Surbung Tlang Thuthang

22nd July, 2009

Thailand Ah Hillary Clinton

Tuisun ah  US Secretary Of State, Hillary Clinton cun  Thailand ramih  Association Of South East Asian National (Asean) ram ai awhtu  Europe leh US ram palai pawlih hmaiah thu a simih, Iran in Nuclear ralthuam neih a tum thotho a si ah cun  US cun Gulf ram pawl kiangkapih  a rualpi tha ram pawlcu fimkhur zetih a kilhim a tuldingih US in Gulf kiangkap ram pawl a kilhim a si ah cun  Iran ram hrangah  ramcak leh ram him sicu a harsa zetding a si a ti.

Hillary Clinton cun  President, Obama ih Policy khal relsuak betin Nuclear ralthuam thuhla  ah Iran leh US cu be aw dingin US cun a thinlung sangka a kharlo ih, Asi nan thiltha tuah theihlo a si ah cun US cun a duhbik mi silo thil thalo khal a tuah a ttul ve ding a ti.

Hillary Clinton cun  North Korea ihsin Burma ramah Nuclear ralthuam phurh lut tumnak a um timi thu cu US cun a ngai pawimawh zetih, Burma ram ralkap Cozah in Aung San Suu  Kyi an tuahdan cu a sawisel zetih Asean ihsin BUrma ram dawisuak thei danding tiangin  a ngaihtuah a si a ti.

Hillary Clinton hin NUclear ralthuam thuhla ih an Member ram 6  South KOrea, Japan, China, Russia ram ai awh tu pawl khal a tawng hai dingih  North Korea ram Nuclear ralthuam thuhla  arelpi dingah zum a si.

Brazil Lawng A Let

Mizan ah Brazil ram Lawng Carolina do Norte an timi minung 180 phurtu cu Manous khaw kiangih Negro tiva lawng colh nakhmun a thlenhnu ah  a letih minung 2 nauhak kum 8 mileh nupi nu kum 50 mi an thi. Hi lawnghi ziangruangah a let ti theihfiang a si hrihlo.

Pakistan Court In President Hlun Ko

Pakistan Supreme Court cun an ram President hlun  General, Parvez Musharraf cu tuithla ni 29 ah Court hmai ih ding dingin leh kum 2007 NOvember thla ih  emergency a puannak san leh  danhmangih thureltu minung 60 a banter naksan pawl  relfiang dingin a ko ih Chief Justice Iftikhar Chaudhry leh Judge 13 umnak Bench in hi thu theih ternak hi an suah.

President hlun Pervez Musharraf hi tuah Britain ramah a um laiih a liamcia thla thum ihsin ramdangdang ih mi pawimawh tongdingin leh thurel pi dingin a tlawngsuakih  Saudi Arabia, US leh Europe ram ziangmaw zat pawl a tlawngzo. General Parvez Musharraf hin LOndon khawpi laili ah Inn thazet tumzet a neiih, Pakistan ram hruaitu hlun an ramih um paih nawnlo midang pawl vekin Musharraf hi  London ah a um lanta ke maw? tihi mi tampi thusuh nak a si.

Iraq PM US A Tlawng

Iraq Prime Minister, Nouri al-Maliki cun ni 4 sung caam dingin  tuisun ah US a thlengih a caam sungah  President, Barack Obama  kawmin Iraq leh US ram rualpi that awk vivo nak ding leh kim 2011 ih  US ralkap, pawlin Iraq ram an suahsan thluh ding thu ih thilti ttul mi pawl an rel tlang dingah zum a si.

Himi lai ah mizan sunah Iraq ram khawpi dangdang Baghdad, Ramidi leh Baguba pawlah Bomb a puakih minung 18 an thi. Iraq ram hmuntam sawnah Iraq ram ralkap pawlin kilhim naklam tuanvo an lakzo ruangah, tapung misual pawlin ramsungih buainak an tuah theizia langter nakih an puah mi a si an zum.

BBC in a simnak ah tu ah hin Iraq ram sungah US ralkap 1,30,000 an umlai ih  Iraq ram sungih misual pawlin buainak an tuah ringring ruangah  kum 2011 kumcem zawngih Iraq ram suahsan thluh dingcu thil harsa zet a si menthei tiah BBC cun a sim.

BBC cun tu khalah Iraq ram sungih miphun  Shia, Sunni, Kurdish pawlcu  miphun leh miphun an thliar dang aw rero laiih, Thu neihnak  leh Oil , leh Cozah kaihhruai awknak zemawk dan ah  hi miphun 3 pawlhin buainak an tisuak zik fang a si tiah a sim.

21st July, 2009

Obama Tla Niam

US President, Barack Obama cu  President a si hnuih  a hnatuan nakleh US ram a kaihhruai nakah  US ram mipi ih ngaisan nakleh Uar nakcu  60% hnuai lamah a tla niam. Hi Obama ih dinhmun mipi ngaidan latu ABC News leh Washington  Post kawmaw hin President a tuanhnu ih ram mipi ngaidan leh ruahdan  an laknak hmaisa bikah hin  sumpai dinhmun leh  mipi harhdam nak lam leh sumpai daih awklo nak lam tuahthat nakding thu  ah Obama hin a tumtah cia leh a rakrel cia vekcun a thutiam kammi a baanlo nasa ih a zumvek in a tuahtheilo nasa tiah an ruat.

President a tuanhlan ih a tumtah mipawl a raksim mi ih mipi in an rak zumnak cu 69% a rak siih, President a runtuan hnuih a rak tumtah vekih thil a runti thei nawnlo ruangah mipi ih ngaisan nakleh Uar nak pawlcu 59% ah a tlaniam a si .US ram sumpai dinhmun leh mipi harhdam naklam ah 8% veve in a tlaniamih, Sumpai daihawklo nak lamah tlacun 43% lawng a hmuban, Obama hin a Cozah kaihhruai dan leh a feh tumdan pawl sim fiangdingin  thaisun ah thuthangca latu pawl a kawmding. President a si hlanih a rak Uar tu mipi tamzet khalin an Uar nakhi a tla niam deuh a si.

(Visited 53 times, 1 visits today)

Comments

comments

Comments

%d bloggers like this: