Taleban pawlin Pakistan PM leh President Thah Tum

The News Daily thuthangca in a tar lang nakah Taleban pawlin Pakistan Prime Minister Yousuf Raza Gilani leh President Asif Ali Zardari leh an sungkhat pawl cu thah cimit thluh an tum tiah an tar lang. Pakistan Cozah in Taleban pawl do cimit dingih a ralkap pawl a kuat bet rero ruangah Taleban pawlhi an thin a heng zetih, Islamabad ihsi Km 150 ih hla Takht Bai an timi kiangkap ih ralkap um pawl khal a tam thei bikih thah an tumthu an puang.

Taleban hotu cun PM Yousuf Raza Gilani cu muslim sakhua hngetzet hnuaiih suakmi a si ruangah  Malakand bialih Muslim dan Shari Law hmannak ding a thlawpzet an zumih, Asinan Pm  Yousuf Raza Gilani hin Taleban pawlcu nuai cimit thluh dingih thu peknak a suah ruangah Taleban pawlcun thah mailo cu duh hril dingdang kanneilo asi an ti.

Taleban pawlcun mizan ah thuthangca latu pawlih hnenah teliphone in PM leh President an thah tumnak thu hi an simih, Himi ih tlunah PM Yousuf Raza Gilani ih suah nak khua leh Pakistan PM hlun Benezer Bhuntto phumnak thlan khal Bomb puah an tumthu an simbet. Taleban pawlin thah an tummi pawl lakah Ralbawi pawlleh civil mi bawi Upa ziang mawzatih  hmin khal a tel. Taleban pawlcun hi an mithah tummi pawlcu khuitawk hmun leh can khal ah a rem can nak hmun ih thah an tumthu an sim.

Tu ah hin Paksitan ralkap leh Taleban pawlcu nasa  zetin an kap aw rero lai ih Pakistan Cozah in Taleban pawl dotu dingih ralkap 12,000 a kuatzo mi ih tlun ah India ramri ih a ralkap dang pawl kokir salin Taleban pawl do tu dingah a kuatbetih  tu ah hin Taleban pawl dotu dingah Ralkap 15,000 kim dingin Pakistan cun a ralkap pawl a kuatbet rero lai.  Tu ah hin Pakistan ralkap pawlcun raldo nak Tank leh helicopter thawn Taleban pawlcu a kap rero laiih mizan  khalah Taleban pawlih tan hmun khuar nakhmun Kahbel Tehsil ih Nunau tlawngInn pahnih leh  Palik pawlih umnak hmun Taleban pawlin an laksak ih um hmun khuar nakih an hmanmi hmun pawlcu Pakistan Ralkap pawlin tlunvan ihsin Helicopter in Bomb a thlak ciamco ih lei hnuai lamih sin Tank leh meithal Machine Gun hmangin a kap ciamco ih minung 60 lenglo an thi tiah Pakistan ralkap thupuangtu cun a sim.

Pakistan ram bawmnak dingah US President Barack Obama cun dollar billion 7 pek a raktiam zo ih asi nan himi hi US rorel nak Inn Congress member in an pawmpi ta a tul dingih, himi thu ah US Congress Member pawlhi an duhdan leh an ruahdan a bang awlo zetih, Congress Member hrekkhat cun himi thu ah Pakistan in India thawi an karlak thu an tiamkam awknak thazet a neihta a ttul asi anti.

Surbung Tlang Thuthang Siarbet

(Visited 33 times, 1 visits today)

Comments

comments

Comments

%d bloggers like this: