tikah, “E, na va ttawl ve?” kan ti awk asile kan tar thlang tinak a si.             

Kiangkap minung pawl in kum upat vingvo tikah tar lo dingin raalring aw, ti ih in  rak zirh hi riahsiatnak ngaingai a si. A ngaingai ahcun kum upat cu mangbangza a si lo. Jesuh Khrih dungthluntu pawl in thupizet ih hmuh theinak an rak nei. Paul in, “Kan taksa ruangpi hi ttumsuk vingvo hmansehla kan sunglam nun cu nitinte tharsuah ringring in a um a si” (2 Korin. 4:16) a ti.           

Kan taksa a tar deuhdeuh ti langnak a um bangin kan nunnak a ttha deuhdeuh ti hmuhsaknak a um thei ve. Thin sia, thin tawi, ngaih um lo ti si loin, Jesuh thluntu mi pitling pawl cu ngaidamnak, duhdawtnak le zawnruahnak lam ah an tthanglian vingvo. Kum tar vingvo ti cu Jesuh bangnak lamzin zawh vingvo tinak khal a si. A sullam cu kan thinlungput le kan mizia ah Rundamtu ih nehnak nun le a famkimmi a mizia a lang deuhdeuh ding tinak a si.           

Curuangah kan kum a tar deuhdeuh tikah thlaraulam khalah tthanglian pitling in Jesuh bang deuhdeuh zuam uhsi! Cutikah kan rualpi pawl in kan tar hi zoh mawi le duhnung sinsin in an thei ding.    – Jow Stowell 

Kan upatnak ci hi nolai ah a keuh,

Hmuan ah thlai le hrampi ci an keuh ding a fiang;

Duhdawtnak le thutak in kan vorh tikah,

Sui thlai thar puai kan thleng ding ti kan thei.   – D. De Haan 

Kum upa si menmen hlah, Jesuh dungthluntu sinak ah tthanglian aw.

(Visited 32 times, 1 visits today)

Comments

comments

Comments

%d bloggers like this: