Surbung Tlang News

by-Pasum
January 8,2008.
 
Russia Leh Ukraine Gas Supply CungCang Ah Remaw Lo
 
Russia leh Ukraine   cun Gas Supply cungcang ih remawk lonak an neih ruangah Russia ihsin Europe rampawl cawmtu  Ukraine ram fehtlangih Gas Supply cu titawp asiih Ukraine ih Naftogaz Company cun an ram fehtlangih Europe Gas Supply cu Russia in a titawp hmaisa tiah asim.  Asinan Russia ih Gazprom Company cun Ukraine in an ram paltlangih Gas Supply Pipeline cu a khar tiah a simve.  Hiti vekin Russia leh Ukraine Gas Supply cungcangih an hngirhngo awknak sanhi Ukraine in Russia hnenih Gas man a bakmi a pettha duhlo ih cuitlun ah Gas man bituk tharmi a pawmduh lo ruangah asi.
 
Russia leh Ukraine hngirhngo awknak ruangah hin Europe khawmual ramtampi ah Gas Supply nasa zetin a harsat phah theidingih. Europe ram pawl ih Gas hmanmi 25% cu Russia ihsi lak luhmi asiih. Cumi sungah 80% cu Ukraine ram paltlangih Gas Pipeline tumzetih lakluh mi asi.  Cu ruangah Europe ram tampi a hleice in,  Romania,  Czech Republic, Slovakia,  Bosnia,  Hercegovina,  Bulgaria,  Croatia, Greece, Finland, Estonia, Lithuania,  Hungary, Macedonia, Serbia, leh Austria pawl hrangah cun  Ukraine leh Russia karlak buainak hi nasa zetin a pawi zetding.  Italy khalin Russia ihsi Gas lakluh a tummi cu 10% lawng a ngah thei dingthu a sim. Ukraine khalin nimalte sung daihding lawng Gas a neihthu  a simve ih Europe ram tampi pawlcun an khawlkhawm cia mi an hmangthawk rerozo ih Power Station pawlkhal Gas rentei hmang dingah an  sim. Industry tum pipi pawl khal Power hman timal dingah an sim bet,  Russia cun hi buainak cu a ranglamih ti fel a duhthu a sim.
 
Israel leh Hamas
 
Israel leh Hamas pawlcu Ceasefire tuahdingah leitlun ram dangdang hotu pawlcun an nawr rero lai. Egypt leh Franch in Ceasefire tuah nakdingih a tuahmi cu UN leh US ih pawmpi nakin Israel leh Hamas pawl cu an nawr rero lai an si.  Egypt President Hosni Mubarak cun Gaza ih Hamas hotu pawl cu Ceasefire tuah dingin thu a relpi zo ih.  Hamas hotu pawlcun Gaza bialih mipi vangtlang nitin thilttulmi lakluh nak lamzinpi Israel in a khar pitsak micu  awngsal dingin an duh ih  himi thuhla rel felfai hmaisa lo cun ceasefire tuah an duhlo thu Hamas hotu pawlcun an sim. 
 
Israel cun Hamas pawlin Israel ram thlanglam Rocket ih an kahttheumi  an bansanlo leh Egypt ram fehtlangih ralthuam hriamnam an lakluh ttheumi an bansan lo  a si ah cun Ceasefire tuah an duhlo thu an simbetve.  Asinan Gaza mipi in nitin an ttulsam mi an lakluh theinak dingah nitin nazi 3 sungcu Gaza an kahnak an cawlhsan ttheudingthu an sim. Israel in Gaza a kah natsat bikni tihni sun ah khan  Palestinian minung 130 lenglo an thiih. A liamcia ni 11 ihsi Israel in Gaza a kah nakih palestinian thizat cu 600 lenglo an sizo tiah Palestinian Health Ministry cun a sim. Hi mithi pawl lakah195 cu nauhak ansi. cumi pawl lakah UN kut hnuai ih refugee tlawng pakhat ih minung umkhawm micu Israel pawlin Missile in an kapih minung 40 an thi. Israel ralkap pawlcun himi in ihsin Hamas pawlin Mortar in in kah hmaisak ruangah kankap letve asi an ti.
 
UN Relief Agency thu puangtu Christopher Gunness cun hi tlawng in ah hin Hamas pawl an umlo tiah an simve.  Tui dimhmunah Israel ralkap 7 anthizo ih Hamas pawlih Rocket in a kahngahmi Israel civil 4 an thi. US Secretary of State Condollezza Rice cun Ceasefire tuahnak dingih Franch leh Egypt in an tuahmi cu a pawmthu a simih.  UNO ih Israel Palai Gabriela Shalev cun Ceasefire tuah dinghi a pawm dingleh pawnlo ding ruah that hmaisak a
ttul ding ati.
 
Afghanistan Ih NATO Ralkap Pawlin Tapung 32 Kapthat 
 
Afghanistan khawpi Kabul ih US ralkap thu puangtu in a sim nakah  Laghman Province ih Alishing Distric ah  Tapung pawlleh NATO ralkap pawl kah awknak ah Tapung 32 an thiih an lakah hin nunau tla an tel tiah a sim. Tapung a nungdam pakhat an kai ngahih ralthuam meithal khal tamzet an kaihsak tiah a simbet. Afghanistan ah hin kum 2007 hnakin 2008 ah Tapung pawlhi an cangvai nasa sawnih Bomb kam leh Bomb puak khal a tam sawnih US khalin a ralkap kuatbet a tum a ti. 2001 kumih NATO ralkap pawlin Taleban an nawrthlak ihsin tutiangah 2008 hi Taleban kuttuar ih NATO ralkap an thih tambik kum asi a ti.
 
LTTE leh Sri Lanka Ralkap
 
LTTE pawlcun an khawpi Killinochchi cu Sri Lanka ralkap pawlin laksak khal haisehla LTTE in an laksal tumthu an  sim. Sri Lanka Cozah in a do ruangih tlanse rero laitu LTTE hotu B Nadesan cun  Killinochchi khawpi cu tuihlan khalah Sri Lanka Cozah ralkap pawlin an rakla ttheunan LTTE in kanla sal ringring tiah a sim.Killinochchi kawpi ah hin Sri Lanka ralkap pawlcu cakhrih hmanhai sehla an tlaksiat nakding hmunpi leh an phum awknak dinghmunpi an thlammual asi leh ding a ti.  B Nadesan cun Sri Lanka Cozah in ramsung saklam ah Provincial Election tuah a tummi cu a hlawhsam ding a ti.
 
Relzo vekin LTTE pawlhi Sri Lanka ramsungih sin Tamil miphun lakhran awkduh ih mahte rorel thei nak neih an tumthu 1977 ih sin an puangsuak zoih. Cu ruangah Zalennak diktak kan ngah laihlanlo cu kando vivo dingtiah an puang.Sri Lanka cozah ralkap pawlcun LTTE pawlhi an ram saklam kawnte ah an nawrbet rero laiih  an ttan tawpnak bik laktumin Elephant Pass an thlengzo. LTTE leh Sri Lanka cozah hi kum 25 lenglo an do awzo ih minung 70,000 lenglo an thizo.
 
 

Comments

comments

Comments

%d bloggers like this: