Tanglam Zin In Malaysia Ra Pawl Harnak Tong

Falam Times, Malaysia
April 19 2012

Tanglam zin (Thailand ram kaan in) in Kawlram ihsin Malaysia a ra mi Chinmi tampi hrang ahcun thil hi an tumtah vekin a can lo hlei ah harsatnak tampi an tong bet a si tin thu don a si.

Yangon ih ummi puaisa Pa Thang (hmin ngaingai si lo) cun Malaysia a feh duh nan tangka a harsa tu pawl cu Ks. 150,000 lawng dil in Malaysia ram feh thei dingin ka lo bawm ding tin a ti. Hi Pa Thang ih lemnak ruangah Falam mi tel in Chinmi tawkfang lai cu tanglam zin zawh in Malaysia ah an ra.

Asinan hi Chinmi pawl hi Thailand ramri lan in Malaysia ramri sung an luh veten Malaysia ram ih ummi Kawl/Malay puaisa (mi-hmuak puaisa) pawl cun an rak hmuak ih puaisa dang (mi-tlen puaisa) pawl hnen ah tangka thawn an zuar. Hi mitlen puaisa pawl cun cui an leimi Chinmi pawl cu mi pakhat ah tangka RM 2,500 (Ks. 650,000 lenglo) thawn an tlen aw ter, asilole, an mah a tlen theitu ding sungkhat unau pawl hnen ah phone an set ih an tlen ter.

A liamcia January thla ah Chinmi pakhat Cung Cung (hmin ngaingai si lo) cu puaisa Pa Thang ih bomnak thawn tanglam in Malaysia a ra ih Malaysia ramri a thlen veten mi-hmuak puaisa pawl cun an rak hmuak ih mi-tlen puaisa pawl hnen ah tangka thawn an zuar. Cun, mi-tlen puaisa (Chin mi thotho) cun cui Cung Cung cu tangka thawn a tlen aw ter nan tangka a nei lo. Mi-tlen puaisa cun Cung Cung ih sungkhat pawl hnen ah phone set ih tangka thawn tlen dingin a dil nan zohman in an tlen thei lo. Curuangah cui puaisa cun Cung Cung cu sal vekin hna a tuan ter ih a hlawhmi tangka cu amah in a laksak theh.

Thlahnih hrawng a rei hnu ah cui mi-tlen puaisa ih a rak lei mi Falam mi minung pali cu a thup ten an tlan ruangah cui puaisa cu a thin heng ih Cung Cung riangri cu innsung ah zarh hnih lenglo lai a kharhkhum. Cui puaisa cun a thupten a tlan tu Falam mi pali hrangah Malay tangka RM 12,000 (mi pakhat ah RM 3,000 zin in) in pek a tul tin Cung Cung ih sungkhat pawl cu a ti. Tangka in pek thei lo ahcun ka that ding, asilole, Thailand ramri ah ka zuar sal ding tin a hro.

Cung Cung ih sungkhat pawl cun a cang theitawk in cui mi-tlen puaisa thawn rualrem dingin caan tampi lak in an zuam nan puaisa pa sawn in a duh lo. A neem zawng in thil ti a theih nawn lo ruangah hi thu cu March 29 2012 ni ah Kuala Lumpur ih palik zung tumpi pakhat a simi Bukit Aman Police Station ah thuhla than a si. Palik pawl in hi thu cu ni kua sung lai felfai zet ih zingzoinak an neih hnu  April 6 ni ah cui mi-tlen puaisa pa cu a mai umnak inn ah hmakhat ten an va nam in an va kai. Puai-sa pa ih a kharhkhummi Cung Cung le mi dangdang pawl khal, an zaten minung 13 kaih an tuar ih thawnginn sungah kharhkhum an si.

April 18 2012 ah hi minung 13 pawl ih thu cu thuthennak zung (court of law) ah rel a si ih tu ahcun an zaten immigration camp ah kuat an si zo. Hi kaihmi pawl sungah zohman passport le visa nei an um lo ruangah an zaten Kawlram ah kuat kir an si ding tin himi thu ah tuanvo a neitu  Malaysia rammi palik bawinu (bo thum) cun a sim.

Cung Cung vek in tanglam zin zawh in Malaysia ra thlen hnu ah puaisa pawl ih kharhkhum le zuar a tuar tu Chin/Falam mi tampi an um lai. March 24 ni khal ah Thailand ihsin tanglam zin zawh in Malaysia a ra luttu Chinmi minung 15 cu Malaysia ram sung an luh veten palik pawl in an kai ih thawng inn ah an khum.

Tuvek in tanglam zin in ra tahratin puaisa pawl kut sungah zuar a tuartu le harsatnak a tongtu pawl cu Malaysia ih ummi Chin/Falam pawlkom pawl khal in bomnak pek daan ding a har zet. Palik pawl hnen ah an thuhla thlenpi ding lawng hi pawlkom pawl ih ti theimi a si. Tanglam in daan lo ih ram sung ra luh le minung zuar awk hi tih a nung zetmi thil a si ruangah Malaysia ram ih ummi Falam Refugee Organization (FRO) cun pawlkom hmin in hivek thuhla cu zianghman a buaipi thei lo. Kaih le zuar a tuartu pawl ih sungkhat unau pawl sawn hin anmah ten palik pawl hnen ah bomnak an dil a tul a si. Curuangah tanglam zin hmang in Malaysia a ra tumtu zozo khal nasa zet ih ralrin a tul tin FRO ih tuanvo neitu pawl cun an sim.

 

(Visited 241 times, 1 visits today)

Comments

comments

5 Comments

  1. Siangte Senhri says:

    Ka thin hi ee,kan sungkhat pa pakhat a rak tong ve ih an caw hal le an bike zuar rori ih a nu le in an tlen,ziang tluk in kan thin a phang,hi thu hi theh vorh vivo seh la a tha nasa ding tin ka ruat.

  2. feh nawn lo ding a si ko.
    Kan feh fawn, harnak kan tawn tikah kanmah le kanmah kan hmu aw dah si lo, midang lawnglawng kan mawhthluk… Pathian nunsimnak kan tawng famteh…

  3. Van Nei Zing says:

    kan laimi nun hloh ter tu sihi a va zahthlak ve aw ka ti.mitthep kar ih hloral thei mi sumpai le neihnun duhtuknak hin kan duh nunnak lai nungphung a hloh ter thei mai hi cu a poi a si.Pathian fa duhdawtnak nun kan nei mi pawl khal hminsiatnak thawn kan thleng thei mai si lo maw ka ti.
    laimi a si mi hmuah in kan nun tu khawsaknak hi ralrin kan thiam a tul.lennak le hminthat nak cu dingfel nak in a ra a siih Pathian ih bawmnak lawng in a si. Na tih theinak le zuannak in a si lo. kan Pathian mithmai zoh in kan lai nun mawi ter tu le thanso ter tu si zuam cio uh si….kan hnatuannak hmuh khal ah. siat lam pan lo in that lam pan thei tu si zuam cio uh si.lam in hruai tu hi Kan Pathian si hram seh.

Comments

%d bloggers like this: