Syria Ram Buai Nak A Sosang

Pu Sum

Nikum March tla ihsi Syria ram President, Bashar al- Assad hlawnthlak tumnak ruangih an buainak cun sosan lam an pan vivo ih himi an buainak ruangah minung 40.000 zikte an thithlang. tihni sun khalah Cozah ralkap leh Opposition ralkap Free Syrian Army pawlin do awknakah minung 160 an thibetsal. Opposition lamttang  Local Coordinating  Committee hotu pawlin an sim nakah  hi an do awknakah hin Idlip Province ah minung 72 an thiih  Damuscus khawpi leh a kiangkapah minung 42 an thiih ramsung hmundangdang ih doawknakih thithawn minung 160 an si tiah an tarlang.

Damuscus khawpi ih um pawlcun Cozah ralkap leh Opposition ralkap pawlih tuittum an do awknak hi tuikum July thla hnulam ih an doawk natsat bik ttum asiih, meithal bomb ih hleiah Helicopter leh raldo nak Vanzmam khal an hmang ciamco ih minung tamzet cun  hmunhim lam panin an umnak in leh lo pawl an suahsan rero tiah an sim. Damuscus khawpi ah hin Israel ram a dinsuak hnu nihsin Palestinian raltlan pawl tamzet an umih himi sungih minung tamzetcu President Assad ih lamtang an si ruangah Opposition Ralkap pawlkhalin hi Palestinian pawlin umnak hmunpawlhi laksuak tengteng tumin an nawr rero laiih Cozah ralkap leh Opposition ralkap pawl an do awknah ah hin Palestinian minung tamzet khal an thitel. Opposition ralkap Free Syrian Army pawmcun Damuscus leh a kiangkap ih ralkap leh Cozah hmunpi pawimawh pawlkhal laksuak tumih an nawr rero lai.

Tui dinhmun ah Opposition pawlih dinhmun a thasawn ih a lang ruangah Syria ramah Cozah thar a dinsuak cing zum a siih, a sinan himi laiah Opposition pawlhi an ngaihdan bangawk lonak tete an neihve ruangah British ram aiawhtu pawlcun Opposition pawl hmunkhatih ttangtlangih ngaihdan bangaw thei dingih lamzin an hawl rero laiih,  Opposition hotu pawlkhal ton leh kawm an tumih, hiti vekih Opposition pawl an ngaihdang bangawlo tete a um ruangah  Cozah tharsuak khal sehla ramsung buainak hi  a rehthei taktak ke maw? tihi thusuh nak tumzet a si.

British Cozah cun Opposition pawl hmunkhat ih ngaihdan bangaw an neihthei nakhi a thupibik a si ruangah Jordan, leh Turkey ih Syria Opposition raltlan hotu pawlkhal zamrangih ton leh biak an tumthu an simih,  British Cozah hin Syria ram Opposition pawlhi paisa pound Million 50 ih an bawmsal ding thukhal an simih, tuikum kumtur ah khan British Cozah hin Pound Million 500 in an rak bawmzoih, British Cozah cun Syria ram Opposition pawlhi ralthuam leh ralkap thawncun a bawm tumlo thu asim. tui dinhmunah Syria ram mipi Million 2 leh 5,00,000 hrawngcu bawm ttulzet dinhmun ah an dingih raltlan an tam vivo ruangah tuikum cemzawngah cun raltlan minung 7,10,000 an kimdingah zum a si.

Iraq Bomb Puak

Iraq ram khawpi Baghdad ihsi Km 20 hrawngih hla  Taji khua ih ralkap laknak hmunpi ah bomb a puakih minung  24 an thiih midang 40 lenglo in hriamhma an tuar. hi bomb puahtu hin ralkap pawl an umnak hmun ihsi Motor thawi an suahzik zawngah an kiangah a bomb paimi a tipuakih mithi lakah minung 19 cu ralkap an siih midang cu Civil mi an si, tui zarh tlawngkai ni khat khalah Baghdad ih ralkap hmunpi luhnak kiangah thihcilh bomb  apuakih minung 6 an rak thizo.

Comments

comments

Comments

%d bloggers like this: