Suu Kyi Tha-way Ah

BBC, Myanmarnewshub | January 30

NLD hruaitu Suu Kyi cun a hmaisabik hrang Tha-way district ah hrilawknak hrang campaign nei in Janaury 29, zarhpini ah a feh ih mipi 10000 lenglo in an rak hmuah thu thuthangca in a tarlang.

Suu Kyi cun fehkhawmtu mipi hnenah thusimnak anei ih hi a thusimmiah Suu Kyi cun Kawlram pyituh-hluatdaw ih luh a tumnaksan cu ram hruaiawkdaan ah mipi hrang ih thansohnak a telve lonak pawl remthat dingah a si thu a rel.

Suu Kyi cun, “ NLD in lailak-hrilawknak ih a telve naksan cu  ram hruaiawkdaan ah mipi hrangih thansohnak um theilo dingih tawlrelmi pawl hmuahhmuah cu remtha ding in a si. Hi cu kan ti dingmi a si hrimhrim. Democracy kan ngah theinak ding ah theitawk kan suah ding. Kawlram dan (mipi palbehnak dan) cu kan nawtreh ding. Harsatnak tampi khal kan pahtlang a tul ding. Asinan tanrualnak in ziangvek harsatnak khal kan pahtlang thei a si.” tiah a rel.

Mipi cun banner ‘Kan Thinlungput Vek Thinlungput Neivetu Suu Kyi’ tiin tumpi nganmi cu an keng ih ‘Suu Kyi dam rei sinsin seh!’ tiah lungawinak thawn an au ih Suu Kyi an duhnak an ti lang ve a si.

Suu Kyi cun mipi hnenah NLD cu mipi thawn kutkaiaw in mipi nelmi le mipi ngaihsaktu political party tha ih din a tum thu khal a rel. Suu Kyi cun, “Tu ih hihmun ka ratnaksan cu nanmah(mipi) thawn nelawk in kutkaiawk kan duh ruangah a si.” tiah a rel bet.

Tha-way kiangkap : Laung-lung Township, Mawng-ma-kan le khaw dangndang khal ihsin Suu Kyi airport ihsin hmuak ding in mipi 100000 an suak khawm ih Suu Kyi cu a fehnak hmun kip ah an thlun a si.

April 1 ih neih a si dingmi Llailak-hrilawknak ah NLD cun Division le State 9 ihum Myo 50 lenglo ih seat 48 a lawngnak hmunah an tel ding ih Tha-way, Laung-lung ah cun NLD ihsin Oo Awng Suu cun seat a cuh ve ding a si.

Suu Kyi cun hi a campaign cu Tha-way ihsin Laung-lung Townsip, Auh-ye-phu khuaah, cu’i khua ihsin Mawng-ma-kan khua ah nazi 1:00pm ah a thleng leh ih tlailam nazi 3:30pm hrawngah Tha-way ah feh in lamzinpi tawnawknak hmunpibik ihsin mipi a mah thluntu hnenah thusimnak a nei a si. Suu Kyi cun mipi hnenih thu a sim theh ve te’n a umnak Yangon ah vanzam thawn January 29, zarhpini thotho ah a tlung leh cih a si.

(Visited 25 times, 1 visits today)

Comments

comments

Comments

%d bloggers like this: