Syria Ram Buai Nak A Sosang Sinsin

Syria ram buainak cun sosan lam a pan sinsin ih, mizan sunah khan an ram khawpi Damascus ah Cozah ralkap leh Opposition lam ralkap pawlcu nasazetin a ttumhnih nak an kapaw ciamco salih minung 70 an thibetsal. tuizarh tlawngkai nihnih khalah  Cozah ralkap leh Opposition ralkap pawl kahawk nakah minung 91 an thi ih, nikum March thla ihsi Syria ram buainak ih mithi cu 20,000 an kimzo. Hi Damascus khawpi sungih an doawk nakah Cozah ralkap pawlcu In tinkim ah an lutih  hmun leh hmunah minung ziangmawzat an kapthat tiah an sim.

Himi laiah Opposition lam ralkap pawlcun an ram khawpibik sangtu Aleppo ih Vanzam tumnak hmunpi lak tumin an kapve rero laiih, Cozah ralkap pawl hnen ihsi an lawn ngahmi raldo nak Tank hmangin himi Vanzam ttumhmun pihi an nawr rero lai. himi ih hleiah Turkey ramri tluan lam khalah Cozah ralkap leh Opposition ralkap pawlhi nasazetih an kapaw rero laiih, BBC in a sim nakah Aleppo khawipi ih an kahawk nakah  nehsawntu cu an um cuanghrihlo nan Opposition ralkap lam pawlih dinhmun hi a hngetsawn a bang tiah an sim.

Opposition ralkap pawlhin Aleppo an lakthei a si len Damascus  khal lak antum tiah theih asiih, himi laiah Opposition ralkap pawlih thiltuah dankhal a diklo nak tampi a um tiah an simve ih, Aleppo thang In sungih thawngtla pawl Cozah lam ttang ih an ruahmi pawlcu Opposition ralkap pawlin an kahthat lai zukpawl tilang asiih thisen kai hnianghniang ih taksa lawngte ih an umter laiah an lu, an hngawng leh an hmai ah an kap. himi vek a si ruangah  Syrian National Council cun Opposition pawlih thilti danhi a mawhthluk zetih,  Human Rights Watch khalin Opposition ralkap pawlih thilti dan in thil thalo tampi a suakter thei a si tiah an sim.

Tihni sun ah khan Cozah ralkap pawlin minung 100 lenglo an kaiih, mizan zingah minung 43 ih ruang pawlcu hmuhsuak an siih, midang pawlih thuhla cu zianghman theih nak a um hrihlo.

(Visited 45 times, 1 visits today)

Comments

comments

Comments

%d bloggers like this: