Surbung Tlang Vanzam Ṭumtual An Hnawl; Riruang Tlang An Hril Cuang Pei Maw?

Surbungtlang

Surbungtlang

Van Bawi Lian

Chin ramkulh Falam Peng Surbung Tlang ih vanzam ṭumnak saknak ding hrang a cozah cun tuikum sung ih sak dingin sumpai budget a tuahsak hrihlo tiah thu theih a si. 24 March, 2014 Rampi rorel innpi ih an thurelnak ih an relcatnak ah Surbungtlang Vanzam ṭumnak hrang ih sumpai tuahsak ding mi cu riruang tuah a si hrihlo tiah thuhla theifiang tu hmintarlang duhlo cun a sim.

Chin ramkulh ih vanzam ṭumtual an sak tumnak thu ah Chin ramkulh peng khat le peng khat karlak ih hmuhthiam awklonak, a sezawng ih ramthukhel thawi doawknak a suak thei pei maw ti cu khawruah harza pakhat a si.

Chin ramkulh ih vanzam ṭumnak ding hrang Falam khawpi ihsin peng 7 a hlatnak Surbungtlang ah maw lole Hakha khawpi ihsin peng khat tluk a hlatnak Riruagn tlang ah maw Lole Singsin ah a tuah ding? Tedim le hmun dang ahteh an zoh bet in thuhla an tuahbet bet pei maw theih a si hrih lo.

surbungtlang vanzam tumnak fehvai lai

surbungtlang vanzam tumnak fehvai lai

Surbungtlang vanzam ṭumnak hrang tharthawhnak hi 24.10.2012 ah Pyithawngsuh level ih thlah mi Myanmar air line ih Expert Engineering U Thant Zaw Moe ih hohatnak in palai ( 7 ) pawl in Falam vanzam ṭumtheinak ding vehvai (Survey) tuahnak an nei.

March 7, 2014 ah khal Chin ramkulh khawlipi Hakha ihsi peng khat tluk a hlatnak Riruangtlang ah Vanzam ṭumtual saknak hmun le hma pawl U Tinh Lwin Oo le a kaih hruai pawl cun an neiih an lung kim zet thu khal theih a si.

November 17, 2013 lai ah Pyituh Hludaw Nayak ah Thura U Shwe Man le Hakha mipi pawl an tonawk laiah Chin ram ih vanzam ṭumak hmun a thar ih tuah hnakin a hlan ih a um cia mi Singsin Vanzam tumnak cu remṭhat dingin an rak ngen ve dah.

Hi Singsin Vanzam ṭumtual hi 1983 lai ah Myanmar Transport Ministry ihsin Wunkyi Thura Saw Phy ih a rak onsak mi a siih Paletwa-Sittwe khua hrang vanzam fate a rak zam. Hi vanzam ṭumnak hi Jet Vanzam ṭum thei dingih tuah a sizo nan tutiang hmansal cu a si hrih nawn lo.

surbungtlang vanzam tumnak fehvai lai

surbungtlang vanzam tumnak fehvai lai

16 October 2013 ah Chinland Post cun, International City Airline Organization sungtel lak ihsin zingzoitu pawl hin Surbungtlang hi Chin ramkulh hrangah a awm bik a si tiin an rak ti thu le hi hmun ram saknak ding hrang budget 200 million, 2013-2014 ih sak dingin le kum thum sung sak a si ding thu, Central Government hnenah sumpai khal dil a si zo thu a tarlang.

January 30, 2014 ah ṭuanvo neitu rampi director U Kyaw Soe le Engineer dangdang pawl zohfelnak an nei sal ih February 27, 2014 ah khal Surbungtlang ih vanzam ṭumtual cu Myanmar ram u-saungyi-vaunkyi ihsin Ṭin Naing Htun le a ho pawl in zohfelnak an rak nei salih an lungkim zet tiin thu theih a si.

Myanmar Rampi a thlengawk tiih thuhla um ihsin tlangpar mi pawl hrang vanzam ṭumtual tuah a si ding ti a um.  2013-2015 ah Vanzam tumhmun (3) pawl Kachin ram Naung Man, Rakhine ram Man Aung le Chinram ih Falam Surbung tlang Air field pawl  sak an si ding tiin Vanzam zung Director U Tin Naing Htun in a sim timi Ayerwaddy website cun an rak tarlang.

Chin mi lakih Vanzam mawngtu Australia Rampi ih zirsuak Steven R Sunthang MBA (Aviation Management) cun Chin ramkulh ih vanzam ṭumnak ding thu thawn pehpar in ‘Chin ramkulh ihh Vanzamtumnak ding hmun ṭha ih ka ruahmi pawl cu Teddim khua luhhlan mual, Rih khawdar khawhlun mual le Surbungtlang an si.’ a ti.

Hi tiih a tinak san khal ‘Cost and Benefit analysis tuah tikah, Teddim ahcun cozah in Airport a tuah duh ding ka zum lo; Kalaymyo airport thawn a nai aw tuk. Rih Khawdar khawhlun khal ah an tuah ding ka zum lo. Ziangahtilen, upa khualtlawnnak ding Haka khawpi thawn a hla aw tuk. Sumdawnnak ahcun Rih Khawdar cu a thabikmi cu a si.’ tiin Vanzam Ṭumnak le Chinram Dinhmun timi ah a tarlang.

1743604_789508491077075_208441908_n-580x435

‘Ziangah Hakha thawn nai aw dingin Haka khawpi kiangkap ah an tuah lo timi thusuhnak a um thei. Geographical location kan zoh asilen Haka khawpi kiang ih Rung tlang ruangah Haka khua thawn peng 20 kiangkap ah  Pilot pawl ih ṭum duhnak hmun pakhat hman a um lo.

Surbungtlang hi Hakha thawn a nai aw zetmi Falam peng sung ih um hmun asi. Curuangah, Surbungtlang ih an tuah ceng lo ahcun Kalaymyo Airport hman rero ding an duh sawn ding. Political pressure a tamtuk ih Haka kiangkap ih an tuah thotho asilen, hman lemlomi airfield fangfang ah a cang thei.’ ti khal in a hmuhnak a rak sim dah zo.

Myanmar rampi a cozah hin Chin ramkulh ah vanzam ṭumnak a sak tum ngaingai lo ruangah teh asi pei maw? Chin ramkulh Falam peng ah simaw Hakha peng ah simaw Mindat, Kanpalet, Tedim…. khawitawk ih a um ding khal a sile Myanmar rampi acozah Central Government hi a rang lam ih a tawl rel ding hi a phu a si tiin ka ruat.

Chin Affair Minister le Chin Minister pawl hin hi thu thawn pehpar in lungkhat pu ih hmalaknak an neih lo a si ahcun khawitawk hmun hmanah um lo in Chin ramkulh hrang ih vanzam ṭumtual kan hloh mai ding ti hi ka thin i phang tu a si.#

Comments

comments

4 Comments

  1. Thluanthlarlit says:

    Maybe, Salai Vante or Vanpi is just a loser. By the way, there is no dirty politic from the Hakha people. As long as you have loser’s mentality, you will always lose. Hakha people do not need to talk about the airport. It will come to Hakha. It is what it is.

  2. Lai mikan lung rual zet atual ngai ngai .Ziang ah ti le U Ni Win Socialism san ah, CHIN mi hrang ah budget an pek ih LAI mi pawl pakhat leh pakhat kanlung arual lo ruang ah LAI mi pawl budget cu ngah nawn lo in kawl sozah pawl hnen ah kir sal asi. Curuang ah kan lung arual lo ah cun CHIN RAM ah khoi tawk hman ah Airport an tuah nawn lo ding asi. \

  3. aziang si khal le falam upa hotu pawl cang vai an cu an ttul
    mipi in khal kan thu ngai lai tong kan ti le hakha nih kan mah kan si an ti
    chin tong kan ti ih tu ah an chin tong lala
    vanzam tual kan ti an ti ve
    hi pawl hi falam in zuam in neh sawh nautat tla abang ziang siar lo tla abang
    mai kheng sung sa mi kan peek kem

  4. Falam pawl , Hakha pawl nih an in zuam cawh huam nem man hna loh ! Nan mah buai in pei nan buai peng ko hi! A ho nih dah vanlawng tual hi Falam tuah hlah uh , Hakha ah tuah ko uh a ti hna , kawl pawl nih Hakha ah a hmun an zoh a si ah cun , Hakha mipi nih an rak lawmh ding a si ko , Kawl pawl nih Laimi an kan nawnnawk timh bia zong a si Khomei , nan thinlung put hi tluangtlam te nan Chiah lo I , nan I rem lo ah cun , thluahchuah cu nan hmu kho maw ?

Comments

%d bloggers like this: