Surbung Tlang Thuthang

Aung San Suu Kyi Hrem Nak Pe Sal

Tuisun ah Rangoon Court cun  Aung San Suu Kyi cu  thla 18 sung lengsuak theilo ih a mai umnak Inn sungih khumsal dingin thu tthen nak a tuahsak. Himi thu ah Burma ralkap dodal tu pawlcun  hnakum ih Burma rampi hril awknak dingih Aung San Suu Kyi telthei lo dingih tuah an zuh ruangah  hrawk hrol zetin Aung San Suu Kyi ih parah thuphan lamzin hawlsak in hremnak an pe a si tiah an sim.

Relzo vekin Aung San Suu kyi hi a  liamcia kum 20 ihsin kum 14 sungcu zalen lo zetih hrem a siih, Tui tum thla 18 sung hremnak an pekbet naksan cu America mi John Yettaw a Inn ih a luh ruangah a si. Hi America mi John Yettaw khahi kum 7 sung thawngtla dingih relsak a siih cumi sungah kum 4 cu hna harsa zet tuanter a si ding. Kum 64 mi Aung San Suu Kyi hi  Court ih a thu a relcat sak veten a Inn ah hruaicih a siih, Suu Kyi hi kum 5 thawngthlak theih asi nan  thla 18 lawng hremnak an pek naksan hi ramdang pawlih nawrnak leh sawisel nak ruangah  zah an ngai deuh a si ding tiah zum a si.

Himi laiah British Prime Minister, Gordon Brown cun Burma ram ralkap Cozah Court ih rorel nak in a thin a natter thu leh  hi thu relnak ih a tawp nak an tuah dancu  ningzah pi um zet a si a ti.  A tirah cun  Court in Suu Kyi hi kum 3 sung hna harsa zet ttuan ter a si ding tin a relsak ih , Asi nan cumi hnu minute 5 an colh sungah Burma ram Home Minister cu Court sungah lutin   Burma ram  bawibik General, Than Shwe ih thupek a siarsuak ih  Aung San Suu Kyi cu thla 18 sung lengsuak theilo ih hrem ding tin an puang a si.

General, Than Shwe cun Aung San Suu Kyi cu  ram hruaitu mi ropi Britain ramih si Burma ram zalen nakdingih theihtawkih raktuan tu Aung San ih fanu a si ruangah hremnak khal ti nepsak a si tiah a sim.

Hillary Clinton A Thin Heng

Africa ram dangdang tlawng rero laitu US Secretary Of State, Hillary Clinton cu  Congo ram Kanshasa khua ih University tlawngta pawl thawi an kawmawk nakah  tlawngta pakhatin  ram dang thuhla ah a pasal Bill Clinton ih ngaihdan a sutih , Hillary Clinton cun a Pasal cu US Secretary Of State a silo thu leh a mahcu himi hnatuan tu a si thu in thinheng zetin a let.ih Hillary Clinton hi a thin a heng zet tiah an sim.

Hi thusut tu tlawngta pakhat cun  China in Democratic Republic Congo hrangih Loan a pekmi thuhla ah  Bill Clinton in ziangtin ngaihdan a nei tiah a suh mi a siih Hillary Clinton cun a Pasal ih ngaih dan leh thil timi theihpi thluh a tumlo thu in a let. Himi hnu ah khawmnak hruaitu in himi thusuh nakcu a titawp cih ih,   Tlawngta dang pawlin  US leh Europe pawlin Congo ram an rak uknak tukzo ruangah US in Ngaidam dil a tummmaw? tiih an suh nakcu Hillary Clinton cun a liamcia mi thil ih ngaidam dil a tumlo thu in a let ih, a ralai dingmi ih pehtlaih awknak tha leh  thanso nak lamzin tha hawl tlang a duhthu in a let.

(Visited 43 times, 1 visits today)

Comments

comments

Comments

%d bloggers like this: