Surbung Tlang Thuthang

March 7th, 2009.
 
America In Kepler Telescope A Kapsuak
 
America Cozah hnuai ih Vansanglam thil umdan zirnak hmunpi NASA cun  Vansangah thilnung a um maw? timi zirdingin Minung tello ih thilzoh fiangnak Kepler Telescope,  cu Florida ih Cape Canaveral ihsin a kapsuakih. Hi khawlhin Ni a heldingih  kan umnak Leilung vek Arsi 1,00,000 hrawng umnak tiang fiangten a zoh thluhding asi. Hi Vansang zoh fiangnak Kepler Telescope hi  Delta II Rocket hmangin  Cape Canaveral Air Force Station ihsin a kapsuakih Vansangih kahsuak mi hmuahhmuah lakah thilzuknak phur tumbik asi.
 
NASA ih Science Mission Directorate hotu, Dr Edward Weiler, cun tui ttumih an thil kahsuak mihi Science lamih an thiamnak tthanso nak lawng silo in Leitlun ih thil cinken tlakmi thil asi ati.Tidai umnak hmunah cun Minung khal a um theih dingih zumnak a um ruangah Tidai umtheinak ding hmun pawlkhal an hungzoh fiangthluh ding asi. Hi Kepler Telescope hin a hna hi cawllo banglo in kum 4 ihsin kum 6 tianghrawng a ttuan dingih. Mi thiam pawlih zir dingah a thil hmuhmi leh a theih mi pawlcu Vansang ihsin Leilung parah a zuk a runkuat cingcing ding asi.
 
Palestinian Authority PM A Bang
 
Palestinian Authority Prime Minister, Salam Fayyad, cun a bannak Ca President Mohmoud Abbas, hnenah a thehlut ih. Hi PM bannak sanhi  President Mohmoud Abbas, leh an hmelma an huat zetmi  Gaza Strip Uk tu Hamas pawlin Hamas leh Fatah hotu pawl kawm aw ih National Unity Cozah din an tum ruangah Hamas pawlin PM hi bangding in an ngenih cu ruangah asi. Palestinian mipawl umnakah hin Gaza Strip hi Hamas pawlih Uk mi asiih  West Bank hi Fatah pawlih umnak asiih. Hi pawl pahnih hi ngaih awlo zet do aw ringring an si. Hamas, leh Fatah pawl an ngaih awklo ruangah Israel leh Palistinian  karlak khalah buaknak khal a thlen ringring phahnak asi.
 
Zimbabwe PM Tei Nupa Vanduai Nak Tawng
 
Mizan sunah Zimbabwe Prime Minister, Mogan Tsvanirai, kum 56 mi leh a Nupi Susan Tsvangirai kum 50 micu Harare, khawpi kiangah an to nak Car cu thilri phur Truck in a Ttaih ih PM Nupi Susan Tsvangirai cu a hmunah a thicih ih  PM Mogan Tsvangirai cu a Lu leh a hngawng ah hriamhma nazet a tuarih Sizungah ret asi. President Robert Mugabe, tei nupa khalin PM hi Sizungah an vaveh ih. Prime Minister Morgan Tsvangirai cun an tawnmi vanduainak cu zodang ruanghman ah silo in an mai vanduai nak hrimhrim asi ati.
 
BBC in a sim nakah thilri phurtu Truck hi a tlancak zetih PM tei nupa to nak Car lamah a lutih a sir zawngin a hrut ih PM tei Car hi vawithum a let asi ati.   Zimbabwe ramhi kum tampi sung lamzin tuahtthatlo mi asi ruangah lamzin a se zetih mawtaw cangsual khal an tam theizet asi. PM leh a nupi hi an umnak Buhere, ih cawlh hahdam dingih feh an si. PM leh a nupi hi kum 1974 ah annei aw ih  fate 6 an nei.
 
Pakistan Bomb Puakah Minung 10 Thi
 
Pakistan Palik hotu Rahim Shah, in Associated Press a sim nakah Pakistan ram Peshawar khawpi kiangih Bedaber khaw hnar ah Bomb a puakih Minung 10 an thiih, Hi Mithi pawllakah Minung 5 cu palik bawi Officer an siih midang 4 cu ralkap leh Civil mi pakhat an si tiah a sim. Hi Bomb puakhi Bedaber khaw hnar ih lamzinpi  kapah Car var pakhatin  Minung ruang a phur tiin zoti theihlo in palik pawl hnen ah report a pe ih cumi cu  zohtum in
Palik leh ralkap pawlcun Car umnak hmun cu an panih  Car sungih minung ruang cu zohfiang dingih an hnuh suak zawngah Bomb hi a puak asi. Tu laiah hin Pakistan ramhi Islam tapung phunphun, Al-Qaida, Taleban, leh Tapung dangdang pawl an hraang nasa ih nitin deuhthaw in Pakistan ralkap pawlthaw in an kap aw ringring asi. Cui tlunah Bomb puak leh thah awknak dang khal a tam zet ringring ih tui dinhmun ah Pakistan ramcu Leitlun ih Tapung tambik nak leh ram ttihnung bik asi thlang, Tui hlanah Afgahnistan ramhi Tapung pawl ih um tambiknak hmunpi asiih tuah cun US ralkap leh NATO ralkap pawlih an do ciamco ruangah Pakistan ramsungah an lut vivo thlang asi..
 
Pathian cu Kancah nak a si

Comments

comments

Comments

%d bloggers like this: