Syria Ram Prime Minister Ram Dangah A Tlan Suak

Syria ram  buainak ruangih nitin minung ziangmaw zat an thih rero laiah, an ram Prime Minister, Riad Hijiab cun an ram Cozah  phatsan in a nupi fanau pawlthawn ram dangah an tlansuakih, himi ruangah khawthlang ram pawlcun President, Bashar Al- Asaad ih Cozah cu tluse soprop zo tlukah an ruat. White House khalin  Prime Minister, rori hmanin a suahsan ruangah President, Asaad ih Cozah cu  damkhawsuak ding a um nawnlo ih tuah cun Opposition pawlhi leitlun mipi ih mi latubik an sizo tiah  White House khalin thusuah nak a tuah.France ram Cozah khalin  President, Asaad ih Cozah cu  a ziamral rero ih,  a dinsuak nak ding lamzin a um nawnlo tiah an simve. 

Mizan sunaah khan Prime Minister, Riad Hijiab cun President, Asaad ih Cozah cu Tapung misual tluk an sizo ih, Curuangah telnak tlak a si nawnlo tiah a sim. PM, Riad Hijiab hi Syria Cozah buainak ih Opposition lamih  tlan mipawi mawh tumbik um hmaisabik a si. PM, Riad Hijiab leh a sungkhat pawlhin khuitawk ram an pan timi fiangtei puannak cu a umlo nan Qatar an pan zum a si.

Tui dinhmun ah  Syria ram khawpi Aleppo ah Cozah ralkap leh Opposition ralkap pawlhi an kapaw rero laiih, COzah ralkap pawlin Tank leh Vanzam hmangin ralthuam thazetzet an suah rero nan Opposition ralkap palwin dinhmun hi a hngetsawn a bang tiah an sim. Kandung thla ah khan Iraq ramih Syria ram palai Nawaf Fares khalin an ram Cozah suahsan in Opposition lamah a tlanzo ih, an ralkap Bawi Brig General, Manaf Tlas khal President, Asaad lamih hngetzet a sinan kandung thla ah khan  Cozah phatsan in Opposition lamah  ralkap dang ziangmaw zat thawn an tlanlutzo.

Opposition lamih tlanlut Prime Minister, Riad Hijiab hi kum 1966 ah khan asuakih tuah kum 46 milawng a silaiih, 1988 ah khan  Baath Party Command a zawmih, kum 2008 ah khan  Qunaytira Consituency ah Governor a si,  PM Riad Hijaib in Syria Cozah a suahsan thuhi Syria Coah TV khalin an puangih,, himi hlante ah himi TV Station ah bomb a puakih himi hnu reilo te ah PM suahthuhi  puancih a sive.

Himi hnureilo te ah  Prime Minister Riad Hijiab ih thupuangtum cun  Jordan ramih al-Jazaara TV ihsin  Prime Minister, Riad HIjiab leh a sungkhat pawl  an tlansuak thuhi an puangih tuah cun  hmunhim ih an umthu khal an sim.

(Visited 50 times, 1 visits today)

Comments

comments

Comments

%d bloggers like this: