Suu Kyi Ralkap Acozah Thawn Ṭangtlang Ah Puh

Aung San Suu Kyi cu kan ram ih dolettu party pakhat in ralkap acozah thawn an ṭangtlang tiin a puh. Curuangah ramdang ihsin tangka hramretnak asilole sumpai phumlutnak pawl cu mipi hrilmi “Democractic acozah ngaingai” a si hrih lomi atu dinhmun ahcun tuah hrih lo dingin a dil.

“Aung San Suu Kyi cu dunglet hoi in atu ahcun ralkap acozah thawn rualremnak a tuah ih thukhat hlakhat in hna a tuan rero. Amah cu atu ah ralkap thuneitu bawi pawl thawn kom-aw in an hnaṭuanpi ah a cang zo. Hi vekin thil a tuahmi hi dolettu democracy hruaitu ih tidan hman le dik a si lo,” ti’n Bo Aung Din, Parliamentary Democracy Party (PDP-Burma) ih Chairman, cun a sim.

Bo Aung Din in PDP cun 2008 ralkap pawlih tuahmi Daan hrampi le 2010 “Lailak Hrilawknak” pawl cu an ṭawmpi lo thu a sim. “Ralkap acozah in a tlin lomi daan hrampi cu a tuah. PDP cun 1947 Daan hrampi lawng kan lungkimpi,” ti’n Bo Aung Din cun a simbet ih Assembly (Hluatdaw) ih ralkap zatek 25 a tomi khal cu a lungkim lo thu a sim lang. Asim bet vivonak ahcun, “PDP cun ralkap lu pawlin Kan ram ah democracy ukawknak kan hmang thok zo tiin thuphan a permi khal a thei ringring. A ngaingai ahcun ralkap ih aana lakthluhnak le democray cu a rawi-aw thei lo lawlaw mi a si. Cuvek si cingih democracy cu a tling hrimhrim lomi a si.

Ralkap acozah hnuai ahcun Daan le Duun khal a um lo, democracy, zalennak, himnak, daihnak le hnaṭuannak le ram thuhla zuamnak pawlah bangran ih caanṭha ngahnak pawl cu a um hrimhrim lo. Ralkap acozah ih thuneihnak a lak kum 1962 ihsin thok in minung thawng tampi cu thah, thawngthlak, hrem, dawi le palbet an tuar ih nunau le nauhak pawl cun suam le kaihhrem, le an neihmi thilri sumpai pawl cu long le siatsuah an tong,” ti’n a sim.

(Visited 56 times, 1 visits today)

Comments

comments

Comments

%d bloggers like this: