Tangka Pia Hnih

 

 

June 16  

Tlawngkai Nihnih

 

 

 

Siar:

Tirhthlah 2:40-47

 

A ttul a sam mi pawl hnenah na tuah theizat tiangin thil ttha tuah aw.    – Thufim 3:27

 

Kumkhat Sung Baibal:

–   Nehemiah 4-6

–   Tirhthlah 2:22-47

 

Kan innsang hmanmi internet cable pawl thlengh a ttul ih, hri hlun pawl cu carek ihsin kuat kir ding le a kuat man cu company ih liam ding a si. Tikcu caan a rei nawn tiang telephone ka set rero nain ziang thu hman a kir lo. Asinan cuih thilri pawl hrangih pek dingmi sumsaw dilnak ca sawn a ra thleng.

 

Cuih thu felfaiter dingin kuat man cu keimahte liam in ka kuat kir saal. Ka kuat hnu vei tampi ka sut rero nain ziang thu hman in sim kir lo. Caan a rei nawn hnu ah paisa pia hnih in kahmi lawng ka ngah. Pehtlaihnak tthat tlo ruangah a si.

 

Riahsatza a simi cu kawhhran sungih mi tthenkhat pawl in an ttulhainak ah poisat sak lemlonak an tong ttheu. Innsungsang thu, nauhak fingkhawinak thu le tleirawl pawl kaihhruainak thu ah thuron ding an duh. Duhdawtnak thawn tuamhlawmtu kiangkap ttha an hiarhaal. Cuvek caan ah kawhhran in in poisat sak lo tivek in an ruat aw ttheu.

 

Kum zabu pakhatnak ih Kawhhran khal hi lian le famkim cu an si ve lo. Sihmanseh, midang ttulnak ih bawm awktonnak ah rin umzet in an nung. Jerusalem kawhhran ih zumtu pawl in an thilri neihmi le an hlawthil pawl an zuar ih an ngahmi tangka cu an ttulnak vekin an zem aw” (Tirh. 2:45).

 

Pehtlaihnak ttha ih hramthawhnak cu midang ih ttulnak theih saknak in a si. Himi in bomnak a ttultu pawl an ttul tikih bom theinak a suahter. Thilri in siseh, thinlung lam ruahnak le thazaang pek awknak in siseh a ttultu pawl hnenah Pathian hnenih a rami duhdawtnak thawn kan duhdawt thei ding a si.

 

Kawhhran sungih hnattuantu hmuahhmuah in,

Ttongkam le tuahnak in;

A hleice ih ttulnak neitu pawl,

Theithiam ding a si.

 

Pathian in na hrangih a poisat vekin midang hrangah poisa ve aw.

(Visited 19 times, 1 visits today)

Comments

comments

Comments

%d bloggers like this: