Surbung Vanzam Tumhmun Thu Neta

SURBUNG VANZAM : BEIDONG LO IN
safe_image

Khuang Ling
Falam Pithuh Hlutdaw MP

Ulenau zaten
Kan helhkam zet mi Surbung vanzam tumnak thu ah kil i kip in Falam khawnu khawpa, Falam mipi, Falam MP zate kan zaten kan zuam cio ih lungawi um nasa. Hlutdaw lamah Falam Amyotha MP Thangte in a thei tawk a zuam thu a ngan zo. Pithuh Hlutdaw MP kei khalin ka thei tawk ka zuam thu mipi hnenah theihter dingin tuanvo ka nei tin ka ruat. Cozah lamah Chin Vuanzi khalin a theitawk a zuam. Kan zaten kan tangtlang ih kan hlawhtling leh ko ding. Theih men dingah keimah lam ih tanlak mi te ka ngan.

1.  2011 March 15, ah Transport Minister Ngian Htun Aung hnenah Pu No Than Kap in Surbung thuanthu cabute ih facts a lak khawm mi i pe ih Minister hnenah ka pe. Minister in hivek a um maw si tiin i sangih Surbung thu a rak thei dah lo ti a lang.

2.  2012 March 5, ih India PM Manmohansignh a rat laiah Chin Vuanzi in CPP president hmin in President Theinsin le India MP hnenah Chin State thansonak ding thu Mirang in ngan a siih cui ca cu an pahnih hnenah pek a si. Hi ca sungah Rih-zin le Surbung thu khal ngan cih a siih, Surbung thuhla facts Mirang ih kan leh mi kuat cih a si.

3.  2012 September ah Thantlang MP Pi Za Tlem in Chin State Vanzam tumnak in tuah sak uh tiin Hlutdaw ah a dil ih amah thawn Transport Minister Ngian Htun Aung kan tong ( Hlutdaw sungah ). Pi Za Tlem cun hmunram thatnak khui khalah pawi ka ti lo tiin a sim ih ka tha a tho zet (Surbung khal a pawi lo a tinak a si). Cui zawngah, Minister hnenah kan dung laiih ka lo pek mi Surbung Vanzam tumnak thuanthu cabute kha rak zoh sal aw ka tiih “ee” tiin in sang.

4.  2012 October ah Hludaw Chairman Thura Shweman le Transport Vuanzi Ngian Htun Aung  hnenah Surbung tuah dingih dilnak ca ka pe. Ka ca ka pek hlanah Falam MP Thangte hnenah ka hmuh ta. Chin Vuanzi khalin President hnenah a hranten ca a kuat ve.

5.  2012 October thla lai ihsin Surbung an zoh. An report a tha zet. Chin Vuanzi in Pu Theinsein hnenih a pek mi ca tlunah a tul dan vekin zoh fiah dingin thu suah a si thu President zung Vuanzi Oo Hla Htun hnenin kan thei bet ih kan tha a tho zet.

6.  President Chinram a tlawn laiah tuah a that ding thu a sim ti cu zapi theih a si.

7.  Culaifang ah kan theih cio bangin hivek thu Hlutdaw ah a suak.

ZIANG A CANG VIVO DING

1.  Tui kan helhkam bik mi cu Surbung hi an tuah taktak pei maw ti a si. Hi thu ah, kannih cun an tuah taktak dingih “ziangtikah” ti lawng siin kan ruat.

2.  Theih ding mi ah kan Surbung lawng si loin, tui tum Hlutdaw ah Naypidaw ih Sizungpi 4 tuah dingih Cozah lam dilnak khal Hlutdaw in a phiatsak.

3.  Kan Chin state rak uktu le tui uktu rorin Surbung an remti lo thu an sim tikah ziangmawcin cu tuah loin a um hrih hi thil awm ang zet a si. Ziangahtile Thura Aung Koo le Hung Ngai cu 2010 hlan ihsin Chin State tuanvo neitu an rak si ih, anmai san laiih an hmuh suah lo mi Surbung tuah ding cu an hrangah mualphonak ah an ruat maw si, ti pangnak a si. Thil umthei a si ko. Asinan a ram ih a zir tuk ruangah, hmundang dang an zoh hnuah, an tuah leh ko ding.

Beidong mei loin zuam sinsin uhsi.

Comments

comments

Comments

%d bloggers like this: