Surbung Tlang Thuthang June 4, 5, 6

Pakistan Bomb Puak

 

Tuizingah Pakistan ram thlanglam Hayagai Sherqi hmun Muslim biak Inn ih  thlacam ding minung 200 lai fehkhawm nakah thihcilh Bomb a puakih minung 40 an thiih midang 50 lenglo in hriamhma an tuar. Bomb puahtu hi a hmunah a thicih ih, Bomb puakin Mosque leh a kiangkap ih dawr tampi a ti siat. Himi ih tlunah Pakistan ralkap Duty lamzin ih tlanlai pawl cu Bomb thawi puah an siih ralkap 7 an thibet. Hi Bomb puahtu hi zo pawl an si ti theih fiangnak a um hrihlo.

 

Surbung Tlang Thuthang Siarbet 

  • Surbung Tlang Thuthang June 4, 5, 6
  • France Vanzam Tla Hawltu Pawl Bei dawng
  • France Vanzam Tla Thu
  • Somalia Ram Buai Nak
  • Kum 12 Thawng Thla Ding
  • European Parliament Hril Aw
  • Mexico Ah Kap Aw
  • France Vanzam Tla Thu Peh
  • Lebanon Ram Hril Awk Nak
  •  Mexico Ah Nauhak 29 Kang That

    Mexico ram Sonora State Hermonsilo khua ih Nauhak farah cawmnak tlawng Inn  kang ruangah nauhak 29 an thiih  nahak dang tampi in hriamhma an tuar. Hi nauhak farah cawmnak tlawnginn hi Cozah tuahmi a siih ziang ruangah meisa kang a suak timi thu theih fiang a si hrihlo. Hi meisa kanghi Oil zuarnak kiangte ih suakmi a si ruangah a kangcak zetih cu ruangah  nauhak pawlhi duhvekin runsuah man an silo. runsuah nak hnatuantu pawlcun  tlawnginn phar siatbalin nauhak ziangmaw zatcu an la suakman,

     

    Hi nauhak tlawng Inn ah hin nauhak thla 6 ihsin kum 5 karlak minung 178 an um ih nitin tlawmngai pawlin an kilkhawi theumi an si. Mexico President, Felipe Calderon cun  hi vanduai nak ruangih nauhak thi leh hriamhma tuartu pawlcu Cozah in a tuarpi zet a si a ti. Mi tampi cun  Oil zuarnak kiangih nauhak tlawng tuah cu an sawisel zet.

     

    D, Day Hmang

     

    Leitlun ralpi voi 2 nak France ramih thil thleng pawl theih ringring nak ni D. Day hmang dingin  leitlun ralpi voi 2 nakih ralkap raktuan zotu ralkap hlun minung ziangmaw zatin France ram cu an panih, France ramih D, Day hi US President, Barack Obama leh a Inn sungsang, Canada Prime Minister, Stephen Harper, UK Prime Minister, Gordon Brown leh Prince Charles pawlin an hmanpi.

     

     D.Day hi  Omaha tipi kapah hman a siih, Himi hmunah America ralkap pawlcu Leitlun ralpi voi 2 nakah tamzet an rakthi ih. US leh a lam tangpawl minung 21,500 hrawngin hriamhma an raktuar. Germany leh a lam tangpawl khalin Ralkap tampi leh ralthuam tamzet an rak sungih, Himi laiih ralkap raktuantu ralkap hlun pawlcun hi tawkhmun fehhi an hrehzetih  an rualpi pawlih thihnak leh phumnak thlan pawlcun an thinlung sungah hna a tuantharsal tiah an sim.

     

    US In Cuba Intelligence Kai

     

    US Cozah hna pawimawh reipi raktuan zotu Walter Myers kum 72 mileh a nupi Gwen Dolyn cu  Cuba ram hrangih Intelligence kum 30 raktuan zo tiih theih suak an si ruah an kaih an siih.  US Cozah in an thuhla a relsak thlangding. Walter Myers leh a nupi hi Washington ih um an siih  an thubuai ih thiamlo an co a si ah cun kum 20 sung thawng thlak theih an si ding. Walter Myers hi kum 1977 ah khan US State Deparment hna a tuanih kum 1999 ah  State Deparment hnuaiih  Bureau of Intelligence and Research (INR) ah hna pawimawh zet a kaisal ih kum 2007 ah a hna ihsin a pension ih, Himi hnua khalah Cuba ram hrangih a hnatuan nakcu a peh zawm vivo tiah theihsuak a si.

     

    Walter Myers hin nikum sunglawng hmanah US Cozah thu thup pawimawh 200 laicu Cuba Cozah hrangah Computer hmangin a lasuak tiah hmuhsuak a si. Myers hi kum 1978 ihsin Cuba ram hrangih hnatuan dingin dawrtu a neizo tiah theihsuak a siih. US thuthup pawimawh pawlcu Cuba Cozah hnen ah a kuat thup theuih,  Fidel Castro in Cuba ram a uk laikhal ah an kawm aw ringrinmg ih Agent 202 leh 123 ti ih rak kawhmi an si tiah  FBI hnen ah a phuanthu BBC Correspondent, James Coomarasamy cun a sim.

     

    Naga Tapung In- India Cozah Thawi Biak Awk Duh

     

     India ram Nagaland ih Tapung Group pakhat National Socialist Council of Nagaland (NSCN-K) Kap Lang ih hruaimi cun India Cozah thawi biakawk a duh thu an puang. NSCN-K thupuangtu Kughalu Mulatonu cun  India Cozah in  Nagaland buainak ti reh a duh taktak ih thu ngai thlakih biakawk in sawm a si ah cun NSCN-K cun kan thinlung sangka kan Ong kauzet a si a ti.

     

    India ram Nagaland ah khinTapung Group pahnih an um ih an tumtah mi Policy leh an hmin khal bangaw an si ih tuihlan ah cun hi Tapung pawlhi Group pakhat ih rak um tlang an si nan kum 1988 ah khan an Party sung buai nak rungah an thenaw ih. Tu ah hin Khap Lang ih hruaimi  NSCN-K timi leh  Isak Muivah ih hruaimi NSCN-IM timi Group pahnih in  an umih an mah leh an mah khal an hua aw zetih an do aw ringringih minung tamzet an kapthat aw zo.

     

    Muivah ih hruaimi NSCN-IM leh India Cozah hi tuihlan kum 10 hrawngih sin biakwk nak an rak tuah phahphah theu ih cu ruangah Khaplang ih hruaimi NSCN-K pawlin India Cozah thawi biak awk nak neih dinghi an rak duhdahlo nak a si. NSCN-K thupuangtu  Mulatonu cun  NSCN-IM lampawlcu Nagaland hrangih zalen nak leh  rualrem nak tuah duh taktak lo ah a puhih India Cozah khaung beng mi Policy ih lam rero men ah a puh. Mulatonu cun  NSCN_IM hotu Muivah cu tui kan dung naite khal ah India Cozah in Somalia ram ah an tlawngter ih India Cozah tirh fung men a si a ti ih .Asi nan Mulatonu ih thusim mihi NSCN-IM pawlcun an pha nasa ih NSCN-K pawlih thu sim micu Politics bawrhhlawh thil ih puh awknak men a si an ti.

     

    Thuthangca latu pawlin India Cozah in be aw dingin an lo sawm taktak ke maw? timi an suh nakcu  Mulatonu cun  India Cozah in Nagaland buainak ti reh a duh taktak a si ah cun be aw dingih in sawm a hreh nakding san a umlo tin a let.

     

    An suh betnak ah India Cozah thawn be aw ta uhla ziangvek dinhmun in nanbe aw ding? tiih thuthangca latu pawlin an suh nakcu NSCN-K Thupuangtu Mulatonu cun  thinglung tluangzet leh thinlung sangka ongkau zetih biakawk cu kan duh bikmi a siih. Asi nan thutluk nak tawp tuahtu dingcu kan President KhapLang leh Nagalnad Chief Minister,  Kitovia an si ding a ti.

     

    Muivah ih hruaimi NSCN-IM pawlhin Independent cu an sual ko nan  Greater Nagaland tuah ih India North East State dangdang pawl lakih Naga miphun pawl hmunkhat ih State ih an um khawm thei dingah cun  an phah niam awk thei zum a si. Asi nan himi thilcu India Cozah leh  State dangdang pawlin an duhlo zetih Greater Nagaland in a hngawng nat bik dingmi cu Manipur State khi a siih. India Political Party Congress etc hruaitu pawlcun Manipur State cu thendarh a theilo ti in an rak au pi rero zo thei ruangah NSCN-IM pawlih duhdan vekcun thilti a harsa dingih zum a si.

     

     

    Relzo vekin Nagaland ih Tapung Group pahnih hi an hmin leh an Policy khal a bangaw ih an hua aw zetih  India Cozah in a cak sawnsawn a do ve ih a caklo deuhdeuh a bawm thei ih khawpisung khalah an kapaw theu. KhapLang ih hruaimi NSCN-K pawlhi  Burma ram sungih Head Quarter nei an siih BUrma ralkap pawl thaw khalin an do a theu.

     

    Barack Obama In  Cairo Ah Thu Sim

     

    US President, Barack Obama cun  President a si hnuih a voikhat tlawnnak Egypt ram Cairo khawpi ih  University of Cairo mipi hmaiah thu simin. Leitlun ih Muslim Billion 1 leh Million 5 hrawng thawi rualrem awknak tuah a duhthu leh  Thazaang cahnak hmangih buainak tuahtu pawl  do tlang a duhthu a sim. Obama cun a mah khal Muslim ram Kenya mi a si nak a hloh hrihlo thu simin, Muslim sakhua nak duhdan  pahbalih  sualnak tuahlo mi thattu cu leitlun mipi zatei that tluk asi timi ngannak Cabu Quran sungih  a um thukhal a simih hiti vek ih thahrum hmangih buainak tuahtu pawl do vivo a tum thu khal a sim.

     

    Obama cun khuitawk ram hmanah US cun thahrum cahnak hmangih buainak tuah a tumlo thu a simih, Afghanistan leh ram dang khalah  minung diknak covo leh zahum nak a um theinak dingah US cun hna a tuan mi a si a ti. Hi a tumtah mi hna tuan suak thei dingin US cun  Afghanistan ram thanso nak dingah dollar Billion 2 leh Million 8 pek a tumin Pakistan ram thanso nak ding hrangkhal ah kum 5 sung hrangding  Dollar Billion 1 leh  Million 5  US cun pek a tum a si a ti. Iraq ramih US ralkap pawlcu 2012 ah laksuah thluh a tumthu khal a sim betih, Israel leh Palestinian karlak thu ah Israel in ram hrekkhat a luahmi pawl a pawmpi lo thu khal a sim.

     

    President Obama hin tuisun ah Germany a lut salzo ih,  Dresden ih  Germany Chan cellor, Angela Merkel thawn an kawmaw cih ih, Nazi hun laiih Juda pawl an rak thah ciamco nak hmun  Buchenwald ih Concentration Camp a pal hnu ah  Afghanistan leh Iraq ih US ralkap hriamhma tuartu pawl an ret khawm nak hmun  a pal sal ding.

     

    Middle East Ah Obama Tlawng

     

    US President,  Brack Hussein Obama cu Middle East ramih Islam sakhua ram pawl thawi rualrem awknak tha neih thei nak dingah Middle East ram pawl tlawngin  Mizan sun ah Saudi Arabia a lutih ropi zetin rak hmuah a si. Obama leh Saudi Arabia Lal King Abdullah hi mizan ah an kawm aw cihih, Oil man thuhla leh Israel leh Palestinian  karlak ih rualrem nak ding thu pawl an rel ih theih a si.

     

    US President Obama hi tuisun ah Egypt a lutsal dingih  a thlen in Egypt khawpi Cairo ah  Egypt President, Hosni Mubarah thawn an kawm aw cih dingih  Egypt President thaw khalin  Israel leh Palestinian karlak buainakthu an rel tlang dingah zum a si. Himi hnua ah  Obama hin Germany leh France a pan sal ding a si.

     

    Himi laiah Al-Qaida hotu langsar zet pakhat Ayman Al- Zawahiri cun  US President Obama cu misual leh mi hrawkhrawl mithah hmangah a puh ih, Middle East ram pawl a tlawn naksan khal Iraq, Afghanistan leh Somalia ram ih Muslim pawl a neh theilo ruangah Middle East ih Muslim ram pawl lamtang ih hawlih hrawk hrawl ih vak tawi  a si ih Egypt ram ah cun sunh lawih tu khal a hmulo ding a ti.

     

    Hi Al-Qaida hotupa cun  Obama hmuah nak leh lawm nakih teltum Egypt hruaitu pawlcu  mi ttih hruat, mi hrawk hrawl, America tlawn, America in sal vekih a tuah mi pawl an siih. America ih mithah leh Muslim pawl a do cimit tum nak bawmtu ih anruah ding thu khal a sim.

     

    India Parliament Uk Tu Nunau

     

    India ram Parliament Lok Sabha 15 nak  Parliament Uktu Speaker ah Meira Kumar cu lungrual zetih hril a si ih. Hi Speaker thar Nunau ropi zet, Meira Kumar hi  mizan sun India ram time nazi 11:15 ah Speaker to nak tohkham sangah Prime Minister, Manmohan Singh,  HouseLeader, Pranab Mukherjee, leh Opposition Leader, LK Advani in an hruaiso ih. A langtei Speaker ih an rakret sungmi Manikrao Govit cun a tohkham sangcu rakkian cih in Speaker thar Meira Kumar cun  Ceremonial Chair ihsin  Lok Sabha khawm nak cu a kai hruai cih a si.

     

    Meira Kumar hi India ram nunau lakih Parliament Speaker hmaisa bik a siih. Meira Kumar Speaker dingah UPA Chairperson, Sonia Gandhi cun a duhthu a sim langih. House Leader, Pranab Mukherjee in a thlawpih. Opposition Leader, LK Advani, Trinamool Congress hruaitu, Mamata banerjee,   DMK hruaitu, T  R Baalu,   BJD hruaitu Arjun Charan Sethi,   NCP hruaitu Sharad Pawar,   JDU hruaitu Sharad Yadav,   RJD hruaitu Laalu Prasad,   National Conference hruaitu Forooq Abdullah leh Muslim League hruaitu  E-Ahmed, pawl khalin Meira Kumar Speaker dingih an duhthu an sim ve ih duhlo tu lamih thusim zohman  an umlo ruangah  cuhtu umlo in Meira Kumar cu Lok Sabha 15 nakih Speaker ah puan a si.

     

    Tui Parliament Inn hnih Rajya Sabha leh Lok Sabha khawm nak ah hin  President, Pralibha Devi Singh patil ,cun thu a simih. Prime Minister Manmohan Singh ih kaihhruai UPA Cozah tharih a hnatuan dingmi pawimawh 10 khal a relsuakih President Patil cun  ram humhim nakleh ramsung mipi pawl pumkhat awknak cu UPA Cozah in kum nga sungih a hnatuan pawimawh a si ding a ti. ramsung kil him nak dinghah ziangzat man khal a si len India Cozah cu a tlanse lo ding a ti.

     

  • Surbung Tlang Thuthang June 4, 5, 6
  • France Vanzam Tla Hawltu Pawl Bei dawng
  • France Vanzam Tla Thu
  • Somalia Ram Buai Nak
  • Kum 12 Thawng Thla Ding
  • European Parliament Hril Aw
  • Mexico Ah Kap Aw
  • France Vanzam Tla Thu Peh
  • Lebanon Ram Hril Awk Nak
  • (Visited 48 times, 1 visits today)

    Comments

    comments

    Comments

    %d bloggers like this: