Tangdornak Lamzin

February 11

Tlawngkai Nithum

 

Tangdornak Lamzin

 

Siar:

Saam 131

 

Bawipai’ hmai ah tangdor in um uh la a lo khaisang ding. – Jame 4:10

 

Kumkhat Sung Baiblal:

          Puithiam. 11-12

          Matthai 26:1-25

 

Ka rualpa in, “Ka tangdor theinak hi ka hmaihngalnak a si,” tiah a ti. Cumi in hnihsuah sainak ih an relmi hruaitu pakhat a tangdornak ruangih laksawng an pekmi thu i mangter. Cupa cu tangdornak laksawng a cohlan ruangah zarhkhat hnu ah an laaksak saal ti a si.

 

David khal, “Ka hngalnak cu ka hlon zo ih ka puarthaunak khal ka hlon zo,” (Saam 131:1) a ti tikah a tlun ih simmi vekin a palh ve a bang. Hmanseh a thuhla kan theihmi cu a tangdornak hngalpitu a si lo. Saul ih milai pawl in siangpahrang tonak lon a duh tiih an puh tikah David in amah le mah cutluk ih thupi le saangzet in a ret awk lo zia a sim a si.

 

Cu ai ah David in naute in a nuih ttang sungah hnangam tein a um bangin Bawipa ih ttaang sungah um a zir (c. 2). Naute cu a nu le pa lawng ring ih a um bangin Saul ih dawinak ihsin a tlan sung hmuahhmuah amah ruun dingah Pathian hngak in a um. A hrang ih a thimbikmi caan a thlen hmanah David in a ttulmi a theithiam ih a milai pawl hnenah, “Atu le kumkhua in Bawipa cu rinsan uh,” (c. 3) tiah a ti.

 

Tangdornak lamzin cu dot hnih in a um. “Zo kan si?” ti mah le mah theihthiam awknak le mah le mah saangzet ih ruah awk hnakin kan sinak diktak theih awk ding a si. Asinain a thupibik cu, “Pathian cu zo a si?” ti theih a ttul ih hlei ah a saangbik ah ret tahrat in Amai’ tikcu ah Amah in a tthabik a tuah ding tiah rinsan ding a si. – Albert Lee

 

Tangdornak cu a bah theimi laksawng a si,

Ngah harzetmi laksawng a si fawn;

Pathian hmai lawngah tang kan dor thei,

A Fapa vekin Amah kan rianh tikah.

 

A neih hmuahhmuah ka hrang ih thawinak a petu hrang ahcun

kan peekmi thawinak hi a tumtuk ti a um dah lo.

Comments

comments

Comments

%d bloggers like this: