Tamter Aw

January 23

Tlawngkai Ninga

 

Tamter Aw

 

Siar:

Isaiah 6:1-10

 

Siangpahrang Uzziah a thih kum ah Bawipa ka hmu. A siangpahrang tokham parah sunglawi le huham neizet in a to ih a sunlawinak puan cu Biakinn sung a khat ttheh. –Isaiah 6:1

 

Kumkhat sung Baibal:

          Suahlannak 7-8

          Matthai 15:1-20

 

Rawl dawr tumpi ih rawl cah hnu ah tangka kaitu pawl in thu an sut ta ttheu: “Na duh bet lai maw?” Rawl an cah zomi hlei ah a dang an duhbet maw ti an sut.

 

Cuvek in Pathian hmai ih kan rat tikah in sut ding ka zum: “Keimah in theihnak tam na bet duh maw?” tiin.

 

Isaiah in Pathian hnen ihsin cuvek a tong. A nunnak ah harsatnak a tonnak ihsin Bawipa a hmu, “A sunlawinak le huham thawn” (Isaiah 6:1). Hih a tonnak ihsin Isaiah in Pathian ih thianhlim daan a theihnak a kauter. Pathian ih lungput le maksaknak a hmu.

 

Pathian in Isaiah cu a sualnak tampi a theihter (c. 5). Cumi cun Pathian ih zaangfah ngaidamnak le thianhlimternak ah a hruai (cc. 6-7). Isaiah in a sualnak ih thukzia a theih awk hnu lawngah Pathian hnen ihsin ngaidamnak le kholhfainak a cohlang thei. A netabik ah Pathian thawn an ton awknak thawngin Isaiah cu midang hnenah feh dingih pumpeknak le Pathian an theihnak karhzaiter dingih bawm a duh thu a than (cc. 8-9).

 

A maksaknak thei tam sinsin dingah Pathian cu atu dil uhsi!

 

Thluasuah Bawipa nang lo theih ka duh,

A hlan ih ka lo theihnak hnakih ttha sawn in;

Na Thu sungah na tumtahmi maksak ka siar,

Thei tam sinsin dingah in bawm aw.

 

Pathian theih cu mi a hiip,

Pumpak ih Pathian theih cu nun thlenghnak a si.

 

Comments

comments

Comments are closed.

%d bloggers like this: